1 Kia whakapaingia tō ingoa, E te Ariki te Atua o Iharaira, e puritia nei te kawenata, ā, e tuku aroha ana ki ō pononga e hīkoi tōtika ana i tō aroaro, me te katoa o ō rātou ngākau—

2 Ko koe rā kua whakahaua ō pononga ki te waihanga ake i tētahi whare ki tō ingoa i tēnei wāhi [Katarana].

3 Ināianei ā kua kite koe, E te Ariki, kua meatia e ō pononga kia rite ki tāu whakahau.

4 Ināianei ā, e inoi ake ana mātou ki a koe, e te Matua Tapu, i runga i te ingoa o Ihu Karaiti, te Tama o tō uma, mā tōna ingoa anake e minitatia atu te whakaoranga ki ngā tamariki a te tangata, e inoi ana mātou ki a koe, E te Ariki, whakawhiwhia ngā mea o tēnei whare, ngā mahinga a ō mātou ringaringa, ō pononga, i whakahaua nei mātou e koe kia hanga.

5 Nā te mea e mōhio ana koe kua meatia e mātou tēnei mahi i runga i te taumaha nui; ā, kua hoatu ā mātou rawa ahakoa tō mātou rawakoretanga kia hangaia ake ai tētahi whare ki tōu ingoa, kia whai wāhi ai te Tama a te Tangata ki te whakakite i a ia anō ki tana iwi.

6 Ā, pērā i tāu i kī ai i tētahi whakakitenga, kua homai nei ki a mātou, e karangahiua ana mātou ko ō hoa, e mea ana—Karangahia tō koutou whakaminenga pono, pērā i tāku i whakahau ai ki a koutou;

7 Ā, i te mea kāore he whakapono ō te katoa, rapua māriretia koutou, ā, whakaakona tētahi e tētahi ngā kupu whai mātauranga, rapua ngā akoranga mā runga pū anō i te rangahau me te whakapono;

8 Whakaritea koutou e koutou anō; whakaritea ngā mea katoa e tika ana, ā, whakapūmauhia tētahi whare, he whare inoi pū anō, he whare nohopuku, he whare whakapono, he whare ako, he whare korōria, he whare tika, he whare o te Atua;

9 Kia meatia ō mea tomo i runga i te ingoa o te Ariki, kia meatia ō mea puta i runga i te ingoa o te Ariki, kia meatia ō oha katoa i runga i te ingoa o te Ariki, me te hiki ake i ō ringaringa ki te Runga Rawa—

10 Ināianei ā, e te Matua Tapu, e inoi ake ana mātou kia āwhinatia mātou e koe, tō iwi, i runga i te aroha, ki te karangahia ake tō mātou whakaminenga pono, kia meatia hei whakahōnore i a koe, ā, ki tāu hoki e pai ai;

11 Ā, i runga i te ritenga e kitea ai mātou hei mea tika, i tō tirohanga, kia riro mai ai i a mātou tētahi whakatutukinga i ngā whakaari kua meatia nei e koe ki a mātou, tō iwi, i roto i ngā whakakitenga kua homai nei ki a mātou;

12 Kia tau iho ai tō korōria ki runga i tō iwi, ā, ki runga i tō whare, e whakatapua nei e mātou ki a koe, kia whakatapua hei wāhi tapu, ā, kia noho tonu tō mauri tapu ki roto i tēnei whare;

13 Ā, kia rongo ai ngā tāngata katoa e tomo mai ana i te tatau o te whare o te Ariki i tō mana, ā, kia akiakina ki te whakaae atu nāu ia i whakatapu, ā, nōu te whare, he wāhi anō nō tō tapunga.

