1 Me whakarongo ki te reo o Ihu Karaiti, tō koutou Kaihoko, te Ahau Nui Rawa, kua whakamārietia ō koutou hara e tōna ringa aroha;

2 Māna tana iwi e whakakao mai anō nei he heihei e whakakao ana i āna pīrere ki raro i ōna parirau, ko te hunga katoa e whakarongo ai ki tōku reo me te whakaiti iho i a rātou anō i tōku aroaro, me te karanga mai ki ahau i runga i te reo kaha.

3 Nana, he pono, he pono, tāku e mea atu nei ki a koutou, nā, kua murua atu ō koutou hara i tēnei wā, nō reira whiwhi ai koutou i ēnei mea; engari me mahara kia kaua e hara atu anō, kei tau iho ngā mate whawhati tata ki runga i a koutou.

4 He pono, tāku e mea atu nei ki a koutou, nā, ko koutou te hunga kōwhiria i te ao kia whakapuaki atu i taku rongopai i runga i te reo hari, anō nei he reo tētere.

5 Kia hīkina ake ō koutou ngākau, kia hari koutou hoki, nā te mea kei ō koutou aroaro ahau, ā, ko ahau tō koutou kaitakawaenga ki te Matua; ā, ko tōna hiahia pai ia kia hoatu ki a koutou te kīngitanga.

6 Ā, e rite ana ki ngā mea kua oti nei te tuhituhi—Ahakoa he aha ā koutou e tono mai ai i runga i te whakapono, e whakakotahi mai ana i runga i te inoi e rite ana ki tāku i whakahau ai, ka whiwhi koutou.

7 Ā, kua karangatia koutou kia pahawa ake te whakahuihuinga o aku mea kōwhiria; nā te mea ka rongo aku mea kōwhiria i tōku reo, ā, kāore rātou e whakapakeke i ō rātou ngākau;

8 Nā reira kua puta atu te ture i te Matua kia whakahuihuia rātou ki roto ki te wāhi kotahi i runga i te mata o tēnei whenua, kia whakaritea ō rātou ngākau, ā, kia whakatakatūhia ai i roto i ngā mea katoa ina tae mai te rā e tukuna mai ai te whakapāwera me te whakamōtī ki runga i te hunga kino.

9 Nā te mea kua tata mai te hāora me te rā anō e pakari ai te ao; ā, ka rite te hunga whakapehapeha katoa me te hunga anō e mahi whakarihariha ana ki te kakau wīti; ā, māku rātou e tahu ake, e ai tā te Ariki o ngā Mano, nā, kua kore he whakarihariha i runga i te whenua;

10 Nā te mea kua tata mai te hāora, me tutuki tā aku āpōtoro i kī ai; nā te mea ka pērātia te pahawatanga ake i tā rātou i kī ai;

11 Nā te mea māku ahau e whakakite atu mai i te rangi i runga i te mana me te korōria nui, me ngā mano katoa anō hoki i reira, ā, ka noho i runga i te tika me ngā tāngata i runga i te whenua mō ngā tau kotahi mano, ā, e kore te hunga whakarihariha e tū.

12 Hei āpiti anō, he pono, he pono, tāku e mea atu nei ki a koutou, kua puta atu i runga i tētahi ture kaha, mā te hiahia a te Matua, ka tū aku āpōtoro, arā, te Tekau Mā Rua i tōku taha i roto i taku minitatanga ki Hiruharama i tōku ringa matau hei te rā o taku haerenga mai i runga i te pou ahi, e kākahuria ana ki ngā kahu o te tika, e mau karauna ana i runga i ō rātou māhunga, i runga i te korōria pērā pū anō i ahau, ki te whakawā i te whare katoa o Iharaira, te hunga katoa i aroha nei i ahau, me te hunga i pupuri i aku whakahaunga, kāore ētahi atu.

13 Nā te mea ka tangi te tētere, ā, ka roa, ka kaha tōna tangihanga, i runga pū o Maunga Hinai, ā, ka haruru te whenua katoa, ā, ka puta mai rātou—āe rā, ko te hunga mate pū anō i mate ai i roto i ahau, e whiwhi ai i tētahi karauna o te tika, kia kākahutia anō hoki, pērā pū anō i ahau, kia piritahi mai, kia kotahi tonu mātou.

14 Engari, nana, ko taku kupu tēnei ki a koutou, nā, i mua i te taenga mai o tēnei rangi nui, nā, ka pōuri te rā, ka huri te marama ki te toto, ā, ka taka iho ngā whetū i te rangi, ā, ka ai he tohu nui ake i te rangi i runga me te whenua i raro;

15 Ā, ka ai he tangihanga, he auētanga i waenganui i ngā tamariki a te tangata;

16 Ā, ka tukuna mai he marangai ua māwhatu kia whakangaromia iho ai ngā māra o te whenua.

