Wāhanga 25
He whakakitenga mā roto i a Hōhepa Mete te Poropiti, ki Hāmoni, Penihiwheinia, Hūrae 1830 (tirohia te kōwae upoko o te wāhanga 24). Kei roto i tēnei whakakitenga te hiahia o te Ariki ki a Ema Mete, te hoawahine a te Poropiti.
1–6, Ko Ema Mete, he wahine kōwhiria, kua karangatia ia ki te āwhina me te whakaāio i tana hoatāne; 7–11, Kua karangatia anō hoki ia ki te tuhituhi, ki te whakamārama karaipiture, ki te kōwhiri hīmene; 12–14, He inoi te waiata a te hunga tika ki te Ariki; 15–16, E hāngai ana ngā tikanga ngohengohe ki te katoa.
1 Whakarongo ki te reo o te Ariki tōu Atua, i ahau e kōrero ana ki a koe, e Ema Mete, taku tamāhine; nā te mea he pono tāku e mea atu nei ki a koe, he tama, he tamāhine te hunga katoa e whiwhi nei i taku rongopai i roto i tōku kīngitanga.
2 E hoatu ana e au tētahi whakakitenga ki a koe e pā ana ki taku hiahia; ā, ki te ū koe me te hīkoi i runga i ngā huarahi o te ngākaupai i tōku aroaro, māku tō oranga e tiaki, ā, ka whaiwāhi koe i roto i Hīona.
3 Nana, kua murua ōu hara, ā, he wahine kōwhiria koe, nāku anō hoki koe i karanga.
4 Kaua e amuamu mō ngā mea kāore anō koe kia kite, nā te mea kua kaiponuhia aua mea i a koe me te ao, he mea whaimātauranga i roto i ahau mō tōna ake anō wā e haere mai ana.
5 Ā, ka meinga hei mea whakaāio te tūranga o tō karangatanga ki taku pononga, ki a Hōhepa Mete, Tama., tāu hoatāne, i roto i ōna mamaetanga, ki ngā kupu whakaāio, i runga i te wairua māhaki.
6 Ā, ka haere tahi koe me ia i te wā o tōna haerenga, ā, ka tū koe hei kaituhi, i te wā kāore he kaituhituhi mōna, kia tonoa atu e au taku pononga, a Oriwa Kautere, ki ngā wāhi e hiahia ai au.
7 Ā, ka whakamanaia koe i raro i tōna ringa ki te whakamārama i ngā karaipiture, me te akiaki i te hāhi, e rite ana ki tā tōku Wairua e hoatu ai ki a koe.
8 Nā te mea ka whakapā ia i ōna ringaringa ki runga ki a koe, ā, ka whiwhi koe ki te Wairua Tapu, ā, ka whakapau tō wā ki te tuhituhi, me te ako i ngā mea maha.
9 Ā, ehara i te mea me wehi koe, nā te mea ka tautoko tāu hoatāne i a koe i roto i te hāhi; nā, mō rātou tōna karangatanga, kia huraina ai ngā mea katoa ki a rātou, ahakoa he aha taku hiahia, e rite ana ki tō rātou whakapono.
10 Ā, he pono tāku e mea atu nei ki a koe, nā, me whakarere e koe ngā mea o tēnei ao, ā, me whai atu i ngā mea e pai ake ana.
11 Ā, ka hoatu ki a koe anō hoki te tikanga kia whiriwhiri i ngā hīmene tapu, kia rite ki te mea e hoatu ai ki a koe, e āhuareka ana ki ahau, hei mea mō roto i te hāhi.
12 Nā te mea e āhuareka ana tōku wairua i te waiata o te ngākau; āe rā, he inoi te waiata a te hunga tika ki ahau, ā, ka whakautua ki tētahi manaakitanga ki runga i ō rātou māhunga.
13 Nā reira, kia koa, kia hari tōu ngākau, ā, kia piri ki ngā kawenata kua kawenatatia e koe.
14 Me noho tonu i roto i te wairua māhaki, ā, kia tūpato ki te whakapehapeha. Tukua tō wairua kia āhuareka i tāu hoatāne, me te korōria e tau iho ai ki runga ki a ia.
15 Me pupuri tonu i aku whakahaunga, ā, ka whiwhi koe i te karauna o te tika. Ā, ki te kore koe e mahi pēnei, e kore koe e tae ki te wāhi i reira au.
16 Ā, he pono, he pono tāku e mea atu nei ki a koe, nā, koinei tōku reo ki te katoa. Āmine.