14 Ā, māu e tuku, e te Matua Tapu, kia whakaakona te hunga katoa e koropiko ai i roto i tēnei whare ngā kupu whai mātauranga mai i ngā pukapuka pai rawa, ā, kia rapua e rātou ngā akoranga mā runga pū anō i te rangahau, me te whakapono anō hoki, pērā i tāu i kī ai;

15 Ā, kia tupu ake rātou ki a koe, me te whiwhi i tētahi raneatanga o te Wairua Tapu, ā, kia whakaritea kia rite ki ngā ture, ā, kia rite ki te whiwhi i ngā mea katoa e tika ana;

16 Ā, Kia ai tēnei whare hei whare karakia, hei whare nohopuku, hei whare whakapono, hei whare korōria, ā, hei whare Atua, ko tōu whare pū anō;

17 Kia meatia ngā tomonga katoa o tēnei iwi, ki roto ki tēnei whare, kia meatia i runga i te ingoa o te Ariki;

18 Kia meatia ā rātou putanga katoa atu i tēnei whare i runga i te ingoa o te Ariki;

19 Ā, kia meatia ō rātou oha i runga i te ingoa o te Ariki, ki ngā ringa tapu, e mairangatia ake ki te Runga Rawa;

20 Ā, kia kore ai e whakaaehia tētahi mea poke kia kuhu mai ki roto i tōu whare ki te whakapokea;

21 Ā, ina hara tō iwi, tētahi o rātou, ka taea e rātou te rīpenetā wawe me te hoki atu ki a koe, ā, kia whai painga i tō tirohanga, ā, kia whakahokia ki nga manaakitanga kua whakamanaia e koe hei mea ringihia ki runga i te hunga e koropiko ai ki a koe i tō whare.

22 Ā, e inoi ake ana ki a koe, e te Matua Tapu, kia haere atu ō pononga i tēnei whare e whakamaua ana ki tō mana, ā, kia tau ai tō ingoa ki runga ki a rātou, ā, kia karapoti rātou e tō korōria, ā, kia tiakina rātou e ō anahera.

23 Ā, atu i tēnei wāhi ka kawea atu ngā rongo nui whai korōria, i te pono, ki ngā tōpito katoa o te ao, e mōhio ai rātou nāu tēnei mahi, ā, nāu hoki tōu ringa i toro atu, ki te whakatutuki i ērā mea kua kōrerotia e koe mā roto i ngā māngai o ngā poropiti, e pā ana ki ngā rā whakamutunga.

24 E inoi ake ana mātou ki a koe, e te Matua Tapu, ki te whakapūmau i te hunga koropiko, ā, e pupuri hōnore ana ki tētahi ingoa me tētahi tūranga i tēnei tō whare, ki ngā whakatipuranga katoa, ā, mō te mau tonu;

25 Kia kore ai e taea e tētahi rākau whawhai e hangaia ake ai ki a rātou; kia taka iho te tangata e keri ana i tētahi rua mō rātou ki roto ki taua rua anō;

26 Kia kore ai tētahi huinga whakarihariha e whai kaha ai kia ara ake, ā, kia wikitōria ki runga i tō iwi e mau nei tō ingoa e purua iho ai ki roto ki tēnei whare;

27 Ā, ki te ara ake tētahi iwi ki tēnei iwi, kia tahuna tō riri ki a rātou;

28 Ā, ki te patu rātou i tēnei iwi māu rātou e patu; māu e whawhai mō tō iwi pērā i tāu i te rā o te whawhai, kia whakaputaina rātou i ngā ringaringa o ō rātou hoariri.

29 E inoi ake ana mātou ki a koe, e te Matua Tapu, kia whakapōauautia, ā, kia whakapōhēhētia, ā, kia tō iho te whakamā me te rangirua ki runga i te hunga kua kawea ngā pūrongo teka ki tawhiti, huri noa i te ao, e whakahē ana i ō pononga, ki te kore rātou e rīpenetā, ina whakapuakina ake te rongopai mau tonu ki roto ki ō rātou tāringa;

30 Ā, kia meatia ā rātou mahinga katoa hei mea kore noa iho, ā, kia tahia atu e te ua māwhatu, e ngā whakawākanga anō hoki e tonoa atu ki a rātou i runga i tō riri, kia ai he mutunga ki ngā rūkahu me ngā teka ki tō iwi.

31 Nā te mea kei te mōhio koe, E te Ariki, kua hē kore ō pononga i tō aroaro mō te whakaatu i tō ingoa, nā konā kua whakamamaetia mō ēnei mea.

32 Nō reira e inoi ake ana mātou ki a koe mō tētahi whakaputanga katoa i raro i tēnei ioka;

33 Unuhia atu, E te Ariki; unuhia atu i ngā kakī o ō pononga, i runga i tō kaha, kia mairanga ake i te aroaro o tēnei whakatipuranga me te mahi i tō mahi.

