Wāhanga 39
He whakakitenga mā roto i a Hōhepa Mete te Poropiti ki a Hēmi Kowira, ki Wheiete, Niu Ioka, Hānuere 5, 1831. He minita Metoriti a Hēmi Kowira i mua mō ngā tau whā tekau, ka kawenata ia ki te Ariki, nā, ka whakarongo ia ki ngā whakahau katoa e tukua ai ki a ia e te Ariki mā roto i a Hōhepa te Poropiti.
1–4, He mana tō te Hunga Tapu kia meinga hei tama nā te Atua; 5–6, He rite te whiwhi i te rongopai ki te whiwhi i te Karaiti; 7–14, Ka whakahaua a Hēmi Kowira kia rumakina, ā, kia mahi i roto i te māra waina o te Ariki; 15–21, Me kauhau ngā pononga a te Ariki i te rongopai i mua i te Haerenga Tuaruatanga Mai; 22–24, Ka whakahuihuia te hunga e whiwhi nei i te rongopai i ngā wā mau tonu.
1 Whakarongo, ā, kia rongo koe i te reo o te mea nō te mau tonu ki te mau tonu, ko te Ahau Nui Rawa, arā, ko Ihu Karaiti pū anō—
2 Ko te māramatanga me te oranga o te ao; he māramatanga e tiahoaho mai nā i te pōuritanga, ā, kāore e mātauria e te pōuritanga;
3 Ko taua mea anō i haere mai ai i te weheruatanga o ngā wā ki ōku ake, engari kīhai ōku ake i manako mai ki ahau;
4 Engari kua hoatu e au he mana ki te hunga katoa i whiwhi mai ki ahau kia meinga ai hei tama nāku; ā, pērā anō ka hoatu e au he mana ki te hunga katoa e whiwhi ai ki ahau kia meinga ai hei tama nāku.
5 He pono, he pono tāku e mea atu nei ki a koe, ko te tangata e whiwhi nei i taku rongopai, ka whiwhi ia i ahau; ā, ko te tangata e kore nei e whiwhi i taku rongopai e kore hoki e whiwhi i ahau.
6 Ā, koinei taku rongopai—te rīpenetātanga me te rumakitanga ki te wai, kātahi ka tau mai te rumakitanga o te ahi me te Wairua Tapu, arā, ko te Kaiwhakaāio pū anō, e huraina ake ngā mea katoa, e whakaako hoki i ngā mea rangimārie o te kīngitanga.
7 Ināianei ā, nana, ko taku kupu tēnei ki a koe, e taku pononga e Hēmi, kua tirohia e ahau āu mahinga, ā, kei te mōhio au ki a koe.
8 Ā, he pono tāku ki a koe, kei te tōtika tō ngākau ki a au ināianei; ā, nana, nāku ngā manaakitanga nui i whakatau iho ki runga ki tōu māhunga;
9 Hei aha koa, kua kite koe i ngā pōuritanga nui, nā te mea kua whakaparahako koe i ahau i ngā wā maha he mea nā te whakapehapeha me ngā raruraru o te ao.
10 Engari, nana, kua tae mai ngā rā whakaputanga, ki te whakarongo mai koe ki taku reo, e mea atu nei ki a koe: Mātika, ā, kia rumakina, horoia atu ōu hara, e karanga ake ana i taku ingoa, kātahi koe ka whiwhi i tōku Wairua, me tētahi manaakitanga nui atu i ngā manaakitanga kua kitea nei e koe.
11 Ā, ki te pēnei koe, kua whakarite au i a koe mō tētahi mahi nui ake. Māu te rongopai e kauhau atu, kua tukuna atu e au i ēnei rangi whakamutunga, te kawenata kua tukuna atu e au ki te whakahoki mai i tōku iwi, ko rātou nei nō te whare o Iharaira.
12 Ā, ka pahawa ake, nā, ka tau iho te mana ki runga ki a koe; ka nui tō whakapono, ā, ka piri au ki a koe, ā, ka haere atu au ki mua i tō mata.
13 Kua karangatia koe ki te mahi i taku māra waina, ki te hanga ake i taku hāhi, me te whakaputa mai i a Hīona, kia hari ai i runga i ngā puke, ā, kia whaiora.
14 Nana, he pono, he pono tāku e mea atu nei ki a koe, kāore koe i karangatia kia haere atu ki ngā whenua whakaterāwhiti, engari kua karangatia koe kia haere atu ki Ohaio.
15 Ā, ki te mea ka whakahuihui tōku iwi i a rātou anō ki Ohaio, kua whakapātakahia e au tētahi manaakitanga, ā, he mea kāore anō kia kitea i waenganui i ngā tamariki a te tangata, ā, ka maringihia iho ki runga i ō rātou māhunga. Ā, hei reira haere atu ai ngā tāngata ki ngā iwi katoa.
16 Nana, he pono, he pono tāku e mea atu nei ki a koe, nā, e karanga ake ana te iwi i Ohaio ki ahau i runga i te whakapono nui, e whakaaro ana ka pupuri au i tōku ringa i runga i te whakawākanga ki runga i ngā iwi katoa, engari kāore e taea ana e au te whakakore i taku kupu.
17 Nā reira e mahi i runga i te whakapaunga o tō kaha, ā, karangatia mai he kaimahi ki roto i tōku māra waina, kia kokoti ai mō te wā whakamutunga.
18 Ā, ki te mea ka rīpenetā rātou me te whiwhi i te raneatanga o taku rongopai, ā, ka whakatapua, māku taku ringa e pupuri i runga i te whakawākanga.
19 Nā reira, haere atu, e karanga ake ana i runga i te reo kaha, e mea ana: Kua tata mai te kīngitanga; e karangahia ana: Ohana! kia whakapaingia te ingoa o te Atua Runga Rawa.
20 Haere atu me te rumaki ki te wai, e whakarite ana i te huarahi i mua i tōku mata mō te wā o taku haerenga mai;
21 Nā te mea kua tae mai te wā; kāore tētahi tangata e mōhio ana ki te rā, ki te hāora rānei; engari kāore e kore ka tae mai.
22 Ā, ko te tangata e whiwhi nei i ēnei mea ka whiwhi i ahau; ā, ka whakahuihui mai ki a au i ngā wā mutunga kore.
23 Hei āpiti anō, ka pahawa ake, nā, me whakapā ō ringaringa ki runga i te hunga katoa e rumaki nei koe ki te wai, ā, ka whiwhi rātou i te Wairua Tapu, ā, ka titiro whakamua atu mō ngā tohu o taku haerenga mai, ā, ka mōhio ki ahau.
24 Nana, kei te haere wawe mai au. Koia anō. Āmine.