Wāhanga 48
He whakakitenga mā roto i a Hōhepa Mete te Poropiti, ki Katarana, Ohaio, Māehe 10, 1831. I inoi ake te Poropiti ki te Ariki e pā ana ki te huarahi hopu whenua hei kāinga noho mō te Hunga Tapu. He kaupapa nui tēnei mō te hūnukutanga o ngā mema o te Hāhi mai i ngā Whenua Tōpū ki te rāwhiti, i runga i te ngohengohe ki tā te Ariki whakahau kia huihui tahi rātou ki Ohaio (tirohia ngā wāhanga 37:1–3; 45:64).
1–3, Me tohatoha e ngā Hunga Tapu ki Ohaio ō rātou whenua ki ō rātou teina; 4–6, Me hoko whenua ngā Hunga Tapu, me hanga pā, me te whai i ngā tohutohu a ō rātou āpiha whakahaere.
1 E tika ana kia noho tonu koutou mō nāianei i ō koutou kāinga, i te mea ka pai tēnā mō ā koutou oranga.
2 Ā, i te mea he whenua ō koutou, me wāwahi atu ētahi ki ā koutou teina nō te rāwhiti;
3 Ā, i te mea kāore ō koutou whenua, tukua rātou kia hokongia mō tēnei wā i aua rohe huri noa, e rite ana ki tā rātou e pai ai, nā te mea e tika pū ana mō rātou kia whaikāinga noho mō tēnei wā.
4 E tika pū ana kia penapena i ngā pūtea katoa e taea ai e koutou, me te hopu i ngā mea katoa e taea ai i runga i te tika, kia taea ai a tōna wā te hoko whenua hei whenua tuku iho, ā, hei pā pū anō.
5 Kāore anō kia rite te wā kia huraina ake te wāhi; engari whai muri iho i te haerenga mai o ā koutou teina i te rāwhiti me whakatau he momo tangata, ā, ka hoatu ki a rātou kia mōhio ko hea te wāhi, ka whakakitea rānei ki a rātou.
6 Ā, ka whakataua rātou ki te hoko whenua, me te kōkiri ake i te whakatakotoranga iho i te tūāpapa o te pā; kātahi ka tīmatahia te whakahuihuitanga i ō koutou whānau, tēnā tangata, me tēnā tangata me tōna whānau, e rite ana ki ana āhuatanga, ā, e rite ana ki tana whakataunga e te tumuakitanga me te pīhopa o te hāhi, e rite ana ki ngā ture me ngā whakahaunga kua whiwhi nei koutou, me ngā mea e whiwhi ai koutou a muri ake nei. Koia anō. Āmine.