Wāhanga 78
He whakakitenga mā roto i a Hōhepa Mete te Poropiti, ki Katarana, Ohaio, Maehe 1, 1831. I taua rā, i hui tahi nei te Poropiti rātou ko ētahi atu kaiārahi ki te whakawhiti kōrero mō ngā mahi a te Hāhi. He tohutohu tēnei whakakitenga i te tuatahi ki te Poropiti rātou ko Hirini Rikitana, ko Nuera K. Witini kia haere atu ai ki Mītori me te whakarite i tā te Hāhi mahi hokohoko me tana mahi tā mā runga i te waihanga i tētahi “kamupene” e whakahaerehia ai ēnei mahi, e kohikohi pūtea ana mō te whakapūmautanga o Hīona me te painga o te hunga rawakore. Tēnei kamupene, e mōhiotia nei ko te United Firm, i whakapūmauhia i te aperira 1832, ā, ka whakamutua atu i te tau 1834 (tirohia wāhanga 82). Nō muri tata iho i tana whakakorenga, i raro i te whakahaere o Hōhepa Mete, i whakaurua te rerenga kōrero “ngā mea o te pātaka mō te hunga rawakore” hei rīwhi mō “ngā tari mō te hokohoko me te tā” i roto i te whakakitenga, me te kupu “ritenga” hei rīwhi mō te kupu “kamupene.”
1–4, Me whakarite, ā, me whakapūmau ngā Hunga Tapu i tētahi pātaka; 5–12, Mā te mahi tika i ā rātou rawa e ārahi atu ki te whakaoranga; 13–14, Me motuhake te Hāhi i ngā mana o te whenua; 15–16, E mahi ana a Mikaere (Arama) i raro i ngā tohutohu o te Mea Tapu (Te Karaiti); 17–22, Kua manaakitia te hunga pono, nā te mea ka whiwhi rātou i ngā mea katoa.
1 I kōrero atu te Ariki ki a Hōhepa Mete, Tama., e mea ana: Whakarongo mai ki ahau, e ai tā te Ariki tō koutou Atua, ngā mea kua whakamanaia ki te pirihitanga teitei o taku hāhi, kua whakahuihui tahi mai i a koutou anō;
2 Ā, whakarongo ki ngā tohutohu a te mea kua whakamanaia koe i runga rawa, e kōrero atu nei ki ō koutou taringa ngā kupu whai mātauranga, kia riro ki a koutou te whakaoranga i runga i taua mea kua whakatakotoria iho ki tōku aroaro, e ai tā te Ariki te Atua.
3 Nā, he pono tāku e mea atu nei ki a koutou, kua tae te wā, ā, kua tata mai; ā nana, titiro, me tika pū anō kia whakaritea tētahi huinga o taku iwi, hei whakahaere, ā, hei whakapūmau i ngā āhuatanga o te pātaka mō te hunga rawakore o taku iwi, i roto i tēnei wāhi ngā mea e rua, i roto hoki i te whenua o Hīona—
4 Hei whakaritenga mau roa, ā, mutunga kore me tētahi ritenga ki taku hāhi, kia kōkiri i te kaupapa, kua ū atu koutou hei whakaoranga mō te tangata, ā, ki te korōria o tō koutou Matua kei roto i te rangi;
5 Kia ōrite koutou i roto i ngā mea o te rangi, āe rā, me ngā mea o te whenua hoki, mō te hopuranga o ngā mea o te rangi.
6 Nā te mea ki te kore koutou e ōrite ana i ngā mea o te whenua kua kore e ōrite koutou i te hopuranga i ngā mea o te rangi;
7 Nā te mea ki te hiahia koutou kia hoatu e au tētahi wāhi i roto i te ao Tikitiki o Rangi, me whakarite e koutou anō mā te mahi i ngā mea kua whakahaua nei koutou e au, ā, kua meatia i a koutou.
