Wāhanga 81
He whakakitenga mā roto i a Hōhepa Mete te Poropiti, ki Hairama, Ohaio, Maehe 15, 1832. Ka karangatia a Whererika T. Wiremu hei pirihi teitei, ā, hei kaunihera i roto i te Tumuakitanga o te Pirihitanga Teitei. Kei te kitea i roto i ngā tuhinga hītori, nā, i te wā i whiwhi ai i tēnei whakakitenga i te Maehe 1832, i karangatia a Tehi Karauhe ki te tūranga kaunihera ki a Hōhepa Mete i roto i te Tumuakitanga. Heoi anō, i te wā i kōtiti atu tana mahi i tā te mea e tika ana mō tana karangatanga, ka whakawhitihia atu taua karangatanga ki a Whererika T, Wiremu. Me whakaaro atu ki te whakakitenga (i puta i te Maehe 1832) hei hōkai whakamua ki te whakaritenga ōkawa o te Tumuakitanga Tuatahi, e karangatia rawatia ana mō te tūranga kaunihera i taua huinga, ā, e whakamāramahia ana te mana o taua karangatanga. I mahi a Teina Karauhe mō tētahi wā engari i hātepea atu ia i te Hāhi i te Tīhema 1832. I whakamanaia a Teina Wiremu ki taua tūranga i kōrerohia ake nei i te Maehe 18, 1833.
1–2, Ka puritia ngā kī o te kīngitanga i ngā wā katoa e te Tumuakitanga Tuatahi; 3–7, Ki te ū pono a Whererika T. Wiremu i roto i tana minitatanga, ka whai oranga tonutanga ia.
1 He pono, he pono tāku e mea atu nei ki a koe e taku pononga e Whererika T. Wiremu: Whakarongo ki te reo o te mea e kōrero ana, ki te kupu a te Ariki tōu Atua, ā, whakarongo mai ki te karangatanga kua karangatia nei koe, kia tū ai hei pirihi teitei i roto i taku hāhi, ā, hei kaunihera ki taku pononga a Hōhepa Mete, Tama.;
2 Kua hoatu nei ki a ia ngā kī o te kīngitanga, nō te Tumuakitanga o te Pirihitanga Teitei i ngā wā katoa:
3 Nō reira, he pono taku whakamiha ki a ia, ā, māku ia e manaaki me koe hoki, ki te mea kua pono koe i roto i ngā rūnanga, i roto i te tūranga kua whakataua ki a koe, e inoi ana i ngā wā katoa, ā-waha, i roto hoki i tōu ngākau, i mua, ā, i muri hoki i te tirohanga kanohi, i roto hoki i tō minitatanga ki te whakapuaki i te rongopai i te whenua o te hunga ora, ā, i waenganui i ō teina.
4 Ā, ka mea koe i te mea pai rawa atu ki ō hoa tangata i te mahinga i ēnei mea, ā, ka whakanuia te korōria o te mea ko ia tōu Ariki.
5 Nā reira, kia pono; e tū i te tūranga kua whakataua nei e au ki a koe; atawhaitia te hunga ngoikore, hāpaingia ake ngā ringaringa e werewere iho ki raro, ā, whakakahangia ngā turī ngoikore.
6 Ā, ki te ū koe tae atu ki te mutunga ka whiwhi koe ki tētahi karauna o te oranga mutunga kore, me te oranga tonutanga i roto i ngā wharenunui kua whakaritea nei e au i roto i te whare o tōku Matua.
7 Nana, titiro, koinei ngā kupu a te Arepa me te Omeka, ko Ihu Karaiti pū anō. Āmine.