1 Nana, ko taku kupu tēnei e mea atu nei ki a koutou, nā, i te mea kua tonoa mai e Matini Harihi tētahi whakaaturanga i tōku ringa, nā, ko koe e taku pononga e Hōhepa Mete, Tama., kei a koe ngā papa kua whakaaturia mai nei e koe, nā, kua whakawhiwhia ērā e ahau;

2 Ināianei ā, nana, māu tēnei mea e kōrero atu ki a ia—te tangata i kōrero ai ki a koe, e kī atu ai ki a koe: Ko au te Ariki, ko te Atua, ā, kua hoatu ēnei mea ki a koe, e taku pononga e Hōhepa Mete, Tama., ā, kua whakahaua koe kia tū ai hei kaiwhakaatu mō ēnei mea;

3 Ā, kua mea au kia uru mai koe ki roto i tētahi kawenata ki ahau, kia kore ai koe e whakakite atu i ērā mea, atu i te hunga kua whakahaua nei e au ki a koe; ā, kāore ō mana ki runga i aua mea hāunga te mana ka hoatu nei e au ki a koe.

4 Ā, kei a koe tētahi takohatanga ki te whakapākehā i ngā papa; ā, koinei te takoha tuatahi i whakataua iho ai e au ki runga ki a koe; ā. kua whakahaua koe e au kia kaua koe e toro atu ki tētahi atu takohatanga kia whakatutukihia taku kaupapa i roto i tēnei; nā te mea e kore au e tuku atu i tētahi atu takohatanga kia mutu rā anō tēnei.

5 He pono, ko taku kupu tēnei e mea atu nei ki a koe, nā, auē te mate e tau ai ki runga ki ngā tāngata e nohoia nei te whenua ki te kore rātou e whakarongo ki aku kupu;

6 Nā, ka whakamanangia koe a muri ake nei kia haere whakamua atu me te kawe atu i aku kupu ki ngā tamariki a te tangata.

7 Nana, ki te kore rātou e whakapono i aku kupu, e kore rātou e whakapono ki a koe, e taku pononga e Hōhepa, mehemea e taea ana e koe te whakakite atu i ēnei mea kua tukuna atu e au ki a koe.

8 Auē, tēnei whakatipuranga whakapono kore me tēnei whakatipuranga kakī mārō—kua mura taku riri ki a rātou.

9 Nana, he pono tāku e mea atu nei ki a koe, kua tiakina e ahau aua mea kua hoatu nei e au ki a koe, e taku pononga e Hōhepa, mō tētahi take whaimātauranga i roto i ahau, ā, ka whakamōhiotia atu ki ngā whakatipuranga anamata;

10 Engari ka whiwhi tēnei whakatipuranga i taku kupu mā roto i a koe;

11 Ā, hei āpiti atu ki tō whakaaturanga, ko te whakaaturanga o aku pononga tokotoru, e karangatia ai e au me te whakamana, ā, ka whakakite atu au i ēnei mea, ā, ka haere ngātahi atu rātou me aku kupu e hoatu ai mā roto i a koe.

12 Āe rā, ka tino mōhio pū rātou he pono ēnei mea, nā te mea ka whakapuaki atu au i ēnei mea ki a rātou mai i te rangi.

13 Ka hoatu mana au ki a rātou kia titiro atu, ā, kia kite iho rātou i ēnei mea i te āhuatanga tūturu o ēnei mea.

14 Ā, kāore au e tuku atu i tēnei mana ki ētahi atu, kia whiwhi rātou ki taua whakaaturanga anō i waenganui i tēnei whakatipuranga, i tēnei te tīmatanga o te whakarewanga ake me te whakaputanga mai o taku Hāhi ki waho atu i te koraha—e mārakerake ana pērā i te marama, ā, e kānapanapa ana pērā i te rā, ā, e whakawehiwehi ana pērā i te tauā e mau kara ana.

15 Ā, ka tukuna atu e au te whakaaturanga o ngā kaiwhakaatu tokotoru mō taku kupu.

16 Ā nana, ko te tangata e whakapono ai ki aku kupu, māku rātou e toro i runga i te whakakitenga o tōku Wairua; ā, ka whānau mai rātou i ahau, i te wai pū anō, ā, i te Wairua—

17 Ā, me tatari tonu koe mō tētahi wā poto, nā te mea kāore anō koe kia whakamanaia—

18 Ā, ka puta atu tō rātou whakaaturanga hei whakahē i tēnei whakatipuranga ki te whakapakeke rātou i ō rātou ngākau ki ēnā mea;

19 Nā te mea ka puta atu tētahi whakawhiu whakamōtī ki waenganui i ngā tāngata e nohoia nei te whenua, ā, ka maringi tonutia iho mai i tētahi wā ki tētahi atu wā, ki te kore rātou e rīpenetā, kia pōaha noa te ao, ā, kia memeha atu ō reira tangata noho, ā, kia whakangaromia rawatia e te kānapatanga o tōku haerenga mai.

