Wāhanga 23
He terenga mō ngā whakakitenga e rima mā roto i a Hōhepa Mete te Poropiti, ki Maniheta, Niu Ioka, Aperira 1830, ki a Oriwa Kautere rātou ko Hairama Mete, ko Hamuera H. Mete, ko Hōhepa Mete Matua., me Hōhepa Naiti Matua. He mea tuku nā runga i te tino hiahia a te tokorima kua whakaingoatia ake nei kia mōhio ai rātou ki ā rātou ake mahi, ka inoi ake te Poropiti ki te Ariki, ā, ka whiwhi whakakitenga ia mō tēnā tangata, tēnā tangata.
1–7, Ka karangatia ēnei apataki tōmua ki te kauhau, akiaki, me te whakakaha i te Hāhi.
1 Nana, kei te kōrero atu au ki a koe, e Oriwa, i ētahi kupu ruarua. Nana, kua manaakitia koe, ā, kāore koe e noho ana i raro i tētahi whakahēanga. Engari kia tūpato mō te whakapehapeha, kei kuhu atu koe ki roto i te whakawainga.
2 Whakamōhiotia atu tō karangatanga ki te hāhi, i mua hoki i te ao, kātahi ka whakatūwheratia ake tō ngākau ki te kauhau i te pono haere ake nei mō āke tonu atu. Āmine.
3 Nana, kei te kōrero atu au ki a koe, e Hairama, i ētahi kupu ruarua; nā te mea kāore hoki koe e noho ana i raro i tētahi whakahēanga, ā, kua whakatūwheratia ake tō ngākau, ā, kua wetekina tō arero; ā, ko te akiaki tō karangatanga, kia honu tonu tō whakakaha i te hāhi. Nā reira ko tāu he mahi ki te hāhi mō āke tonu atu, ā, i pēnei nā tō whānau. Āmine.
4 Nana, kei te kōrero atu au i ētahi kupu ruarua ki a koe, e Hamuera; nā te mea kāore hoki koe e noho ana i raro i tētahi whakahēanga, ā, ko te akiaki tō karangatanga, ā, ki te whakakaha hoki i te hāhi; ā, kāore anō koe kia karangatia ki te kauhau atu i te kupu i mua i te ao. Āmine.
5 Nana, kei te kōrero atu au i ētahi kupu ruarua ki a koe, e Hōhepa; nā te mea kāore hoki koe e noho ana i raro i tētahi whakahēanga, ā, ko te akiaki anō hoki tō karangatanga, ki te whakakaha hoki i te hāhi; ā, koinei tō mahi haere ake nei mō āke tonu atu. Āmine.
6 Nana, kei te whakakite atu au ki a koe, e Hōhepa Naiti, nā runga i ēnei kupu, nā, me amo ake e koe tō rīpeka, mā konā inoi ā-māngai i mua i te ao, i muri hoki i te tirohanga kanohi, ā, i roto i tō whānau, i waenganui i ōu hoa, i ngā wāhi katoa.
7 Ā, nana, ko tō mahi he whakahono atu ki te hāhi pono, me te tuku i tō reo kia hono tonu te akiaki, kia riro i a koe te utu o te kaimahi. Āmine.