1 Nana, pēnei tā te Ariki tō koutou Atua ki a koutou, E koutou e ngā erata o taku hāhi, whakarongo mai kia rongo, ā, whakawhiwhia tāku e pai ai mō koutou.

2 Nā te mea he pono tāku e mea atu nei ki a koutou, e hiahia ana au kia taea e koutou te ao; nā reira ngākau aroha atu ai au ki a koutou.

3 Kei waenganui i a koutou ētahi kua hara; engari he pono tāku e mea atu nei, mō tēnei wā kotahi, mō tōku ake kororia, ā, mō te whakaoranga o ngā wairua, kua murua e au ō koutou hara.

4 Ka whakaaroha atu au ki a koutou, nā te mea kua hoatu e au te kīngitanga ki a koutou.

5 Ā, e kore ngā kī mō ngā mea ngaro o te kīngitanga e tangohia atu ai i taku pononga a Hōhepa Mete, Tama., mā roto i ngā mea kua whakataua e au, i a ia e ora ana, ki te mea ka ngohengohe ia ki aku tikanga tapu.

6 Kei reira ētahi kua kimi take ki a ia ahakoa kāore he take;

7 Hei aha koa, kua hara ia; engari he pono tāku e mea atu nei ki a koutou, kei te muru hara ahau, te Ariki o te hunga e whāki mai i ō rātou hara ki tōku aroaro me te inoi mai mō te murunga hara, te hunga kīhai i hara kia mate.

8 Ko aku apataki, i ngā rā onamata, i kimi take tētahi ki tētahi atu, ā, kīhai i muru tētahi i tētahi i roto i ō rātou ngākau; ā, mō tēnei kino i whakawhiua ai, ā, i kohete rawatia ai rātou.

9 Nā reira, ko tāku e mea atu nei ki a koutou, nā, me muru koutou tētahi i tētahi; nā te mea ko te tangata e kore nei e muru i ngā hē o tana teina te mea e tū ana hei mea whakahēngia i te aroaro o te Ariki; nā te mea kei roto tonu i a ia te hara nui ake.

10 Māku, mā te Ariki, e muru i ngā hē o ngā tāngata ki tāku e pai ai, engari mō koutou, e tika ana kia murua ngā hara o ngā tangata katoa.

11 Ā, e tika ana kia kī ake koutou i roto i ō koutou ngākau—tukua te Atua hei whakawā i waenganui i a tāua, ā, kia utua koe kia rite ai ki āu nā mahi.

12 Ā, tukua te tangata e kore nei e rīpenetā i ōna hara, ā, e kore nei e whāki i ōna hara, mā koutou ia e mau mai ki mua i te hāhi, ā, kia pērātia ki a ia e rite ana ki tā te karaipiture e mea ana ki a koutou, mā runga i te whakahaunga, mā runga rānei i te whakakitenga.

13 Ā, me pēnei e koutou kia whai kororia te Atua—ehara i te mea kāore koutou e muru hara, he mea nā tō koutou aroha kore, engari kia tika koutou i ngā karu o te ture, kia kaua koutou e whakatakariri i te mea ko ia te kaihoatu ture—

14 He pono tāku e mea atu nei, mō tēnei take e mea ai koutou i ēnei mea.

15 Nana, i riri au, te Ariki ki a ia, arā, ki a Etera Puta taku pononga i mua, me taku pononga hoki a Ihaka Morei, nā te mea kīhai i puritia e rāua te ture, kīhai rānei te whakahaunga;

16 I rapu kino i roto i ō rāua ngākau, ā, nāku, nā te Ariki, i pupuri taku Wairua. I whakawākia te mea hei mea kino ahakoa kāore ōna kino; hei aha koa kua murua e au ngā hē o taku pononga a Ihaka Morei.

17 Me taku pononga a Eruera Pātiri anō hoki, nana, kua hara ia, ā, e whai ana a Hātana kia whakangaro i tōna wairua; engari ina whakamōhiotia atu ēnei mea ki a rātou, ā, ina rīpenetā rātou mō te kino, ka murua ō rātou hara.

18 Ināianei ā, he pono tāku e mea atu nei ki a koutou, nā, me tika pū kia hoki atu taku pononga a Hirini Kiripeti, whai muri iho i ētahi wiki ruarua, ki tana mahi, ki tana whakahaere hoki i te whenua o Hīona;

19 Ā, he pai kia whakamōhiotia atu ērā mea kua kitea, ā, kua rangona ki aku apataki, kia kore ai rātou e ngaro. Ā, mō konei rā i kōrerotia ēnei mea e ahau.

20 Hei āpiti anō, ko tāku e mea atu nei ki a koutou, kia kore ai taku pononga a Ihaka Morei e whakawaia ake ai i tāna e taea ai te pīkau, ā, kia kaua e tohutohua hēngia hei whakamamae i a koutou, nā konei hoatu whakahau au kia hokona atu tana pāmu.

21 Kāore au e pai kia hokona atu e Perarika T. Wiremu tana pāmu, nā te mea kāore au, te Ariki, e hiahia ana kia mau tonu tētahi piringa kaha i te whenua o Katarana, mō te takiwā o ngā tau e rima, i konei au e kore nei e turaki iho i te hunga kino, kia whakaora ai au i ētahi.