17 Ā, ka pahawa ake, nā te whakarihariha o te ao, nā, māku e rapu utu i runga i te hunga whakarihariha o te ao, nā te mea e kore rawa rātou e rīpenetā; nā te mea kua kī te kapu o taku riri; nana rā, e kore aku toto e horoi i a rātou ki te kore rātou e whakarongo mai ki ahau.

18 Nā reira, māku, mā te Ariki te Atua e tuku mai he ngaro ki runga i te mata o te whenua, e mau ai ki ō reira tāngata, ā, ka kainga ō rātou kikokiko, ā, mā konā uru ai ngā iro ki runga i a rātou;

19 Ā, ka puritia ō rātou arero kia kore e taea e rātou te kohukohu ki a au; ā, ka taka iho ō rātou kikokiko i ō rātou kōiwi, me ō rātou karu i ngā puare;

20 Ā, ka pahawa ake, nā, ka horomia ake rātou e ngā kararehe o te ngahere me ngā manu o te rangi.

21 Ā, ko te hāhi mōrikarika nui, koia te wahine puremu o te ao katoa, e makaia iho ai e te ahi horohoro, e rite ana ki tērā i kōrerotia ai e te māngai o Ehekiere te poropiti, nāna nei i kōrero ai mō ēnei mea, kāore anō kia pahawa ake engari ka pērātia pū anō, e ora nei au, nā te mea e kore ngā mōrikarikatanga e whakahaere.

22 Hei āpiti anō, he pono, he pono tāku e mea atu nei ki a koutou, nā, ina pau ngā tau kotahi mano, kātahi ka tīmata anō te tangata ki te whakakore i tō rātou Atua, kātahi ka tohungia e au te ao mō tētahi wā poto;

23 Ā, ka puta mai te whakamutunga, ā, ka horomia te rangi me te whenua, ā, ka pahemo atu, kātahi ka puta mai tētahi rangi hou me tētahi whenua hou.

24 Nā te mea ka pahemo atu ngā mea tawhito katoa, ā, ka meinga hei mea hou ngā mea katoa, ko te rangi me te whenua pū anō, me ngā mea katoa anō kei roto rā, tangata mai, kararehe mai, ngā manu o te rangi, me ngā ika o te moana;

25 Ā, e kore te makawe kotahi, te mea iti rānei, e ngaro, nā te mea he mahinga ia nā tōku ringa.

26 Engari, nana, he pono tāku e mea atu nei ki a koutou, i mua i te pahemotanga atu o te ao, ka whakatangi a Mikaere, taku anahera matua rawa, i tana tētere, kātahi ka oho ake te hunga mate katoa, nā te mea ka tūwheratia ake ō rātou rua tūpāpaku, ā, ka puta mai rātou—āe rā, ko te katoa pū anō.

27 Ā, ka whakahuihuitia te hunga tika ki tōku ringa matau ki te oranga tonutanga; ā, ka whakamā au i te hunga whakarihariha kei tōku ringa mauī kia kī ai nāku rātou, i te aroaro o te Matua;

28 Nā reira māku e kī atu ki a rātou—Kia wehe atu i ahau, e koutou e te hunga kua kangaia, ki roto ki te ahi mau tonu, kua whakaritea e te rēwera rātou ko ana anahera.

29 Ināianei ā, nana, ko taku kupu tēnei ki a koutou, kāore au i whakapuaki atu i tētahi wā i tōku ake māngai kia hoki ai rātou, nā te mea kāore rātou e tae ake ki te wāhi kei reira ahau, nā te mea kāore ō rātou kaha.

30 Engari kia mahara kāore aku whakawākanga katoa e tukuna atu ki te tangata; ā, e rite ana ki ngā kupu kua puta kē atu i tōku māngai mā konei rā te tutukiranga, nā, ka meinga ai ō mua ki muri, me ō muri ki mua i roto i ngā mea katoa kua hangaia ake e te kupu o tōku mana, koia te mana o tōku Wairua.

31 Nā te mea nā te mana o taku Wairua au i hanga ai i a rātou; āe rā, ko ngā mea katoa, arā, ko ngā mea wairua me ngā mea tīnana—

32 Ko ngā mea wairua tuatahi, ko ngā mea tīnana tuarua, koia te tīmatanga o taku mahi, hei āpiti anō, ko ngā mea tīnana tuatahi, ko ngā mea wairua tuarua, koia te mea whakamutunga o taku mahi—

33 E kōrero atu ana ahau ki a koutou kia mārama ai koutou; engari kāore he mutunga ō ngā mahi ki ahau, kāore hoki he tīmatanga; engari kua hoatu ki a koutou kia mārama ai koutou, nā te mea kua tonoa mai ahau e koutou, ā, e whakaaehia ana.