34 E Ihowa, kia aroha mai ki tēnei iwi, ā, i te mea ka hara ngā tāngata katoa, murua ngā hara o tō iwi, ā, tukua kia murua atu mō āke tonu atu.

35 Tukua te whakawahinga o ō minita kia hīria ake ai ki runga ki a rātou ki te mana nō runga.

36 Tukua kia whakatutukihia ki runga ki a rātou, pērā i te hunga i te rā Petekoha; tukua te takoha o ngā arero kia ringihia iho ki runga ki tō iwi, ko ngā arero pūrēhua anō nei he ahi, tae noa ki tōna whakamāoritanga.

37 Ā, tukua tō whare kia whakakīa, anō nei ki tētahi hau pūkeri, ki te korōria.

38 Purua ki runga i ō pononga te whakaaturanga o te kawenata, kia taea ai e rātou te hīri ake i te ture i a rātou e haere atu ana ki te whakapuaki atu i tō kupu, me te whakarite i ngā ngākau o ō hunga tapu mō aua whakawākanga whano koe ka tuku mai, i runga i tōku riri, ki runga i ngā tāngata o te ao, he mea nā ō rātou hara, kia kaua tō iwi e hemo i te rā o te raru.

39 Ā, ahakoa he aha te pā e kuhu atu ai ō pononga, kātahi ka aro mai ngā tāngata o taua pā ki tā rātou whakaaturanga, tukua tō rangimārie me tō whakaoranga kia tau iho ai ki runga i taua pā; kia taea e rātou te whakakao i te hunga tika i taua pā, kia haere mai ai ki Hīona, ki ōna pou rānei, ko ngā wāhi whakatau, me ngā waiata o te hari mutunga kore;

40 Ā, kia tae rā anō ki te tutukihanga i tēnei, kaua e tuku kia taka iho ō whakawākanga ki runga ki taua pā.

41 Ā, ahakoa he aha te pā kuhu atu ai ō pononga, kātahi ka kore e aro mai ngā tāngata o taua pā ki te whakaaturanga o ō pononga, kātahi ka whakatūpato ō pononga i a rātou kia whakaora rātou i a rātou anō mai i tēnei whakatipuranga parori, tukua kia tau iho ai ki runga i taua pā e rite ana ki tāu i kōrero ai nā ngā māngai o ngā poropiti.

42 Engari tukua e koe, E Ihowa, e inoi ana mātou ki a koe, ō pononga i ō rātou ringaringa, ā, horoia rātou i ō rātou toto.

43 E te Ariki, kāore mātou e āhuareka ana ki te whakangaromanga o ō tātou huānga; he mea taonga ō rātou wairua i tō aroaro;

44 Engari me whakatutuki tō kupu. Āwhinatia ō pononga kia kī, i runga i te āwhina o tō aroha ki a rātou: Ka meatia Tāu e pai ai, E te Ariki, ehara tā mātou.

45 E mōhio ana mātou kua kōrerotia e koe nā te māngai o ngā poropiti ngā mea whakarihariha e pā ana ki te hunga kino, hei ngā rā whakamutunga—nā, ka ringihia atu e koe ō whakawākanga, he mea mehua kore;

46 Nō reira, E te Ariki, whakaputaina tō iwi i te mate o te hunga kino; meatia ō pononga kia hīria ake te ture, ā, kia herea ake te whakaaturanga, kia rite ai rātou mō te rā o te tahunga.

47 E inoi ake ana mātou, e te Matua Tapu, kia mahara ki te hunga kua āia atu e ngā tāngata o te takiwā o Tiakimana, Mītori, atu i ō rātou whenua tuku iho, ā, unuhia atu, E te Ariki, tēnei ioka whakamamae kua whakataua nei ki runga i a rātou.

48 E mōhio ana koe, E te Ariki, kua pēhia nuitia, ā, kua whakamamaetia e te tāngata kino; ā, e rere ana te pōuri i ō mātou ngākau nā ō rātou pīkautanga kino.

