Wāhanga 54
He whakakitenga mā roto i a Hōhepa Mete te Poropiti ki a Nuera Naiti, ki Katarana, Ohaio, Hune 10, 1831. I te weherua ngā mema o te Hāhi e noho ana i Tamihana, Ohaio, e pā ana ki ngā pātai mō te whakatapu i ngā rawa. I kitea te kaiapo me te kaipuku. I muri iho i tā Remana Kaupari mihana ki ngā Kaiharuru (tirohia te kōwae upoko ki wāhanga 49), ka whatia e ia tana kawenata kia whakatapua iho tōna pāmu nui hei wāhi tuku iho mō ngā Hunga Tapu e taetae atu ana ki Kourawira, Niu Ioka. Hei utu, i haere atu a Nuera Naiti (te kaiārahi o ngā mema e noho ana i Tamihana) rātou ko ētahi atu erata ki te Poropiti e uiui atu ana me pēhea e kāneke whakamua ai. Ka inoi ake te Poropiti ki te Ariki kātahi ka whiwhi i tēnei whakakitenga, e whakahaua ana ngā mema i Tamihana kia wehe atu i tō Remana Kaupari pāmu me te haere ki Mītori.
1–6, me pūmau te Hunga Tapu ki te kawenata rongopai kia whakaaroha ai; 7–10, Me manawanui rātou i roto i ngā taumahatanga.
1 Nana, pēnei tā te Ariki, ko te Arepa me te Omeka pū anō, te tīmatanga me te whakamutunga, koia pū anō i rīpekatia ai mō ngā hara o te ao—
2 Nana, he pono, he pono tāku e mea atu nei ki a koe, e taku pononga e Nuera Naiti, me tū koe i roto i te tūranga kua whakataua iho nei ki a koe.
3 Ā, ki te hiahia ō teina kia mawhiti atu i ō rātou hoariri, tukua rātou kia rīpenetā i ō rātou hara, ā, kia meinga hei mea whakaiti, hei mea wairua iro i tōku aroaro.
4 Ā, i te mea kua whatia iho te kawenata kua meatia nei e koe ki ahau, nā konā kua whakakorea tōna mana, ā, kāore ōna kaha.
5 Ā, auē te mate mō te tangata nāna nei tēnei hara, nā te mea kua pai ake mehemea kua toremi iho ia i te hōhonutanga o te moana.
6 Engari kua manaakitia te hunga kua puritia te kawenata, ā, kua ngohengohe hoki ki te whakahaunga, nā te mea ka whiwhi rātou i te whakaaroha.
7 Nā reira, haere atu ināianei, ā, tahutitia atu, kei huaki mai ō hoariri ki runga ki a koe; ā, haere atu koe, ā, tohua tētahi e pai ai ki a koe hei kaiārahi mō koutou, hei kaituku moni mā koutou.
8 Ā pēnei ka haere atu koe ki roto ki ngā rohe whakateuru, ki te whenua o Mītori, ki roto i ngā rohe o ngā Rāmana.
9 Ā, whai muri iho i tā koutou haeretanga, nana, ko taku kupu tēnei ki a koutou, rapua e koutou tētahi oranga ā-tangata, tae noa ki te wā e whakarite ai au i tētahi wāhi mō koutou.
10 Hei āpiti anō, kia manawanui i roto i ā koutou mamaetanga kia tae atu au; ā, nana, ka haere wawe mai au, ā, kei a au taku utu, ā, ka whiwhi te hunga i rapua moatahia au i te okiokinga ki ō rātou wairua.