Wāhanga 53
He whakakitenga mā roto i a Hōhepa Mete te Poropiti ki a Arekanana Hirini Kiripeti, ki Katarana, Ohaio, Hune 8, 1831. Ka inoi ake te Poropiti i runga i te tono a Hirini Kiripeti ki te Ariki e pā ana ki tā Tuakana Kiripeti mahi i te Hāhi.
1–3, Ko tō Hirini Kiripeti karangatanga me tana kōwhiringa i te Hāhi ko tana whakamanatanga hei erata; 4–7, Me mahi anō ia hei kaiwhakarite mō te pīhopa.
1 Nana, ko taku kupu tēnei ki a koe, e taku pononga e Hirini Kiripeti, nā, kua rongo au i āu inoi; ā, kua karangatia au e koe kia whakamōhiotia atu ki a koe, he mea nā te Ariki tō Atua, e pā ana ki tō karangatanga me tō kōwhiringa i te hāhi, he mea nāku, nā te Ariki, i whakatūria ake i ēnei rā o muri nei.
2 Nana ahau, te Ariki, te mea i rīpekatia mō ngā hara o te ao, e hoatu nei ki a koe tētahi whakahaunga kia whakarērea e koe te ao.
3 Tangohia ake ki runga ki a koe taku whakamanatanga, ko taua taumata anō o te erata, kia kauhau i te whakapono me te rīpenetātanga me te murunga hara, e rite ana ki taku kupu, me te whiwhinga ki te Wairua Tapu mā te whakapākanga i ngā ringaringa;
4 Kia tū ai anō hoki hei kaiwhakarite mō tēnei hāhi i te wāhi e whakataua ai e te pīhopa, e rite ana ki ngā whakahaunga e hoatu ai a muri ake nei.
5 Hei āpiti anō, he pono tāku e mea atu nei ki a koe, ka haere ngātahi koutou ko Hōhepa Mete, Tama., ko Hirinia Rikitana.
6 Nana, koinei ngā tikanga tapu tuatahi e whiwhi ai koe; ā, ka whakamōhiotia atu te toenga atu hei tētahi wā e kainamu mai ana, e rite ana ki tāu mahi i tōku māra waina.
7 Hei āpiti anō, e hiahia ana au kia ako koutou ka whakaorangia anake te tangata e ū ai ki te mutunga. Koia anō. Āmine.