1 I whakahuia tētahi kaunihera whānui i tēnei rā mō ngā pirihi e rua tekau mā whā ki te whare o Hōhepa Mete, Tama., mā runga i te whakakitenga, ā, ka tīmata atu te whakariterite i te kaunihera teitei o te hāhi o te Karaiti, e hangaia nei ki ngā pirihi teitei tekau mā rua, ā, kia kotahi, kia toru rānei ngā tumuaki kia rite ki te mea e tika ana.

2 I whakataua te kaunihera teitei e te whakakitenga mō te take o te whakatau i ngā uaua nui e hua ake ai i roto i te hāhi, ngā mea e kore nei e taea te whakatau e te hāhi, e te kaunihera pīhopa rānei e rite ai ki ngā hiahia o ngā taha e rua.

3 I whakaaehia a Hōhepa Mete, Tama., rātou ko Hirini Rikitana, ko Whererika T. Wiremu e te reo o te kaunihera; ā, i kōwhiria a Hōhepa Mete, Matua., Hōani Mete, Hōhepa Koe, Hōani Teonetana, Mātini Hārihi, Hōani H. Kāta, Iarere Kāta, Oriwa Kautere, Hamuera H. Mete, Orihana Haiti, Hiriweta Mete rātou ko Ruka Teonetana, ngā pirihi teitei, hei kaunihera tū tonu mō te hāhi, he mea nā te reo kotahi o te kaunihera.

4 Kātahi ka pātaia atu ngā kaikaunihera kua whakahuahuatia ake nei mehemea rānei kua whakaae rātou ki ō rātou tūranga, mehemea rānei ka rite ā rātou mahi i taua tūranga ki tā te ture o te rangi, nā, ka whakaaehia katoatia e rātou, ā, ka whakatīnanahia ō rātou tūranga kia rite ki te aroha o te Atua kua whakataua iho nei ki runga ki a rātou.

5 Kua whā tekau mā toru te tatauranga o te hunga i roto i te kaunihera, ko te hunga nāna nei i tuku pōti i runga i te ingoa, ā, mō te hāhi ki te kōwhiri i ngā kaikaunihera kua whakahuahuatia ake nei, e pēnei ana: tokoiwa ngā pirihi teitei, tekau mā whitu ngā erata, tokowhā ngā pirihi, ā, tekau mā toru ngā mema.

6 I pōtitia: kia kaua e riro i te kaunihera teitei he mana ki te mahi ki te kore ngā mea tokowhitu o aua kaikaunihera kua whakahuatia ake nei, ki te kore rānei i reira ngā kaiwhakakapi kua kōwhiria nei.

7 Ka whai mana ēnei tokowhitu ki te whakatū i ētahi atu pirihi teitei, ngā mea e whakaarohia ana e rātou he mea tika, e taea ana te mahi i ngā tūranga o ngā kaikaunihera e tamō ana.

8 Kua pōtitia: ina wātea ake tētahi tūranga he mea nā tōna matenga, te rironga atu rānei o te tūranga nā tōna taka ki te hara, nā tana putanga atu rānei i ngā rohenga o ngā whakahaere o tēnei hāhi, o tētahi o ēnei kaikaunihera kua whakahuahuatia ake nei, mā te tumuaki, ngā tumuaki rānei e kōwhiri te mea hei whakakī, ā, ka whakamanahia ake e te reo o te kaunihera whānui o ngā pirihi teitei, kua whakahuia mō taua take, hei mahi i runga i te ingoa o te hāhi.

9 Ko te tumuaki o te hāhi, koia hoki te tumuaki o te kaunihera, he mea kōwhiri e te whakakitenga, ā, ka whakaaetia i roto i tana mahi e te reo o te hāhi.

10 Ā, e rite ana ki te mana o tana tūranga e whakahaere ai i runga i te kaunihera o te hāhi; ā, nōna hoki te tikanga kia āwhinatia e ngā tumuaki e rua, kua kōwhiria i runga i taua āhua anō i kōwhiria ai ia.

11 Ā, mehemea ka wātea tētahi, te tokorua rānei o te hunga kua kōwhiria hei āwhina i a ia, kei a ia te mana ki te whakahaere i te kaunihera ko ia anake; ā, mehemea ko ia te mea e tamō ana, kei ērā atu tumuaki te mana hei whakahaere mōna, rāua tahi, tētahi rānei o rāua.

12 I ngā wā katoa e hui putuputu ai tētahi kaunihera o te hāhi o te Karaiti, pēnei te āhua o tōna whakatakoto i te tauira, ko te mahi mā ngā kaikaunihera tekau mā rua he rotarota kia kitea ai ko tēhea o rātou e kōrero i te tuatahi, e tīmata ana ki te nama tahi, ā, haere pēnei ana tae noa ki te tekau mā rua.

13 I ngā wā katoa e huihui ai tēnei kaunihera ki te whakawā i tētahi take, ka kōwhiria e ngā kaikaunihera tekau mā rua mehemea he take uaua, kāore rānei; mēnā kāore, ka kōrero ngā mea tokorua anake mō taua take, e rite ana ki te tauira kua tuhia i runga ake nei.

14 Engari mehemea he take uaua, ka tohua ngā mea tokowhā; ā, ki te tino uaua rawa, ka tokoono; engari kua kore e tohua ngā mea neke atu i te tokoono ki te kōrero mō tētahi take.

15 I roto i ngā take katoa, kei te kaikaro te tikanga kia tono atu ki te wāhi haurua o te kaunihera, hei ārai atu i te tāwai, i te whakahaere hē rānei mō te taha ki a ia.