22 Ā, hei muri iho i taua rā, e kore ahau, te Ariki, e pupuri i ētahi mea hē e haere ake ai i runga i te ngākau tūwhera ki te whenua o Hīona; nā te mea e hiahia ana ahau, te Ariki, ki ngā ngākau o ngā tamariki a te tangata.

23 Nana, kua karangatia te nāianei, ko tēnei rā, tae atu ana ki te haerenga mai a te Tama a te Tangata, ā, he pono koia tētahi rā whakahere, ā, he rā whakatekau mō taku iwi; nā te mea e kore te tangata kua whakatekauhia e tahuna hei te rā o tana haerenga mai.

24 Nā, hei muri ake i tēnei rā puta ai te tahunga—e kōrero ana tēnei i runga i te ritenga o te Ariki—nā he pono tāku e mea atu nei, hei āpōpō meinga ai te hunga whakapehapeha me te hunga mahi kino kia rite ki te pāpapa; ā, māku rātou e tahu ake, nā te mea ko au te Ariki o ngā Mano; ā, e kore au e tohu i ētahi e noho tonu ai i Papurona.

25 Nā reira, ki te whakapono mai koutou, ka mahi koutou i te wā e karangatia ana ko tēnei rā.

26 Ā, kāore e tika ana kia hoko atu aku pononga a Nuera K. Witini rāua ko Hirini Kiripeti i tō rāua toa me ō rāua rawa i konei; nā te mea ehara tēnei i te whai mātauranga kia tae mai te wā e haere ake ai te toenga o te hāhi, e noho tonu ana ki tēnei wāhi, ki te whenua o Hīona.

27 Nana, kua kīa ake i aku ture, kua whakakauakahia rānei, kia whai nama ki ō koutou hoariri.

28 Engari nana, kāore i kīa ake i tētahi wā i mua kia kaua te Ariki e tango ina pai ai, me te utu kia rite ki tāna e pai ai.

29 Nā reira, i te mea he kaiwhakarite koutou, kei runga koutou i tā te Ariki mahi; ā, ahakoa he aha tā koutou e mea ai e rite ana ki tā te Ariki hiahia koia tonu te mahi a te Ariki.

30 Ā, nāna nei koutou i whakarite kia whaioranga koutou mō ana hunga tapu i ēnei rā o muri nei, kia riro ai i a rātou tētahi whenua tuku iho ki Hīona.

31 Ā, nana, kei te whakapuaki au, te Ariki ki a koutou, ā, e tūturu ana aku kupu, ā, e kore rawa e pāhemo, nā, ka whiwhi rātou ki taua mea.

32 Engari me pahawa ake ngā mea katoa i ōna ake wā.

33 Nā reira, me kaua e ngenge i te meatanga i te pai, nā te mea kei te whakatakotoria e koutou te tūāpapa mō tētahi mahi nunui. Ā, hei roto i ngā mea iti puta ake ai ngā mea e nui ana.

34 Nana, e hiahia ana te Ariki ki te ngākau me tētahi hinengaro ngāwari; ā, ka kai te hunga ngāwari me te hunga ngohengohe i te pai o te whenua o Hīona i ēnei rā o muri nei.

35 Ā, ka hātepea atu te hunga haututū i te whenua o Hīona, ā, ka tonoa atu, ā, e kore e noho ki runga ki te whenua.

36 Nā, he pono tāku e mea atu nei, nā, ehara te hunga haututū i te toto o Eparaima, nā reira ka hutia ake rātou.

37 Nana, kua mea au, te Ariki, i taku hāhi i ēnei rā o muri nei kia rite ki tētahi kaiwhakawā e noho ana ki runga ki tētahi puke, i tētahi wāhi tiketike rānei, hei whakawā i ngā iwi.

38 Nā te mea ka pahawa ake, nā, ka whakawākia e ngā tāngata o Hīona ngā mea katoa e pā ana ki a Hīona.

39 Ā, ka whakawākia ngā kairūkahu me te hunga arero rua e rātou, ā, ka mōhiotia te hunga ehara i te āpōtoro, ehara rānei i te poropiti.

40 Ā, ko te pīhopa pū anō, ko ia tētahi kaiwhakawā, me ana kaunihera, ka whakahēngia rātou ki te kore e ū ki ō rātou tūranga, ā, ka whakatōkia iho ētahi atu i roto i ō rātou tūranga.

41 Nā te mea, nana, ko tāku e mea atu nei ki a koutou, nā, ka whaihua a Hīona, ā, ka tau iho te kororia o te Ariki ki runga ki a ia;

42 Ā, ka tū ia hei kara ki te iwi, ā, ka haere mai ki a ia ngā mea mai i ngā iwi katoa i raro i te rangi.

43 Ā, ka puta mai te rā e tūwiri ai ngā iwi o te ao i a ia, ā, ka mataku i ōna mea whakawehi. Kua kōrerotia nei e te Ariki. Āmine.