1 Hei āpiti anō, ko tā mātou hei whakaarotanga māu ki te āhuatanga o te kohikohinga a ngā hunga tapu katoa i tētahi mātauranga o ngā meka katoa, me ngā whakamamaetanga me ngā tūkinotanga kua tau nei ki runga ki a rātou e te iwi o tēnei Whenua;

2 Ā, mō ngā taonga katoa me te rahi hoki o ngā pākarukarutanga kua pā nei ki ā rātou mea, ki te taha o tō rātou mana, me ngā mamae pū anō o te tinana, tae noa atu ki ō rātou taonga;

3 Me ngā ingoa katoa anō o ngā tāngata katoa kua mahi tahi ki te whakapēhi i a rātou, mehemea rā anō e taea ana te whakamau i a rātou me te kite atu i a rātou.

4 Ā, tērā pea ka taea te whakatū i tētahi kōmiti ki te rapu kōrero mō ēnei mea, me te tuhituhi kōrero me ngā tuhinga oati; me te kohikohi hoki i ngā whakaputanga whakakino e rewa haere ana;

5 Me ngā mea katoa kei roto nei i ngā makahīni, i ngā mātāpunenga hoki, i ngā hītori whakakino hoki kua whakaputaina ake, me ngā mea e tuhia ana, nā wai hoki, kātahi ka whakaaturia mai nei te rautaki whakakino pōautinitini katoa me ngā tikanga kōhuru kua whakamahia nei ki runga i tēnei iwi—

6 Kia kaua e whakaputa atu ki te ao katoa, engari ka kawea atu ki ngā upoko o te kāwanatanga i runga i tōna kano pōuri whakarihariha, hei mahi whakamutunga e mahi tahi nei tātou me tō tātou Matua i te Rangi, i mua i tā tātou tino kerēme i taua whakaari e karangahia ai ia i tana wāhi huna; hei āpiti anō kia mahue te iwi whānui kia kore ai ōna takunga i mua i tana tuku i te kaha o tōna ringa kaha.

7 He haepapa tino nui hei mahi mā tātou ki te Atua, ki ngā anahera, e kawea ai tātou kia tū tahi ai, ki a tātou ake anō hoki, ki ā tātou hoawahine me ā tātou tamariki, kua meatia kia tuohu iho i runga i te pāmamae o te ngākau, te pōuri, i raro i te ringa kino o te kōhuru, te tūkino, me te whakapēhi, e tautokona ana, ā, e akiakina ana, ā, e hāpaingia ana e te mana o te wairua nāna nei i kaha whakahihiko nei i ngā whakapono o ngā tūpuna, kua riro iho nei ngā rūkahu, ki runga i ngā ngākau o ā rātou tamariki, ā, kua whakakīa te ao ki te rangirua, ā, e kaha haere ana, ā, koia ināianei te puna matua o ngā kino katoa, ā, e auē ana te ao katoa i raro i te taumaha o ōna hara.

8 He ioka rino, he taurahere kaha; koinā ngā tino herenga ringa, me ngā mekameka, me ngā herenga rino, me ngā wheta o te ao rēwera.

9 Nō reira he haepapa tino whakahirahira mā tātou, ehara i te mea ki ā tātou ake hoa wahine me ā tātou ake tamariki, engari ki ngā pouaru me ngā pani, kua kōhurutia ā rātou hoa tāne me ō rātou matua i raro i tōna ringa rino;

10 Kua nui āna mahi pōuri kerekere mā konā tūoioi pū anō te ao rēwera, ā, kia tū noa i runga i te wehi me te kōmā, ā, kia wiriwiri, ā, kia korikori ngā ringaringa pū anō o te rēwera.

11 Waihoki he tino haepapa mā tātou ki te whakatipuranga e tipu mai ana, ā, ki te hunga ngākau urutapu katoa hoki—

12 Nā te mea he tokomaha i runga i te whenua kei waenganui i ngā hapū, ngā huihuinga, me ngā iwi katoa e kāpō ana i te tinihanga o te tangata, i reira tatari iho rātou ki te nukurau, ā, kua kaiponuhia noatia te pono i a rātou i te mea kāore rātou e mōhio ana ki hea rapua ai—

13 Nō reira, kia kaha tātou ki te whakapau i ō tātou oranga i runga i te whakaputanga ki te ao mārama ngā mea ngaro katoa o te pōuritanga, kia mōhio ai tātou; ā, he mea whakakite mai i te rangi—

14 Kātahi ka tino aro nui atu ki ēnei mea.

15 Kaua e tukua rātou kia whakaarohia aua mea he mea itiiti; nā te mea he maha ngā mea anamata e takoto ake nei, e hāngai atu ana ki ngā hunga tapu, mā aua mea puta ai ēnei mea.

16 E mōhio ana koutou e ngā teina, ka tino whaihua tētahi kaipuke nunui rawa i tētahi urungi tino iti i te wā o te marangai, mā te mahi tahi me te hau me ngā ngaru.

17 Nō reira, e aku teina aroha, tukua tātou kia meatia ngā mea katoa e taea ana e tātou i runga i te hari; kātahi tātou ka tū, i runga i te mōhio nui, kia kitea te whakaoranga o te Atua, ā, kia huraina ake tōna ringa.