Wāhanga 82
He whakakitenga i hoatu ai ki a Hōhepa Mete te Poropiti, ki Inipenehana, Takiwā o Tiakimana, Mītori, Aperira 26, 1832. I tētahi huinga pirihi teitei me ngā erata o te Hāhi. I taua rūnanga, i whakaaetia a Hōhepa Mete hei Tumuaki o te Piritanga Teitei, i whakamanaia ki taua tūranga i mua ki tētahi huihuinga mō ngā pirihi teitei, ngā erata, me ngā mema, ki Amahata, Ohaio, Hanuere 25, 1832 (tirohia te kowae upoko ki wāhanga 75). Kei te toai tēnei whakakitenga i ngā tohutohu i hoatu ai i tētahi whakakitenga o mua (wāhanga 78) hei whakarite i tētahi kamupene—e mōhiotia ana ko te United Firm (i raro i tā Hōhepa Mete whakahaere, ka kuhuna atu te kupu “ritenga” mō te kupu “kamupene”)—hei whakahaere i ngā mahi hokohoko me ngā mahi tā o te Hāhi.
1–4, Me ka nui te hoatutanga, ka nui te tononga; 5–7, Kei te whakahaere te pōuritanga i te ao; 8–13, Kua herea te Ariki ina meatia e tātou Tāna e kī ai; 14–18, Me tupu ake te ātaahua me te tapu o Hīona; 19–24, Me rapu ngā tāngata katoa i te mea pai o tana kiritata.
1 He pono, he pono, tāku e mea atu nei ki a koutou, nā, ki te mea kua murua e koutou ō koutou hara tētahi i tētahi, koia anō ahau, te Ariki e muru ai i ō koutou.
2 Hei aha koa, kei waenganui i a koutou te hunga kua tino hara rawa; āe rā, kua hara pū anō koutou katoa; engari he pono tāku e mea atu nei ki a koutou, kia tūpato i ngā wā e haere ake nei, ā, kaua e hara, kei taka iho ngā whakawākanga mamae ki runga ki ō koutou māhunga.
3 Nō te mea ko te tangata kua nui te hoatutanga ka nui te tononga; ā, ka whiwhi te tangata e hara ai ki te māramatanga nui ki te whakahēanga nui ake.
4 Kei te karanga mai koutou i runga i tōku ingoa mō ngā whakakitenga, ā, kei te hoatu ērā mea e au ki a koutou; ā, ki te mea ki te kore koutou e pupuri i aku kīanga, e hoatu nei e au ki a koutou, ka meinga koutou hei kaihara; ā, ko te tika me te whakawākanga te utu kua paheko nei ki taku ture.
5 Nō reira, ko tāku ki tētahi tāku ki te katoa: Kia mataara, nā te mea kei te whakahorapa haere te hoariri i tana rangatiratanga, ā, kei te whakahaere te pōuritanga;
6 Ā, kei te tahuna te riri o te Atua ki ngā tāngata o te whenua; ā, kāore tētahi e mahi pai ana, nā te mea kua kōtiti kē atu te katoa i te huarahi.
7 Ināianei ā, he pono tāku e mea atu nei ki a koutou, kāore au, te Ariki, e whakatakoto iho i tētahi hara ki a koe; me haere i runga i ō koutou huarahi, ā, kaua e hara anō; engari ka hoki atu ngā hara o mua ki runga i te wairua e hara ana, e ai tā te Ariki tō koutou Atua.
8 Hei āpiti anō, ko taku kupu tēnei e mea atu nei ki a koutou, kei te hoatu au i tētahi whakahaunga hou ki a koutou, nā, e āhei ana i a koutou te mārama ki tāku e pai ai e pā ana ki a koutou;
9 Kia kī pēnei kē rānei, kei te hoatu e au he tohutohu hei whakahaere i a koutou mahi i tōku aroaro, kia tahuri atu ki a koutou mō tō koutou whakaoranga.