34 Nā reira, he pono tāku e mea atu nei ki a koutou, nā, he mea wairua ngā mea katoa ki ahau, ā, kāore noa au i hoatu ki a koutou tētahi ture mō te taha tīnana; ki tētahi tangata rānei, ki ngā tamariki rānei o te tangata; ki a Arama rānei, tō koutou matua, nāku noa nei i hanga.

35 Nana, i hoatu ki a ia kia tū ai ia hei kaiwhakahaere ki a ia anō; ā, nāku i hoatu tētahi whakahaunga ki a ia, engari kāore i hoatu e au tētahi ture ā-tīnana ki a ia, nā te mea he mea wairua aku whakahaunga; ehara i te mea māori, i te mea tīnana rānei, i te mea nō te ao, i te mea tūkari rānei.

36 Ā, i pahawa ake i a Arama, e whakawaia ana e te rēwera—nā, nana, i mua te rēwera i a Arama, nā te mea i haututu ia ki ahau, e mea ana, Homai tō hōnore, koia tōku mana; waihoki, i tahuritia atu te hau toru anō o ngā mano o te rangi i ahau he mea nā tō rātou mana kōwhiri;

37 Ā, kua panaia iho rātou, ā pēnei puta ai te rēwera me āna anahera;

38 Ā, nana, kei reira tētahi wāhi i whakaritea ai mō rātou mai i te tīmatanga, ko te ao rēwera taua wāhi.

39 Ā, e tika pū ana kia ai he rēwera hei whakawai i ngā tamariki a te tangata, kua kore rānei rātou e tū hei kaiwhakahaere ki a rātou anō; nā te mea mehemea kāore rātou i mōhio noa ki te kawa, kua kore e taea te mōhio ki te reka—

40 Nā reira, i pahawa ake, nā, i whakawai te rēwera i a Arama, ā, nāna i kai te hua i rāhuitia ai, ā, i takahia te whakahaunga, nā konā riro ai ia ki raro i te hiahia o te rēwera, nā te mea i riro ia i te whakawainga.

41 Nā reira, ahau, te Ariki te Atua, i mea ai kia peia atu ia ki waho atu i te Kāri o Erene, i tōku aroaro, he mea nā tana hara, nā konā mate wairua ia, koia te mate tuatahi, ko taua matenga anō te matenga whakamutunga, koia he mea wairua, e whakapuakina ai ki runga i te hunga whakarihariha ina kī ai au: E wehe, e koutou te hunga kangaia.

42 Engari, nana, ko taku kupu tēnei ki a koutou, nāku, nā te Ariki te Atua, i hoatu ki a Arama me ōna uri, kia kaua rātou e mate e rite ana ki te matenga o te tīnana, tae rawa ki tāku, tā te Ariki te Atua, tono atu i ngā anahera ki te whakapuaki ki a rātou i te rīpenetātanga me te whakaoranga, mā roto i te whakapono ki runga i te ingoa o tāku Tama Kotahi Anake.

43 Ā, pēnei tāku, tā te Ariki te Atua, whakatau ki te tangata ngā rā poropeihana—nā, mā tana mate māori e mairangatia ake ki roto i te oranga mutunga kore me te oranga tonutanga, ko te hunga katoa e whakapono ai;

44 Ā, ko te hunga kāore nei e whakapono ana ki te pāpunitanga tonutanga; nā te mea e kore nei rātou e hokona i tō rātou takanga ā-wairua, nā te mea kāore rātou e rīpenetā;

45 Nā te mea e nui ake ana tō rātou aroha ki te pōuritanga i tō rātou mō te māramatanga, ā, ka utua rātou e te mea i whakarongo ai rātou.

46 Engari nana, ko taku kupu tēnei ki a koutou, nā, kua hokona ngā tamariki nonohi mai i te tūāpapa o te ao mā roto i tōku Tama Kotahi Anake;

47 Nā reira, kāore e taea e rātou te hara, nā te mea kāore e hoatu ana te mana ki a Hātana kia whakawai i ngā tamariki nonohi, kia mōhio ai rātou ki te pai me te kino i tōku aroaro;

48 Nā te mea kua hoatu ki a rātou e rite ana ki tāku i pai ai, e rite ana ki tāku i āhuareka ai, kia meatia ngā mea nunui i te ringa o ō rātou tūpuna.

49 Ā, anō, ko taku kupu tēnei ki a koutou, nā, ko te hunga katoa e whai mātauranga ana, kīhai au i whakahau kia rīpenetā?

50 Ā, ko te tangata kāore ōna māramatanga, me waiho kia meatia e au te mea kua oti nei te tuhituhi. Ināianei ā, kāore aku whakapuakitanga atu anō ki a koutou i tēnei wā. Āmine.