1 Whakarongo ki te reo o Ihu Karaiti, tō koutou Ariki, tō koutou Atua, ā, tō koutou Kaihoko, he hohoro nei, he kaha nei tana kupu.

2 Nā te mea, nana, ko taku kupu tēnei ki a koutou, nā, kāore he tikanga tāu e kai ai, e inu ai rānei i a koutou e kai ana i te hakarameta, mehemea ka pērātia i runga i te karu whakahāngai ki tōku korōria—e mahara ana ki te Matua kua whakatakotoria iho tōku tīnana mō koutou, ā, kua whakahekea ōku toto hei murunga i ō koutou hara.

3 Nā reira, ka hoatu au i tētahi whakahaunga ki a koutou, nā, kaua koutou e hoko waina, e hoko inu kaha rānei i ō koutou hoariri;

4 Nā reira, kaua koutou e inu i tētahi mea pērā ki te kore e mahia houtia i waenganui i a koutou; āe rā, i roto i tēnei te kīngitanga o tōku Matua e hangaia ake ai i runga i te whenua.

5 Nana, he mātauranga tēnei i roto i ahau; nā reira, kaua e mīharo, nā te mea ka tae mai te hāora e inu tahi au i te hua o te waina me koutou i runga i te whenua, ki a Moronai hoki, nāku noa nei i tono kia huraina atu ai te Pukapuka a Moromona ki a koutou, e mau nei te raneatanga o tōku rongopai mau tonu, kua tukua e ahau ki a ia ngā kī o te tuhituhinga o te rākau o Eparaima;

6 Ā, ki a Eria anō hoki, kua tukua atu e au ngā kī o te pahawatanga ake o te whakahokinga mai o ngā mea katoa i kōrerotia ake nei e te māngai o ngā poropiti tapu mai i te tīmatanga o te ao, e pā ana ki ngā rā whakamutunga;

7 Ko Hoani te tama a Hakaraia anō hoki, ko taua Hakaraia anō i puta rā ki a ia (a Eria) ā, ka tuku whakaari ia ki a ia ka whai tama ia, ā, ka huaina tōna ingoa ko Hoani, ā, ka whakakīngia ia ki te wairua o Eria;

8 Ko taua Hoani anō nāku i tono ki a kōrua, e aku pononga, e Hōhepa Mete Tama., me Oriwa Kautere, ki te whakamana i a kōrua ki te tohungatanga tuatahi i whiwhi nei kōrua, kia karangatia ai kōrua, ā, kia whakamanaia ai kōrua pērā i a Arona;

9 Me Irāia anō hoki, kua tukua e ahau ngā kī o te whakatahuritanga o ngā ngākau o ngā matua ki ngā tamariki, me ngā ngākau o ngā tamariki ki ngā matua, kia kore ai e pākia te ao katoa ki tētahi kanga;

10 Me Hōhepa rāua ko Hākopa anō hoki, me Hākopa, me Aperahama, me ō koutou tūpuna, nā rātou hoki i mau tonu ai ngā kupu whakaari;

11 Me Mikaere anō hoki, Arama rānei, te matua o te katoa, te pirinihi o te katoa, te rā tino onamata;

12 Me Pita, me Hēmi, me Hoani anō hoki, kua tonoa atu nei e ahau ki a kōrua, mā rātou kōrua i whakamana, i whakaū hei āpōtoro, hei kaiwhakaatu motuhake mō tōku ingoa, kia mau anō ki ngā kī o tā kōrua minitatanga me aua mea anō i huraina ai ki a rātou;

13 Te hunga kua tukua nei e ahau ngā kī o tōku kīngitanga, me te mana whakahaere o te rongopai mō ngā wā whakamutunga; mō te raneatanga o ngā wā, i reira whakahuihui ngātahi au kia kotahi ngā mea katoa, kei roto i te rangi, kei runga hoki i te whenua;

14 Me te hunga katoa o tēnei ao anō hoki kua homai nei e tōku Matua ki ahau.

15 Nā reira, kia koa, kia hari ō koutou ngākau, me te whītiki anō i ō kōrua hope, whakakākahuria ki ōku kākahu whawhai katoa, kia taea ai e kōrua te tū a te rā kino, i te mea kua whakapau kōrua i ō kōrua kaha kia taea ai e kōrua te tū.

16 Nō reira, e tū, he mea whītiki ō kōrua hope ki te pono, e mau nei te ārai uma o te tika, ā, kua mau nei ki ōu waewae te whakaritenga o te rongopai o te rangimārie, kua tonoa atu e ahau aku anahera ki te hoatu ki a kōrua;

17 E mau ana ki te puapua o te whakapono mā konā e taea ai e kōrua ngā mātia muramura katoa o te hunga kino;

18 Ā, tīkina te ārai māhunga o te whakaoranga, me te hoari o taku Wairua, e ringihia atu ai e au ki runga ki a kōrua, me taku kupu e huraina atu e au ki a kōrua, ā, kia tapatahi ā kōrua whakaaro i runga i ngā mea katoa e tonoa ai e kōrua i a au, ā, kia ū kōrua tae noa ki te wā e haere mai ai au, ā, ka tangohia ake kōrua, nā, ka noho kōrua i te wāhi e noho ai ahau. Āmine.