49 E te Ariki, ka pēhea te roa e tukua e koe kia pīkauria ai e tēnei iwi tēnei whakamamaetanga, ā, kia ara ake ngā tangi o te hunga hē kore ki ō tāringa, ā, kia ara ake ō rātou toto hei whakaaturanga i tō aroaro, ā, kia kaua e meatia tō whakaaturanga mō rātou?

50 Kia aroha, E te Ariki, ki runga i te mapu kino, nā rātou tō iwi i āia atu ai, kia mutu tā rātou whakakino, kia rīpenetā ai rātou i ō rātou hara mehemea ka kitea te rīpenetātanga;

51 Engari ki te kore, meatia tō ringa, E te Ariki, whakahokia mai taua mea nāu i tohu he Hīona ki tō iwi.

52 Ā, ki te kore kē atu, kia kaua te pūtake o tō iwi e hē i tō aroaro, kia ngiha tōu riri, ā, kia taka iho tōu riri tika ki runga ki a rātou, kia memeha atu rātou, pakiaka mai, peka mai, i raro i te rangi;

53 Engari ki te mea ka rīpenetā rātou, he nui tō aroha, ā, ka tahuri atu tō riri ina titiro iho ki runga i te mata o āu i Whakawahia ai.

54 Kia aroha, E te Ariki, ki runga i ngā iwi katoa o te ao; kia aroha ki ngā kaiwhakaere o tō tātou whenua; kia whakapūmauhia mō āke tonu atu aua tikanga i tiakina ai i runga i te tino hōnore nui, arā, te Ture Kāwanatanga o tō tātou whenua, e ō mātou tūpuna.

55 Maharatia ngā kīngi, ngā wheao, ngā ariki, me ngā mea nui o te ao, me ngā tāngata katoa, me ngā hāhi, te hunga rawakore, te hunga hapa, me te hunga mamae o te ao;

56 Kia whakangāwarihia ō rātou ngākau ina haere atu ai ō pononga i tō whare, E Ihowa, kia whakaatu atu i tō ingoa; kia ngaro atu ō rātou kino i te tika, ā, kia whai painga hoki tō iwi i te tirohanga o te katoa;

57 Kia mōhio ai ngā pito katoa o te ao kua rongo mātou, ō pononga, i tō reo, ā, nāu hoki mātou i tono;

58 Kia whakakaohia mai i ēnei mea katoa, e ō pononga, e ngā tama a Hākopa, te hunga tika e hanga ake ai tētahi pā tapu ki tō ingoa, pērā i tāu i whakahaua ai rātou.

59 E inoi ake ana mātou ki a koe kia tohungia ētahi atu pou ki a Hīona atu i tēnei mea kua tohua nei e koe, kia haere tonu atu te whakahuihuinga o tō iwi i runga i te mana nui me te rangatiratanga, kia whakamutua wawetia tāu mahi i te tika.

60 Ko ēnei kupu ināianei, E te Ariki, kua kōrerotia nei e mātou i tō aroaro, e pā ana ki ngā whakakitenga me ngā whakahaunga kua homai nei e koe ki a mātou, kua whaipānga atu ki ngā Tauiwi.

61 Engari e mōhio ana koe he tino nui tō aroha ki ngā tamariki a Hākopa, kua whakamararatia atu nei ki runga i ngā maunga mō tētahi wā roa, i tētahi rangi kāpuapua pōuri.

62 Nō reira e inoi ake ana mātou kia whai aroha ki runga ki ngā tamariki a Hākopa, kia whakahokia ai a Hiruharama i tēnei hāora.

63 Ā, kia tīmata te unuhanga atu i te ioka i te whare o Rāwiri;

64 Ā, kia tīmata ake te hokihoki haeretanga o ngā tamariki a Hura ki ngā whenua nāu i hoatu ki a Aperahama, tō rātou matua.

65 Kia meatia ngā morehu o Hākopa, kua kangaia, ā, kua pākia nā tō rātou kino, kia whakatahuritia i ō rātou āhuatanga mohoao me tō rātou āhuatanga horetītī ki te raneatanga o te rongopai mau tonu;

66 Kia whakatakotoria iho ā rātou rākau whawhai o te heke toto, ā, kia mutu ō rātou haututūtanga.

67 Ā, kia mātau haere ngā mōrehu o Iharāira kua whakamararatia ake nei, ā, kua āia atu ki ngā tōpito katoa o te ao, ki te pono, kia whakapono ai ki te Mīhaia, ā, kia hokona ai i te pēhitanga, ā, kia hari i tō aroaro.