16 Whai muri iho i te kōwhiri i ngā kaikōrero hei kōrero i mua i te kaunihera mō taua take, whai muri iho i te tātari i ngā taunakitanga, i runga i tōna māramatanga tūturu i te aroaro o te kaunihera; me tū ngā tāngata katoa ki te kōrero e rite ana ki te tika me te pono.

17 Ko ngā kaikaunihera e rotarota nei i ngā nama taurua, arā, 2, 4, 6, 8, 10 me te 12, ko rātou ngā mea me tū ki te kōrero mō te kaikaro, ā, hei ārai atu i te tāwai, i te whakahaere hē rānei.

18 I roto i ngā take katoa, ka riro ki te kaiwhakapae me te kaikaro te tikanga kia tū ai ki te kōrero i mua i te kaunihera, whai muri iho i te whakarongo ki ngā taunakitanga, ā, whai muri hoki i ngā kōrero a ngā kaikaunihera.

19 Ina oti te whakarongo atu ki ngā taunaki, ki ngā kaunihera, ki te kaiwhakapae me te kaikaro, ka whakaputa te tumuaki i tana whakatau e rite ana ki te māramatanga kei a ia e pā ana ki te take, ā, ka karangahia ake ngā kaikaunihera tekau mā rua kia tautokona tana whakatau e ō rātou pōti.

20 Engari mehemea rānei ētahi o ngā kaikaunihera e toe ana, te hunga kāore i kōrero, tētahi rānei o rātou, whai muri iho i te whakarongo atu ki ngā taunaki, me ngā inoi i runga i te whakaaro taurite, kātahi ka kitea tētahi hapa i te whakatau a te tumuaki, e taea ana e rātou te hura mai, kātahi ka whakahaere whakawā tuarua mō taua take.

21 Ā, mehemea i muri iho i te whakawākanga tuarua, ka puta mai ētahi atu māramatanga hou mō taua take, ka tīnia te whakatau e rite ai ki aua māramatanga hou.

22 Engari ki te kore e puta ētahi atu māramatanga hou, ka mana tonu te whakatau tuatahi, kei te kaunihera whānui te mana kia hoki anō ai ki te whakatau tuatahi.

23 I ngā take uaua e pā ana ki te whakaakoranga, ki te tikanga rānei, ki te kore e nui ana ngā mea kua tuhia e tino mārama ai te take ki ngā hinengaro o te kaunihera, e taea ana e te tumuaki te inoi atu ki te rapu i te hinengaro o te Ariki mā runga i te whakakitenga.

24 Kei ngā pirihi teitei te mana, ina kei wāhi kē atu, ki te whakatū hui kaunihera i runga i taua ritenga, ki te whakatau nawe, ina tonoa e ngā rōpū, e ngā taha e rua rānei.

25 Ā, kei te kaunihera o ngā pirihi teitei te mana ki te whakatū i tētahi o rātou ki te whakahaere i runga i taua kaunihera mō taua wā.

26 Mā taua kaunihera kua kōrerohia ake nei e kape, i taua wā tonu, ki te tuku i tētahi kape o ā rātou whakahaere, me tētahi tuhinga o taua whakaaturanga e piri tahi ana ki tā rātou whakatau, ki te kaunihera teitei o te nohoanga o te Tumuakitanga Tuatahi o te Hāhi.

27 Ki te kore e pai mai ngā rōpū, ngā taha e rua rānei ki te whakatau a te kaunihera kua kōrerohia ake nei, e ahei ana rātou ki te tono anō ki te kaunihera teitei o te nohoanga o te Tumuakitanga Tuatahi o te Hāhi, ā, ki te whakatū anō i tētahi whakawākanga, kātahi ka whakaherehia tētahi whakawākanga anō, e rite ana ki te tauira o mua kua tuhia iho nei, me te mea nei kāore i meatia taua whakatau.

28 Me karanga ake tēnei kaunihera pirihi teitei ki wāhi kē anake mō ngā take tino uaua rawa atu o te hāhi; ā, me kaua rawa e whakatūria tētahi hui pēnei mō ngā take iti, ngā take ngāwari noa iho rānei.

29 Kei ngā pirihi teitei hāereere, ngā pirhi teitei rānei kei tāwāhi te mana kia kīa ai mehemea e tika ana ki te whakatū kaunihera, kaua rānei.

30 Kei reira tētahi rerekētanga i waenganui i te kaunihera teitei, ngā pirihi teitei rānei e hāereere ana ki tāwāhi, me te kaunihera teitei e hāereere ana kei roto rā ngā āpotoro tekau mā rua, i roto i ā rātou kōwhiringa.

31 E āhei ana te tono anō i te whakatau a te hunga tuatahi; engari tē taea kia tonoa te whakatau a te tuarua.

32 E taea ana anake te mea tuarua te arotake e ngā kaiwhakahaere whānui o te hāhi mehemea kua taka ki te hara.

33 Kua oti: kei te tumuaki, ngā tumuaki rānei o te nohoanga o te Tumuakitanga Tuatahi o te Hāhi te mana ki te whakatau mehemea e tika ana kia tonoa tētahi take kia whakahaere tuaruatia te whakawākanga, whai muri iho i te arotake i te tono me ngā taunaki me ngā kōrero e piri tahi ana ki taua take.

34 Kātahi ka tīmata ngā kaikaunihera ki te maka rotarota, kia kitea ai ko wai te kaikōrero tuatahi, ā, koinei ngā putanga, arā: 1, Oriwa Kautere; 2, Hōhepa Koe; 3, Hāmuera H. Mete; 4, Ruka Teonetana; 5, Hōani H. Kāta; 6, Hiriweta Mete; 7, Hōani Teonetana; Orihana Haiti; 9, Iarere Kāta; 10, Hōhepa Mete, Matua., 11, Hōani Mete; 12, Mātini Hārihi.I te mutunga o te inoi ka hikina te huihuinga.