20 Nana, kei te kōrero atu ahau i ēnei mea ki a koe, e pērā ana i tāku i kī atu ai ki te iwi e pā ana ki te whakangaromanga o Hiruharama; ā, ka whakamanahia taku kupu i tēnei wā pēnā i tōna whakamanatanga i mua.

21 Ināianei ā kei te whakahau atu au ki a koe, e taku pononga e Hōhepa, kia rīpenetā, ā, kia hīkoi tōtika i tōku aroaro, ā, kia kaua e aro tonu atu anō ki ngā whakapakepaketanga a te tangata;

22 Ā, kia ū koe i tō pupuri i ngā whakahaunga i whakahaua ai koe e ahau; ā, ki te pēnei koe, nana māku koe e manaaki ki te oranga tonutanga, ahakoa mēnā ka whakamatea koe.

23 Ināianei ā, anō, ka kōrero atu au ki a koe, e taku pononga e Hōhepa, e pā ana ki te tangata e hiahia ana i taua whakaaturanga—

24 Nana, ko taku kupu ki a ia, kei te whakatiketike ake ia i a ia anō, ā, kāore ia e whakaiti i a ia anō i mua i tōku aroaro; engari mehemea ka tuohu iho ia i mua i tōku aroaro i runga i te inoi kaha me te whakapono, i runga i te ngākau pono, kātahi au ka tuku i a ia kia kite i ngā mea e hiahia ana ia kia kite.

25 Kātahi ia ka kī atu ki ngā tāngata o tēnei whakatipuranga: Nana, kua kite au i ngā mea i whakakitea atu nei e te Ariki ki a Hōhepa Mete, Tama., ā, kei te mōhio pū ahau he pono ēnā mea, nā te mea kua kite ahau, nā, kua whakakitea mai aua mea ki ahau i runga i te mana o te Atua, ā, ehara i tō te tangata.

26 Ā, kei te whakahau te Ariki ki a ia, taku pononga a Matini Harihi, kia kaua ia e kōrero tonu atu ki a rātou e pā ana ki ēnei mea, hāunga tana kōrero: Kua kite au i ēnā mea, ā, kua whakakitea mai ki ahau i runga i te mana o te Atua; ā, koinei ngā kupu e kōrerohia ai e ia.

27 Engari mēnā ka whakakore ia i tēnei, ka whatia iho e ia te kawenata i kawenatatia e ia ki ahau i mua, ā nana, kua whakahēngia ia.

28 Ināianei ā, ki te kore ia e whakaiti iho i a ia anō me te whakaae mai ki ahau kua hē ngā mea kua mahia e ia, me te kawenata ki ahau kia puritia e ia aku whakahaunga, me te whakapakari i tōna whakapono i roto nei i ahau, nana, ko taku kupu ki a ia, e kore ia e whiwhi i ēnā momo kitenga, nā te mea e kore au e tuku kia kite ia i aua mea kua kōrerotia ake nei e au.

29 Ā, mehemea koinei te āhua, ka whakahau ahau ki a koe, e taku pononga e Hōhepa, kia kī atu koe ki a ia, kia kaua ia e mahi tonu atu, e whakararu rānei i ahau e pā ana ki tēnei take.

30 Ā, mehemea koinei te āhua, nana, ko taku kupu tēnei ki a koe e Hōhepa, ina whakapākehātia atu ētahi atu whārangi ka mutu koe mō tētahi wā, kia whakahau atu anō au ki a koe; kātahi ka taea e koe te whakapākehā anō.

31 Ā, ki te kore koe e pēnei, nana, ka mutu i konei tō takohatanga, ā, māku ngā mea kua tukuna atu nei ki a koe e tango atu.

32 Ināianei ā, nā te mea kei te kite atu au i ngā mea e takoto huna mai ana hei whakangaro i a koe, āe rā, kei te kite atu au, nā, ki te kore taku pononga a Matini Harihi e whakaiti i a ia anō me te whiwhi i tētahi whakaaturanga i taku ringa, nā, ka taka iho ia ki roto i te hē;

33 Ā, he tokomaha ngā mea e takoto huna mai ana ki te whakangaro i a koe i te mata o te whenua; ā, mō tēnei take, ka whakaroahia atu ōu rā, kua hoatu e au ki a koe ēnei whakahaunga.

34 Āe rā, mō tēnei take nāku i kī: Kāti, ā, e tū, kia whakahau au ki a koe, ā, māku e tuku atu i ngā mea mā reira taea ai e koe te whakatutuki i te mea kua whakahaua koe e ahau.

35 Ā, mehemea e ū ana koe i tō pupuri i aku whakahaunga, ka mairangatia ake koe hei te rā whakamutunga. Āmine.