68 E te Ariki, maharatia tō pononga, Hōhepa Mete, Tama., me ōna whakamamaetanga katoa me ōna whakatoinga—ki tana kawenata ki a Ihowa, ā, kua oati ki a koe, E te Atua Kaha Rawa o Hākopa—me ngā whakahaunga kua hoatu nei e koe ki a ia, me tāna hei tino ū pono ki te mahi i tāu e pai ai.

69 Kia whai aroha, E te Ariki, ki runga i tana hoawahine rātou ko ana tamariki, kia whakateiteingia ake rātou i tō aroaro, ā, kia tiakina e tō ringa atawhai.

70 Kia whai aroha i runga i ō rātou hononga tata katoa, kia pakaru iho ō rātou kuaretanga, ā, kia tahia atu anō nei e tētahi waipuke; kia whakatahuritia, ā, kia hokona me Iharaira, ā, kia mōhio ai ko te Atua koe.

71 Maharatia, E te Ariki, ngā tumuaki, arā, ko ngā tumuaki katoa o tō hāhi, kia whakateiteingia rātou e tō ringa katau, rātou ko ō rātou whānau, me ō rātou hononga tata, kia maharatia tonutia ō rātou ingoa mai i tētahi whakatipuranga ki tētahi whakatipuranga.

72 Maharatia tō hāhi katoa, E te Ariki, me ō rātou whānau, me ō rātou hononga tata, me ō rātou mea māuiui me ō rātou mea whakamamaetia, me te hunga rawakore me te hunga māhaki o te ao; kia ai te kīngitanga, kua hangaia ringa-korehia e koe, kia meinga hei maunga nui kia kī anō te ao katoa;

73 Kia puta tō hāhi i te koraha o te pōuritanga, ā, ka tīaho atu anō nei te marama, ka mārama anō nei te rā, ā, ka kino anō nei tētahi tauā mau kara;

74 Ā, ka whakanikonikohia anō nei he wahine mārena mō taua rā ina huraina e rātou ngā rangi, ā, ka meatia ngā maunga kia rere iho i tō aroaro, ā, kia whakateiteihia ngā raorao, ka whakamāeneenengia ngā wāhi taratara; kia kī ai te ao i tō korōria;

75 Ina tangi te tetere mō te hunga mate, ka mau ake mātou i te kapua kia tūtaki ki a koe, kia noho tahi ai me te Ariki mō āke tonu atu;

76 Kia mā ai ō tātou kākahu, kia kākahuria mātou ki ngā kahu o te tika, e mau ō mātou ringaringa ki ngā rau rākau, me ngā karauna korōria ki runga i ō mātou māhunga, me te kokoti i te hari mau tonu mō ō tātou mamaetanga katoa.

77 E te Ariki te Atua Kaha Rawa, whakarongo mai ki a mātou i ēnei petihana, me te whakautu i a mātou i te rangi, tō nohonga tapu, i reira noho torona ai koe, i runga i te korōria, te hōnore, te mana, te rangatiratanga, te kaha, te arikitanga, te pono, te tika, te whakawā me te raneatanga mutunga kore, mai i te mau tonu ki te mau tonu.

78 Whakarongo mai, Whakarongo mai, Whakarongo mai, E te Ariki! Ā, whakautua ēnei pātai, ā, whakawhiwhia ki te whakatapunga o tēnei whare ki a koe, te mahi a ō tātou ringaringa, kua hangaia ake ki tō ingoa;

79 Me tēnei hāhi anō hoki, kia tapaina ake ki tō ingoa. Ā, kia āwhinatia ai mātou e te mana o tō Wairua, kia tuia ō mātou reo ki taua hunga mārama, ngā herapa tīahoaho e karapotia ana tō torona, me ngā waiata whakamoemiti, e waiata Ohana ana ki te Atua rāua ko te Reme!

80 Ā, tukua ēnei, āu mea whakawahia, kia kākahuria ai ki te whakaoranga, ā, kia hāmama ō hunga tapu i runga i te hari. Āmine, ā, Āmine.