Wāhanga 28
He whakakitenga mā roto i a Hōhepa Mete te Poropiti ki a Oriwa Kautere, ki Wheiete, Niu Ioka, Hepetema 1830. Ko Hairama Peeti, tētahi mema o te Hāhi, i a ia tētahi kōhatu, i kī ai ia kua whiwhi whakakitenga ia mā runga i tana āwhina e pā ana ki te hanganga ake o Hīona me te ritenga o te Hāhi. I tinihangatia ētahi mema e ētahi o ēnei kōrero, i pērātia anōtia a Oriwa Kautere. Ka inoi kaha ake te Poropiti ki te Ariki e pā ana ki tēnei take, kātahi ka puta mai tēnei whakakitenga.
1–7, Kei a Hōhepa Mete ngā kī mō ngā mea ngaro, ko ia anake te mea e whiwhi whakakitenga mō te Hāhi; 8–10, Ka kauhau atu a Oriwa Kautere ki ngā Rāmana; 11–16, I tinihangatia a Hairama Peeti e Hātana, ā, i tuku whakakitenga teka ki a ia.
1 Nana, ko taku kupu tēnei ki a koe e Oriwa, nā, ka hoatu ki a koe kia rangona ai koe e te hāhi i roto i ngā mea katoa e whakaako ai koe ki a rātou mā runga i te Kaiwhakaāio, e pā ana ki ngā whakakitenga me ngā whakahaunga kua hoatu nei e au.
2 Engari, nana, he pono, he pono, tāku e mea atu nei ki a koe, kua kore e whakataua tētahi kia whiwhi ai i ngā whakahaunga me ngā whakakitenga i roto i tēnei hāhi hāunga ko taku pononga a Hōhepa Mete, Tama., nā te mea e whiwhi ana ia ki aua mea pērā i a Mohi.
3 Ā, me ngohengohe koe ki ngā mea e hoatu ai e au ki a ia, pērā pū anō i a Arona, ki te whakapuaki pono i ngā whakahaunga me ngā whakakitenga, i runga i te kaha me te mana ki te hāhi.
4 Ā, mehemea ka ārahina noatia i tētahi wā e te Kaiwhakaāio ki te kōrero, ki te whakaako rānei, i ngā wā katoa rānei mā runga i te whakahau ki te hāhi, māu anō e mahi.
5 Engari kua kore koe e tuhituhi mā runga i te whakahaunga, engari mā runga i te mātauranga;
6 Ā, kua kore koe e whakahau i te mea kei tōu upoko, ā, kei te upoko o te hāhi;
7 Nā te mea kua hoatu e ahau ngā kī mō ngā mea ngaro, me ngā whakakitenga kua hīritia ake, tae noa ki te wā e whakatau ai au i tētahi atu hei kaiwhakakapi mōna.
8 Ināianei ā, nana, ko taku kupu tēnei ki a koe, nā, ka haere atu koe ki ngā Rāmana, ā, ka kauhau atu i taku rongopai ki a rātou; ā, ki te whiwhi rātou i aku akoranga māu taku hāhi e whakapūmau ki waenganui i a rātou; ā, ka whiwhi whakakitenga koe, engari kaua e tuhituhia e koe mā runga i te whakahaunga.
9 Ināianei ā, nana, ko taku kupu tēnei ki a koe, kāore anō kia whakakitea noatia, ā, kāore e mōhiotia ana e tētahi ki hea whakatūria ai te pā o Hīona, engari ka tukuna whai muri iho. Nana, ko taku kupu tēnei ki a koe, nā, ka pērātia i ngā rohe e tata ana ki ngā Rāmana.
10 Kaua koe e wehe atu i tēnei wāhi kia mutu rā anō te huihuinga whānui o te hāhi; ā, ka whakataua taku pononga a Hōhepa hei tumuaki mō runga i te huihuinga whānui e te reo o te huihuinga, ā, ka kōrerohia e koe ngā kupu e kōrerohia nei e ia ki a koe.
11 Hei āpiti anō, māu tō teina a Hairama Peeti e kawe, ā, i waenganui i a kōrua anake, ā, me kī atu ki a ia ehara nōku ērā mea o te kōhatu i tuhia nei e ia, ā, nō Hātana kē ia i tinihanga;
12 Nā te mea, nana, kāore i whakataua atu ēnei mea ki a ia, e kore rānei e whakataua tētahi mea ki tētahi nō tēnei hāhi e tauaro ana ki ngā kawenata o te hāhi.
13 E tika ana kia mahia ngā mea katoa i runga i te tika, ā, i runga i te whakaaetanga whānui i te hāhi, mā te inoi whakapono.
14 Ā, māu anō e āwhina ki te whakarite i ēnei mea katoa, e rite ana ki ngā kawenata o te hāhi, i mua i tō haerenga atu ki waenganui i ngā Rāmana.
15 Ā, ka hoatu ki a koe mai i te wā e haere ai koe, tae noa atu ki te wā e hoki mai ai koe, he aha tāu e mahi ai.
16 Ā, me tūwhera koe i tōu māngai i ngā wā katoa, e whakapuaki ana i taku rongopai i runga i te reo hari. Āmine.