1. Ina puta mai te Kai-whakaora ka kite tatou i a ia, ko tona ahua tonu ano i tenei wa. Ka kite tatou he tangata tonu ia penei ano i a tatou nei;

2. A ko tenei nohoanga tahitanga i konei nei. Ka mau tonu ano i reira, heoi ano ka tapiritia mai ki te kororia mau tonu, kahore nei i a tatou inaianei.

3. (Hoani 14: 23): Ko te putanga mai o te Matua raua ko te Tama, e korerotia ra i roto i taua rarangi, he putanga a tinanatanga mai no raua; na ko te whakaaro e noho ai te Matua raua ko te Tama i roto i te ngakau o te tangata, he horihori, he whakaaro noa tera na nga wehewehe o nga hahi.

4. Na, he whakautu i te patai, “Kahore ranei to te Atua taima, to te anahera taima, to te Poropiti taima, to te tangata taima, i te rite ki nga tikanga o te ao, kei reira nei tena o ratou e noho ana?”

5. Taku whakutu, Ae. Engari kahore tetahi anahera e minita ki tenei ao ki te mea e hara ia i tenei ao.

6. Kahore hoki nga anahera e noho ana ki runga i tenei ao penei me tenei.

7. Engari e noho ana ratou i te aroaro o te Atua i runga i tetahi ao tona rite ano he moana karaihe, he kapura, kei reira hoki e whakaaturia ana nga mea katoa mo to ratou whakakororiatanga—nga mea o mua, o naianei, o nga wa hoki e heke iho nei, kei mua tonu hoki ratou i te aroaro o te Ariki.

8. Ko te wahi e nohoia ana e te Atua he Urumi he Tumime tino nui rawa.

9. Ko tenei ao, ina tae ki tona ahua e whakatapua ai, e mate kore ai, ka meinga ano he karaihe tona rite, ka meinga hei Urumi hei Tumime ki te hunga e noho ana i runga, ma reira hoki e whakaatu ki te hunga e noho ana i reira nga mea katoa o te kingitanga i raro iho i a ia, ara o nga kingitanga katoa kei raro iho i a ratou, a hei reira tenei ao riro ai i a te Karaiti.

10. Ko reira te kohatu ma e korerotia na i te 2 o nga upoko o nga Whakakitenga, te 17 o nga rarangi, meinga ai hei Urumi hei Tumime ki ia tangata, ki ia tangata e whiwhi ai ki tetahi, ma reira hoki e whakaatu ki a ratou nga mea katoa o nga kingitanga, ae, o nga kingitanga katoa kei runga ake;

11. E hoatu hoki he kohatu ma ki ia tangata ki ia tangata o te hunga e haere mai ana ki te Tikitiki-o-rangi (Celestial), kua oti ano he ingoa hou te tuhituhi ki runga, kahore nei e mohiotia, e tetahi ko te tangata anake e whakawhiwhia ai. Ko te ingoa hou te kupu e tuwhera ai te tatau.

12. Ka poropiti ahau, i roto i te ingoa o te Ariki, o te Atua, ko te timatanga o nga raruraru e takina iho ai te whakahekenga toto i mua atu i te haerenga mai o te Tama a te Tangata, ka timata i Kararaina Tonga.

13. Era e puta ake i roto i te raruraru mo nga taurekareka. He reo nana tenei i whakaatu mai ki a au, i a au e inoi marire ana mo runga i taua take i te 25 o nga ra o Tihema, 1832.

14. I tetahi wa i te ata i inoi ahau kia mohio ki te wa e haere mai ai te Tama a te Tangata, a rongo ana ahau i tetahi reo e whakahua ana i enei kupu:

15. “E Hohepa, e taku tama, me he mea koe ki te ora tonu taea noatia te waru tekau ma rimao o tau, ko reira ka kite tonu koe i te mata o te Tama a te Tangata: no reira waiho tenei hei whakautu mo tou patai, kati te whakararuraru i a au mo tenei mea.”

16. Na mahue penei iho ana ahau, te mohiotia e ahau me he mea tenei haerenga mai ko te timatanga ranei o te kotahi mano tau, he putanga mai ano ranei nona a mua mai o taua wa, a tera ranei ko ahau ka mate, katahi ka kite i tona mata.

17. Ki taku mahara e kore te Tama a te Tangata e haere mai i mua mai o taua wa.

18. Ahakoa he aha nga tikanga o te matauranga e riro mai i a tatau i tenei oranga, ko te ara ake ano me tatou i te aranga mai i te mate.

19. A me he mea tetahi tangata ki te nui ake te whiwhi ki te matauranga, i roto i tenei oranga he mea na tona uaua, na tona ngohengohe ranei i tetahi atu tangata, waihoki ka pera ano tona nukunga ake i te ao e haere mai nei.

20. Tera tetahi ture, i hangaia hei ture tuturu i te rangi i mua atu ano o te orokohanganga o te ao, a ko nga manaakitanga katoa ka ahu mai ma roto i te whakaritenga i a ia;

21. Na, ki te whiwhi tatou ki tetahi manaakitanga i te Atua, na reira, ara, na te ngohengohe ki te ture i whakairia ai taua manaakitanga.

22. Ko te Matua he tinana tona, e whai kikokiko ana, e whai wheua ano hoki, penei tonu ano i te tangata nei; to te Tama pera ano: ko te Wairua Tapu ia kahore tona tinana i whai kikokiko, whai wheua ranei, engari ko tona tinana he tinana Wairua. Me he mea kihai i pera, penei kua kore te Wairua Tapu e ahei te noho i roto i a tatou.

23. E ahei ana te tangata kia whiwhi ki te Wairua Tapu, kia heke iho ranei te Wairua Tapu ki runga ki a ia, engari ko te noho tonu ki a ia he mea ke.