Wāhanga 122
Ko te kupu a te Ariki ki a Hōhepa Mete te Poropiti, i a ia e noho herehere ana i tētahi whareherehere ki Rīpati, Mītori. He kaponga tēnei wāhanga mai i tētahi pukapuka ki te hāhi i meatia ai i te Māehe 20, 1839 (tirohia te kōwae ki te wāhanga 121).
1–4, Ka uia e ngā tōpito katoa o te ao e pā ana ki te ingoa o Hōhepa Mete; 5–7, Ka ai ana hinganga me ana mamaetanga hei mātauranga hei painga mōna; 8–9, Kua heke iho te Tama a te Tangata ki raro iho i a rātou katoa.
1 Ka uia e ngā tōpito katoa o te ao e pā ana ki tō ingoa, ā, ka tāwai te hunga kuare i a koe, ā, ka pakanga te ao rēwera ki a koe;
2 I te hunga ngākau mā, me te hunga mātau, me te hunga ariki, me te hunga ngākau pai, e rapu tohutohu ana, me te mana, me ngā manaakitanga i raro i tō ringa.
3 Ā, e kore tō iwi e taea te whakatahuri kē i a koe i runga i te whakaaturanga o te hunga kupapa.
4 Ā, ahakoa ka makaia koe e tō rātou kaha ki roto i ngā rarunga, ki roto hoki i ngā herehere me ngā pakitara, ka meatia koe i runga i te hōnore; ā, engari mō tētahi wā poto, ā, ka whakaweriweri ake tō reo i te aroaro o ō hoariri i tō te raiona horotītī, nā tō tika; ā, ka tū tō Atua i tō taha mō āke tonu atu.
5 Mehemea ka karangatia koe kia uru atu ki roto i te whakamamaetanga; mehemea kei roto koe i ngā kino i waenganui i te hunga teka; mehemea kei roto koe i ngā kino i waenganui i te hunga kaipāhua; mehemea kei roto koe i ngā kino e tata ana ki te whenua, ki te moana rānei;
6 Mehemea ka whakapaea koe i runga i ngā whakapae teka katoa; mehemea ka taka iho ō hoariri ki runga ki a koe; kia kahakina atu koe e rātou mai i te hapori o tō matua rāua ko tō whaea me ō teina me ō tuāhine; ā, mehemea ka kahakina atu koe i te uma o tō hoa wahine, e ō hoariri i runga i te unuhanga o te hoari me ō uri, me tō tama mātāmua, ahakoa kua ono tau te pakeke, ka piri kaha ki ō kākahu, kātahi ka kī ake, Taku matua, taku whaea, he aha e kore ai e taea te piri mai ki a mātou? E, tōku matua, ka ahatia koe e ngā tāngata? Mehemea ka werohia ia ki te hoari i tērā wā, kātahi ka tōia koe ki roto i te whareherehere, kātahi ka hītoitoi haere ō hoariri anō nei he wuruhi mō te toto o te reme.
7 Ā, ki te makaia koe ki roto i tētahi rua, ki roto rānei i ngā ringaringa o ngā kaikōhuru, me te whakataunga kia whakamatea koe; ki te makaia iho koe ki roto i te riretanga; ki te āki mai te ngaru nunui ki a koe; ki te huri ngā hau pūkeri hei hoariri ki a koe; ki te pōuri haere ngā rangi tāhuahua, kātahi ka whakakotahi ngā mea katoa hei aukati i tō huarahi; ā, kei runga ake i te katoa, ki te puare te waha o te ao rēwera ki a koe, me mōhio koe, e taku tama, ka mātau koe i ēnei mea katoa, ā, ka meinga hei painga mōu.
8 Kua heke iho te Tama a te Tangata ki raro i a rātou katoa. Kua rahi ake koe i a ia?
9 Nō reira, kia ū ki tō huarahi, ā, ka pūmau tonu te tohungatanga ki a koe; i te mea kua tau ōna rohenga, tē taea te hipa. Kua mōhiotia ō rā, ā, e kore ō tau e tatauria kia iti iho; nō reira, kaua e wehi i tā te tangata e taea ai, nā te mea ka piri tonu te Atua ki a koe mō āke tonu atu.