Wāhanga 62
He whakakitenga mā roto i a Hōhepa Mete te Poropiti, ki runga i te tahatika o te awa Mītori ki Haritana, Mītori, Akuhata 13, 1831. I tēnei rā, i te Poropiti rātou ko tana tira, e haere atu ana i Inipenetana ki Katarana, i tūtaki ki ētahi erata e haere atu ana ki te whenua o Hīona, ā, whai muri iho i ngā mihimihi hari, i whiwhi ai i tēnei whakakitenga.
1–3, Kua whakamaua ngā whakaaturanga i te rangi; 4–9, Me haere ngā erata me te kauhau kia rite ki te whaiwhakaaro, e rite ana anō ki tā te Wairua e tohua ai.
1 Nana, whakarongo mai, E koutou e ngā erata o taku hāhi, e ai tā te Ariki tō koutou Atua, ko Ihu Karaiti pū anō, tō koutou kaiwawao, e mōhio nei ki te ngoikoretanga o te tangata, ā, me pēhea hoki e whāngai i te hunga kua whakawaia.
2 Ā, he pono kei runga ōku karu i te hunga kāore anō kia haere ake ki te whenua o Hīona; nā reira kāore anō kia tutuki tō koutou mīhana.
3 Hei aha koa, kua manaakitia koutou, nā te mea kua whakamaua te whakaaturanga i whakaaturia mai nei e koutou i te rangi hei tirohanga mā ngā anahera; ā, e harikoa ana rātou mō koutou, ā, kua murua ō koutou hara.
4 Ināianei ā, me hono tonu atu tā koutou haere. Whakahuihuia koutou ki te whenua o Hīona; ā, whakatūria ake tētahi huinga, ā, kia hari ngātahi, ā, me tāpae atu tētahi hākarameta ki te Runga Rawa.
5 Kātahi koutou ka hoki me te whakaatu atu, āe rā, kia ngātahi pū anō, kia takirua rānei, e rite ana ki tā koutou e pai ai, kāore he aha ki ahau; engari kia ū, me te whakapuaki i ngā rongo whakahari ki ngā tāngata o te ao, ki waenganui rānei i ngā whakaminenga o te hunga whakarihariha.
6 Nana, au, te Ariki, kua kumea mai koutou kia tutuki ai te whakaari, kia tiakina te hunga tika kei waenganui i a koutou, ā, kia hari tahi i te whenua o Mītori. Nāku, nā te Ariki, i whakaari ki te hunga ū, ā, tē taea te rūkahu.
7 E pai ana ahau, te Ariki, mehemea kei waenganui tētahi i a koutou ki te eke hōiho, kaihe rānei, mā runga hāriata rānei, ka whiwhi ia ki tēnei manaakitanga, mehemea ka whiwhi i te ringa o te Ariki, i runga i te ngākau whakawhetai i ngā mea katoa.
8 Ka noho tonu ēnei mea ki a koutou kia rite ki te whakawākanga me ngā tohutohu o te Wairua.
9 Nana, nō koutou te kīngitanga. Ā nana, ā nana, ka piri tonu au ki te hunga pono i ngā wā katoa. Koia anō. Āmine.