1. Ko te kupu me te whakaaro o te Ariki mo te taha ki te Puni o Iharaira i o ratou haerenga ki te Hauauru.

2. Meinga te hunga o te Hahi o Ihu Karaiti o te Hunga Tapu o nga Ra o Muri nei, me nga mea e haere tahi ana i a ratou, kia whakaritea i roto i nga ropu, me te kawenata me te kupu whakaari kia puritia nga whakahaunga a te Ariki, a to tatou Atua.

3. Meinga nga ropu i whakaritea kia whai kapene o nga rau, kapene o nga rima tekau, me nga kapene o nga tekau, me tetahi tumuaki me nga kaunihera ki o ratou whakaupoko, i raro i te whakahaere, me te tohutohu o nga Apotoro Tekau-ma-rua.

4. A ko ta tatou kawenata tenei, ka haere tatou i roto i nga huarahi katoa o te Ariki.

5. Meinga ia ropu, ia ropu kia whakawhiwhi i a ratou ano ki nga hoiho me nga kau, ki nga wakena, ki nga kai, ki nga kakahu me nga mea tika katoa mo te haere e taea ana e ratou.

6. A ina rite nga ropu me haere atu ratou i runga i to ratou kaha ki te whakariterite mo nga mea e noho ana.

7. Meinga nga kapene me nga tumuaki o ia ropu e whakariterite tokohia nga mea e kaha ana ki te haere a te waru (spring); me te whiriwhiri i etahi tangata ahua tokomaha, nga tangata ora, me nga tangata matau hei mau i nga hohio mahi, nga kau mahi, nga purapura, me nga mea ngaki whenua, kia haere ki te whakariterite maara hei whakato purapura a te waru.

8. A ko ia ropu me rite tonu nga wahanga me nga wehewehenga o nga taonga, i te maunga atu i nga rawa-kore, i nga pouaru, me nga pani, me nga hapu o nga mea kua karangatia kia haere ki te whawhai, kia kore e puta ake te tangi o nga pouaru me nga pani ki nga taringa o te Ariki he kai whakahe i tenei iwi.

9. Meinga nga ropu kia hanga whare, kia hanga maara hei whakatupu i nga kereene, ma te hunga e mahue i muri i tenei wa, a ko te whakaaro tenei o te Ariki mo te taha ki tona iwi.

10. A ko nga tangata katoa me whakapau i o ratou kaha me o ratou taonga kia whakanekehia tenei iwi te wahi e whakatungia e te Ariki he Takiwa o Hiona;

11. A ki te meatia tenei e koutou i runga i te ngakau ma, i roto ano i te pono, ka manaakitia koutou; ka manaakitia i roto i o koutou kahui, i a koutou kararehe, i a koutou maara, i o koutou whare, me o koutou hapu.

12. Meinga aku pononga a Etera T. Penehana me Eratuha No hei whakatu i tetahi ropu.

13. A ma aku pononga, ma Orihana Parata raua ko Wiriwha Wuruwha e whakatu i tetahi ropu.

14. A ma aku pononga, ma Amaha Raimana me Hori A. Mete e whakatu i tetahi ropu;

15. A me whakarite he tumuaki, me nga kapene, mo nga rau, mo nga rima tekau me nga tekau,

16. A meinga ma aku pononga kua whakaritea nei, e haere e whakaako i tenei whakaaro ki te Hunga Tapu, kia noho rite ai ratou mo te haere ki te whenua o te rangimarie.

17. Haere i tou ara a mahia taku i korero ai ki a koe, aua e wehi i ou hoa riri; no te mea e kore ratou e whai kaha ki te whakamutu i taku mahi.

18. Ka hokona a Hiona i taku wa e rite ai,

19. Ki te anga tetahi tangata ki te rapu ki te hanga i a ia ano, a e kore e rapu i aku tohutohu, e kore ia e kaha, a ka whakakitea atu tona he.

20. Kia pupuri i o koutou kupu whakaari tetahi ki tetahi, a kaua e hiahia ki nga mea a tou teina.

21. Kia mawehe mai koutou i te kino, me te whakahua noa i te ingoa o te Ariki, no te mea ko ahau te Ariki, to koutou Atua, ara te Atua o o koutou matua, te Atua o Aperahama, o Ihaka, o Hakopa.

22. Ko ahau hoki ia nana i arahi atu i nga tamariki o Iharaira ki waho o te whenua o Ihipa, a e totoro atu i toku ringa i nga ra whakamutunga ki te whakaora i oku iwi i a Iharaira.

