Wāhanga 110
He whakakitenga i whakakitea atu ai ki a Hōhepa Mete te Poropiti rāua ko Oriwa Kautere i roto i te temepara o Katarana, Ohaio, Āperira 3, 1836. Kei tētahi hui Hāpati. E ai tā te hītori o Hōhepa Mete: “I te ahiahi, i āwhina au i ētahi atu Tumuaki i te tohatohatanga atu i te Hapa a te Ariki ki te Hāhi, e whiwhi ana i te Tekau Mā Rua, nōna te maringa ki te whakahaere i te tēpu tapu i tēnei rā. Whai muri iho i te meatanga ake i tēnei mahi ki aku teina, i hoki atu au ki te tūnga kōrero, kua taka iho ngā ārai, ā, ka tuohu ahau, me Oriwa Kautere, i runga i te inoi pono, i te inoi māhaki. Whai muri iho i te aranga ake i te inoi, ka tūwheratia ake te whakakitenga e whai ake nei ki a māua.”
1–10, Ka puta mai te Ariki a Ihowa i runga i te korōria, ā, ka whakawhiwhia te Temepara o Katarana hei whare Mōna; 11–12, Ka puta mai a Mohi rāua ko Eria, ā, ka whakaū i ō rātou kī me ngā wā; 13–16, Ka hoki mai a Irāia, ā, ka whakaū i ngā kī o tōna wā pērā i te whakaari e whakaaria ai e Maraki.
1 I tangohia atu te ārai i ō mātau hinengaro, ā, ka whakatūwheratia ngā karu o tō māua māramatanga.
2 I kite māua i te Ariki e tū ana i runga i te paparewa, i mua i a māua; ā, i raro i ōna waewae tētahi mahinga whakamīharo i mahia ki te kōura parakore, rite te kano ki te ngārehu wera.
3 Ko ōna karu anō nei tētahi mura ahi; i mā ngā makawe o tōna māhunga pērā i te hukarere; i nui ake te kānapa o tōna āhua i tō te rā; ā, ko tōna reo anō nei te tangi o ngā wai haruru nui, ko te reo pū anō o Ihowa, e mea ana:
4 Ko au te tuatahi me te whakamutunga; Ko au te mea e ora ana, Ko au te mea i whakamatea; ko au tō kaiwawao ki te Matua.
5 Nana, kua murua ō kōrua hara; he mā kōrua i mua i ahau; nō reira, hīkina ake ō kōrua māhunga, ā, kia hari.
6 Tukua ngā ngākau o ō kōrua teina kia hari, ā, tukua ngā ngākau o tōku iwi katoa kia hari, kua hangaia ake, ki tō rātou kaha, tēnei whare ki tōku ingoa.
7 Nana rā, kua whakawhiwhia e au tēnei whare, ā, ka noho mai nei tōku ingoa; ā, māku e whakakite atu i ahau anō ki tōku iwi i runga i te aroha i tēnei whare.
8 Āe rā, ka puta au ki aku pononga, ā, me kōrero atu ki a rātou ki tōku ake reo, ki te pupuri taku iwi i aku whakahaunga, ā, ki te kore e whakapoke i tēnei whare tapu.
9 Āe rā ka tino hari ngā ngākau o ngā mea mano me ngā tekau o ngā mano nā ngā manaakitanga e poua iho ai, me te hoatutanga tapu kua hoatu nei ki aku pononga i roto i tēnei whare.
10 Ā, ka hau te rongo mō tēnei whare i roto i ngā whenua kē; ā, koinei te tīmatanga o te manaakitanga kua poua iho nei ki runga i ngā māhunga o tōku iwi. Koia anō. Āmine.
11 Whai muri iho i te kapinga o tēnei whakakitenga, ka whakatūwheratia ake anō ngā rangi ki a māua; ka puta mai a Mohi ki tō māua aroaro, ā, ka whakaūngia ki a māua ngā kī mō te whakahuihuinga o Iharāira mai i ngā tōpito katoa o te ao, me te ārahitanga o ngā iwi tekau mai i te whenua o te raki.
12 Whai muri i tēnei, ka puta mai a Eria, ā, ka whakaūngia te wā o te rongopai a Aperahama, e mea ana kei roto i a māua me ō māua uri me ngā whakatipuranga katoa whai muri iho, ā, ka manaakitia.
13 Whai muri iho i te kapinga o tēnei whakakitenga, ka tau mai anō tētahi atu whakakitenga whaikorōria ki runga i a māua; nā, ka tū mai a Irāia te poropiti i mua i a māua, te mea i kahakina atu ai ki te rangi e kīhai e rongo ana i te mate, ka mea:
14 Nana, kua tino tae mai te wā, i kōrerotia nei e te māngai o Maraki—e whakaatu ana ka tonoa ia [Irāia], i mua i te taenga mai o te rā nui whakaweri o te Ariki—
15 Ki te whakatahuri i ngā ngākau o ngā tūpuna ki ngā tamariki, ā, ko ngā tamariki ki ngā tūpuna, kei pākia te ao katoa ki tētahi kanga—
16 Nō reira, ka whakaūngia ngā kī o tēnei wā ki ō kōrua ringaringa; ā, mā konei mōhio ai kōrua kua tata mai te rā nui whakaweri o te Ariki, ki ngā kuaha pū anō.