Wāhanga 85
He whakakitenga mā roto i a Hōhepa Mete te Poropiti, ki Katarana, Ohaio, Noema 27, 1832. He kaponga tēnei i tētahi reta a te Poropiti ki a Wiremu W. Wherapa, i noho ai ki Inipenehana, Mītori. E whakautua ana e ia ngā pātai mō ngā Hunga Tapu i hūnuku atu ai ki Hīona, engari kīhai i whai i te whakahaunga kia whakatapua ō rātou mea, ā, nā konei kīhai i whiwhi i ō rātou taonga tuku iho e rite ana ki te ritenga i whakapūmauhia i roto i te Hāhi.
1–5, Me whiwhi ngā taonga tuku iho i Hīona mā runga i te whakatapu; 6–12, Ka hoatu e tētahi mea mārohirohi me tētahi mea kaha i ngā taonga tuku iho ki ngā Hunga Tapu i Hīona.
1 Nō te Karaka a te Ariki te haepapa, te mea nāna i tohu, kia puritia tana hītori, ā, he tuhinga hāhi whānui mō ngā mea katoa e heipū ake ai i Hīona, ā, mō te hunga katoa hoki e whakatapu i ō rātou rawa, ā, e whiwhi ana hoki ki ngā taonga tuku iho i te pīhopa i raro i te ture;
2 Ā, mō te āhuatanga o ō rātou oranga, tō rātou whakapono, me ngā mahinga; mō te hunga whakaparahako, i whakaparahako ai nō muri iho i te whiwhinga ki ō rātoun taonga tuku iho.
3 He tauaro tēnā ki te hiahia me te whakahaunga a te Atua kia rehitatia i te taha o ngā tāngata a te Atua ngā ingoa o te hunga e kore nei e whiwhi i ō rātou taonga tuku iho i runga i te whakatapunga, e hāngai ana ki te ture, kua homai e ia, kia whakatekauhia tana iwi, hei whakatakatū i a rātou mō te rā o te utu me te tahunga.
4 Me kaua rānei e pupuri i ō rātou whakapapa, kia kaua rānei e kitea i runga i ngā tuhinga katoa, i ngā hītori rānei o te hāhi.
5 Kua kore e kitea ō rātou ingoa, ngā ingoa rānei o ō rātou tūpuna, ngā ingoa rānei o ngā tamariki kua tuhituhia iho nei ki roto i te pukapuka ture o te Atua, e ai tā te Ariki o ngā Mano.
6 Āe rā, pēnei tā te reo kōhimuhimu ngāwari, e kōhimuhimutia ana, e werowerohia ana ki roto i ngā mea katoa, ā, he rite tonu tana mea kia tūwiriwiri ōku wheua i a ia e puta mai ana, e mea ana:
7 Ā, ka pahawa ake, māku, mā te Ariki te Atua, tētahi mea mārohirohi, mea kaha e tuku, e puritia ana te hepeta o te mana i tōna ringa, e kākahuria ana ki te māramatanga hei uhi, e whakapuaki ai tōna māngai i ngā kupu; i ōna whekau e ai hei mātāpuna o te pono, kia whakaritea te whare o te Atua, me te whakariterite i ngā rota ngā taonga tuku iho o te hunga tapu e kitea nei ō rātou ingoa, me ngā ingoa o ō rātou matua, me ā rātou tamariki, kua rehitatia ki roto i te pukapuka ture a te Atua;
8 I taua tangata, i karangatia ake nei, ā, i whakatūria ake nei e te Atua, e toro atu ana i tōna ringa kia tau ai te waka o te Atua, ka hinga iho ia i te tokotoko o te mate, e rite ana ki tētahi rākau kua patua ki te tokotoko hihiko o te uira.
9 Ā, kāore e kitea e te hunga katoa kāore i tuhia i roto i te pukapuka maumaharatanga tētahi taonga tuku iho i taua rā, engari ka heua iho ki raro, ā, ka whakataua ō rātou wāhi ki waenganui i te hunga whakapono kore, i reira te auētanga me te tētē niho.
10 Kāore au i te kōrero ake nei i ēnei mea mōku ake; nō reira, e ai tā te Ariki e kōrero ai, māna hoki e whakatutuki.
11 Ā, e kore te hunga ehara nei nō te Tohungatanga Teitei, te hunga e kore nei e kitea ana ō rātou ingoa i roto i te pukapuka ture, kua kitea rānei he mea whakaparahako, kua hātepea atu rānei i te hāhi, me te tohungatanga iti iho rānei, i ngā mema rānei, hei taua rā e kore rātou e kite i tētahi taonga tuku iho i waenganui i te hunga tapu o te Runga Rawa;
12 Nō reira, ka meatia atu ki a rātou pērā i ngā tamariki a te pirihi, e kitea ai i roto i te upoko tuarua, te whiti ono tekau mā tahi, mā rua hoki o Etera.