Wāhanga 95
He whakakitenga mā roto i a Hōhepa Mete te Poropiti, ki Katarana, Ohaio, Hune 1, 1833. He tāpiritanga atu tēnei whakakitenga o ngā tohutohu o te Atua hei hanga i tētahi whare koropiko, hei whare tohutohu hoki, arā, te whare o te Ariki (tirohia wāhanga 88:119–136).
1–6, Ka kohetea te Hunga Tapu mō rātou kīhai i hanga ake i te whare o te Ariki; 7–10, E hiahia ana te Ariki kia meatia Tōna whare hei tohi i Tōna iwi ki te mana nō runga rawa; 11–17, Me whakatapu te whare hei wāhi koropiko, ā, hei kura mō ngā Āpōtoro.
1 He pono, pēnei tā te Ariki ki a koutou e arohaina nei e au, ā, ko te hunga e arohaina nei e au e kohetea hoki e au kia murua ō rātou hara, nā te mea mā runga i te kohetetanga e whakarite nei au i tētahi huarahi mō tō rātou whakaputanga i roto i ngā mea katoa i te whakawainga, ā, kua arohaina koutou e au–
2 Nā reira, e tika ana kia kohetea koutou, ā, kia rīria koutou i mua i tōku mata;
3 Nā te mea kua hara koutou ki ahau i tētahi hara tino taumaha, i runga i te mea kīhai koutou i whakaaro ake ki te whakahaunga nui i roto i ngā mea katoa, kua hoatu nei e au ki a koutou e pā ana ki te hanganga ake o taku whare;
4 Mā tēnei whakaritenga e whakaritea nei e au aku āpōtoro ki te tapatapahi i taku māra wāina mō te wā whakamutunga, kia pahawa ake i ahau taku mahi whano kē, kia ringihia iho e au tōku Wairua ki runga ki ngā kikokiko katoa–
5 Engari nana, he pono tāku e mea atu nei ki a koutou, nā, he tokomaha ngā mea kua whakamanaia nei i waenganui ia koutou, kua karangatia nei e au engari he ruarua ngā mea e kōwhiria ai.
6 Kua hara te hunga kīhai nei i kōwhiria i tētahi hara tino taumaha, i te mea e hīkoi ana rātou i te pōuritanga hei te poutūmārotanga o te rā.
7 Ā, mō tēnei take i hoatu nei e au tētahi whakahaunga kia karangatia ai tā koutou huihuinga pono, kia tae ake ai ā koutou nohopuku me ā koutou tangihanga ki ngā tāringa o te Ariki o Hapoata, koia ko tōna whakamāoritanga, ko te kaihanga o te rā tuatahi, te tīmatanga me te whakamutunga.
8 Āe rā, he pono tāku e mea atu nei ki a koutou, i hoatu e au ki a koutou tētahi whakahaunga kia waihanga ake koutou i tētahi whare, kei roto rā anō i taua whare he wāhi hei tohi i te hunga kua kōwhiria nei e au ki te mana nō runga rawa;
9 Nā te mea ko tēnei te whakaari a te Matua ki a koutou; nō reira e whakahau ana ahau i a koutou kia noho mai, he pērā pū anō i aku āpōtoro i Hiruharama.
10 Hei aha koa, i hara aku pononga i tētahi hara tino taumaha; ā, ka ara ake ngā tautohetohe i roto i te kura o ngā poropiti; he mea tino taumaha ki ahau, e ai tā te Ariki; nō reira i tukuna atu rātou e au kia kohetea.
11 He pono tāku e mea atu nei ki a koutou, koia taku hiahia kia hanga ake koutou i tētahi whare. Ki te pupuri i aku whakahaunga ka whai mana koutou kia hangaia ake.
12 Ki te kore koutou e pupuri i aku whakahaunga, e kore e hono tonu te aroha o te Matua ki a koutou, nō reira ka hīkoi koutou i roto i te pōuritanga.
13 Nā anei tētahi mātauranga, me te hinengaro o te Ariki–tukua te whare kia hangaia ai, kaua i runga i te ritenga o te ao, nā te mea kāore au e hoatu ki a koutou kia noho ai i runga i te ritenga o te ao;
14 Nō reira, tukua ia kia hangaia ake ai i runga i te ritenga e whakaatu atu nei au ki a koutou tokotoru, mā koutou e whakatau ko wai, ā, mā koutou e whakamana ki tēnei mana.
15 Ā, ko tō reira rahinga he rima tekau mā rima pūtu te whānui, ā, tukua kia ono tekau mā rima pūtu te roa, i roto i te kōti whakaroto.
16 Ā, tukua te wāhanga i raro rawa o te kōti whakaroto kia whakatapua ki ahau mō tō koutou tāpaenga hākarameta, me tā koutou kauhautanga, me ā koutou nohopuku, me ā koutou inoi, ā, me te tāpaetanga ake o ō koutou hiahia tapu rawa ki ahau, e ai tā te Ariki.
17 Ā, tukua te wāhi o runga rawa o te kōti whakaroto kia whakatapua ki ahau mō te kura o aku āpōtoro, e ai tā te Tama Amana; kia pēnei rānei te kupu, Arapa; kia pēnei kē rānei te kupu, Omekaha; ko Ihu Karaiti pū anō tō koutou Ariki. Āmine.