10 Kua herea au, te Ariki ina meatia e koutou tāku i kī ai; engari ki te kore e meatia e koutou tāku i kī ai, kāore ō koutou whakaari.
11 Nō reira, he pono tāku e mea atu nei ki a koutou, nā, he tika pū anō mō aku pononga a Eruera Pātiri rātou ko Nuera K. Witini, ko A. Hirini Kiripeti, ko Hirini Rikitana, ko taku pononga a Hōhepa Mete, ko Hoani Witima me Oriwa Kautere, ko W. W. Wherapa me Mātini Hārihi kia herea kotahi, ā, kia kawenata tē taea te whati e te hara, ki te kore te whakawākanga e whai tata mai, i roto i ō koutou mahi kaitiaki—
12 Kia whakahaerehia ngā āhuatanga o te hunga rawakore, ā, ngā mea katoa e pā ana ki te pīhopatanga i te whenua o Hīona, i roto hoki i te whenua o Katarana;
13 Nā, kua whakatapua e au te whenua o Katarana i tōku ake anō wā hei painga mō te hunga tapu o te Runga Rawa, ā, hei pou ā-rohe ki Hīona.
14 Nā, me tupu haere a Hīona i runga i te ātaahuatanga, i runga i te tapu; me whakawhānui ōna rohe; me whakakaha ōna pou; āe rā, he pono tāku e mea atu nei ki a koutou, me tū ake a Hīona, ā, me whakamau ōna kākahu ātaahua.
15 Nō reira, kei te hoatu e au tēnei whakahaunga ki a koutou, kia herea koutou e koutou anō i runga i tēnei kawenata, ā, ka meatia kia rite ki ngā ture o te Ariki.
16 Nana, he whai mātauranga tēnei i roto i ahau hei painga mō koutou.
17 Ā, me ōrite koutou, kia kī pēnei kē, me ōrite ā koutou kereme ki ngā whenua, hei painga mō te whakahaeretanga i ngā āhuatanga o ō koutou mahi kaitiaki, ia tangata, ia tangata e rite ana ki ōna hiahia me ōna mea e hapa ana, ki te mea he tika ōna hiahia—
18 Ā, koinei katoa hei painga mō te hāhi o te atua ora, nā, e taea ana e ngā tāngata katoa te whakatipu i ōna pūkenga, kia rapu anō ngā tāngata katoa i ētahi atu pūkenga, āe rā, ka whakarea kotahi rau pū anō, kia makaia iho ki roto i te pātaka a te Ariki, kia meinga hei rawa noa o te hāhi katoa—
19 E kimi ana ngā tāngata katoa i te mea pai mō tana kiritata, ā, e meatia ana ngā mea katoa i runga i te karu kotahi e hāngai atu ana ki te korōria o te Atua.
20 Kua whakataua tēnei ritenga hei ritenga mau tonu ki a koutou, ā, ki ō koutou kaiwhakakapi, i te mea kāore ō koutou hara.
21 Ā, ko te wairua e hara ai ki tēnei kawenata, ā, e whakapakeke ai i tōna ngākau ki tērā, ka meatia e rite ana ki ngā ture o taku hāhi, ā, ka tukuna atu ki ngā whakamamaetanga o Hātana tae noa ki te rā o te hokonga.
22 Ināianei ā, he pono tāku e mea atu nei ki a koutou, ā, he whai mātauranga tēnei, whakahoahoa atu koutou ki te mamona o te hē, ā, kua kore rātou e whakangaro i a koutou.
23 Waiho atu te whakawākanga, nā te mea nōku tēnā, ā, māku e whakautu. Kia tau te rangimārie ki runga ki a koutou; kia noho tonu aku manaakitanga ki a koutou.
24 Nā, nōu anō te kīngitanga, ā, ka pērā mō āke tonu atu, ki te kore koutou e taka i tō koutou ū. Koia anō. Āmine.