8 Ināianei ā, he pono tā te Ariki, he tika pū anō kia meatia ngā mea katoa mō taku korōria, e koutou kua whakahonoa ngātahitia i runga i tēnei ritenga;
9 Kia kī pēnei kē rānei, tukua taku pononga a Nuera K. Witini rātou ko taku pononga a Hōhepa Mete, Tama., ko taku pononga a Hirini Rikitana kia noho rūnanga me ngā hunga tapu kei Hīona;
10 Ki te kore ka whai a Hātana ki te whakatahuri i ō rātou ngākau i te pono, nā, ka whakakāpōhia rātou, ā, ka kore e mārama ki ngā mea kua whakaritea nei mō rātou.
11 Nā reira, kei te hoatu e au tētahi whakahaunga ki a koutou, ki te whakatakatū me te whakarite i a koutou anō mā runga i tētahi here, tētahi kawenata mau tonu rānei tē taea te whati.
12 Ā, ka tangohia atu te tūranga me te karangatanga o te tangata e whati nei i tēnei i roto i te hāhi, ā, ka tukuna atu ki ngā whakamamaetanga o Hātana tae noa atu ki te rā o te hokonga.
13 Nana, koinei te whakaritenga mā konā au whakarite ai i a koutou, me te tūāpapa, me te tauira e hoatu nei e au ki a koutou, mā konā tutuki ai i a koutou ngā whakahaunga kua hoatu nei ki a koutou;
14 Nā, mā taku aroha, hei aha koa te uauatanga e tau iho nei ki runga ki a koutou, nā, ka tū motuhake te hāhi i runga i ērā atu mea katoa i raro i te ao Tikitiki o Rangi;
15 Kia āhei i a koutou te haere ake nei ki te karauna kua whakaritea mai nei mō koutou, ā, kia meinga he rangatira i runga i ngā kīngitanga, e ai tā te Ariki te Atua, te Mea Tapu o Hīona, nāna nei ngā tūāpapa o Arama-onotai-Amana i whakapūmau;
16 Kua whakatūria a Mikaere hei wheao mō koutou, ā, kua whakapūmauhia ōna waewae, ā, kua whakanohoia ki runga rawa, ā, kua hoatu ngā kī whakaoranga ki a ia i raro i ngā tohutohu me te whakahaere o te Mea Tapu, te mea kāore ōna rā tīmatanga me ōna mutunga rānei o te ora.
17 He pono, he pono, tāku e mea atu nei ki a koutou, he tamariki nohinohi koutou, ā, kāore anō koutou kia mārama ki te nui o ngā manaakitanga kei roto i ngā ringaringa ake o te Matua, ā, kua whakaritea mō koutou;
18 Ā, tē taea e koutou te pīkau i ngā mea katoa ināianei; hei aha koa, kia hari, nā te mea māku koutou e ārahi atu. Nō koutou te kīngitanga, ā, nō koutou anō ngā manaakitanga o reira, ā, nō koutou anō ngā taonga o te ao mau tonu.
19 Ā, ka meinga te tangata e whiwhi i ngā mea katoa i runga i te whakawhetai hei mea whai korōria; ā, ka tāpirihia atu ngā mea o tēnei ao ki a ia, ko te whakarea kotahi rau pū anō, āe rā, he nui atu.
20 Nā reira, meatia ngā mea kua whakahaua nei koutou e au, e ai tā te Kaihoko, ko te Tama pū anō a Amana, te mea e whakarite nei i ngā mea katoa i mua i tana kāhaki i a koutou;
21 Nā, ko koutou te hāhi o te Mātāmua, ā, māna koutou e kāhaki ake ki tētahi kapua, ā, ka whakataua atu tō tēnā tangata, tō tēnā tangata tāna.
22 Ā, ka whiwhi te tangata e pono ana, ā, e tiaki ana i runga i te whai mātauranga ki ngā mea katoa. Āmine.