23. Whakamutua te tautohetohe tetahi ki tetahi, whakamutua te korero kino tetahi ki tetahi.

24. Whakamutua te haurangi, a meinga a koutou kupu kia whakapai tetahi i tetahi.

25. Ki te nama koe ki tou hoa, whakahokia taua nama au; a me he mea e kore koe e kaha ki te whakautu, me haere tika koe ki te korero ki tou hoa kei whakahe ia i a koe.

26. Ki te kitea e koe te mea a tou hoa i ngaro, matua haere ki te rapu ka hoatu taua mea ki a ia.

27. Kia kaha koe ki te tohu i au mea, kia meinga ai koe hei tuari whai whakaaro; no te mea he hoatutanga noatanga era na te Ariki, na tou Atua ki a koe, a ko koe tana tuari.

28. Ina hari koe whakamoemititia te Ariki ki te waiata, ki te whakatangitangi, ki te kanikani me nga inoi whakamoemiti me nga ohaohatanga.

29. Ina pouri koe me karanga ki te Ariki, tou Atua me te tono kia whakahari ai i o koutou wairua.

30. Aua e wehi i ou hoa riri, no te mea kei roto ratou i oku ringaringa, a ka meatia e ahau ki a ratou kia rite ki taku e pai ai.

31. Me whakamatau toku iwi i roto i nga mea katoa, kia rite ai ratou kia whiwhi ki te kororia kei a au mo ratou, ae ra, te kororia o Hiona, a ko ia e kore e pai kia whakatikaia, kahore ia i te rite mo toku kingitanga.

32. Meinga te tangata kuare kia ako i te matauranga i runga i te whakaitinga i a ia ano me te karangatanga ake ki te Ariki, ki tona Atua kia whakatuwheratia ai ona kanohi, kia kite ai ia, ona taringa kia tuwhera, kia rongo ai ia,

33. No te mea e tukuna atu toku Wairua ki roto ki te ao hei whakamarama i te hunga iti me te hunga mahaki, me te whakaheanga o te hunga Atua-kore.

34. Kua whakakahoretia koe me tou whakahinengaro e ou teina, ara e te iwi nana koe i pei atu ki waho;

35. Na, kei te haere mai te ra o to ratou whakangaromanga me nga ra o te pouritanga ano he wahine e hapu ana; a he nui to ratou pouritanga ki te kore ratou e hohoro te ripeneta; ae ra kia hohoro rawa.

36. No te mea kua whakamatea e ratou nga poropiti, a te hunga i tonoa ki a ratou, a kua whakahekea e ratou te toto hara-kore, e karanga ake ana i te whenua hei whakahe mo ratou;

37. No reira, aua e miharo ki enei mea, no te mea kahore koutou i te hara-kore; kahore ano koe i kaha hei mau ki toku kororia; engari ka kite koe me he mea ka u koe ki te pupuri i aku kupu katoa kua hoatu e ahau ki a koutou mai ano i nga ra o Arama ki a Aperahama, i a Aperahama ki a Mohi; a i a Mohi ki a Ihu Karaiti me ana Apotoro; a i a Ihu Karaiti me ana Apotoro ki a Hohepa Mete, taku i karanga ai he mea na aku anahera, aku pononga kai mahi; a he mea na toku ake reo i puta mai i nga rangi hei whakaputa mai i aku mahi,

38. Te turanga i whakatakotoria e ia, a e u tonu, a tangohia ana ia ki a au ake.

39. He tokomaha kua whakamiharo mo tona matenga, otira i tika ai kia hiiritia tana whakaaturanga ki ona toto, kia whakahonoretia ai ia, kia whakahengia ai hoki te hunga hara.

40. Kahore ano ranei ahau i whakaputa i a koutou i o koutou hoa riri, heoi ano ko te waihotanga o tetahi kai whakaatu mo toku ingoa ?

41. Na, whakarongo mai koutou e te iwi o taku Hahi; whakarongo ngatahi ano koutou e nga kaumatua; kua whiwhi koutou ki taku kingitanga.

42. Kia u ki te pupuri i aku whakahaunga katoa, ki te kore ka tau nga whakawakanga ki runga i a koutou, a ko reira hemo ai to koutou whakapono, a ka takahi o koutou hoa riri ki runga ki a koutou.—No reira heoi ano i tenei wa. Amine a amine.