Wāhanga 11
He whakakitenga mā roto i a Hōhepa Mete te Poropiti ki tana tuakana a Hairama Mete, ki Hamoni, Penihiwheinia, Mei 1829. I whiwhi tēnei whakakitenga mā roto i te Urama me te Tāmama hei whakautu ki tā Hōhepa tuohutanga iho me tana inoinga. E mea ana te hītori a Hōhepa Mete, nā, i whiwhi tēnei whakakitenga i muri iho i te whakahokinga mai o te Pirihitanga o Arona.
1–6, Ka whakaorangia ngā kaimahi o te māra waina; 7–14, Whāia te māramatanga, karangahia te rīpenetātanga, whakawhirinaki ki runga i te Wairua; 15–22, Puritia ngā whakahaunga, rangahaua te kupu a te Ariki; 23–27, Kaua e whakakore atu i te wairua whakakitenga me te wairua poropititanga; 28–30, Ka meinga te hunga e manako mai ki te Karaiti hei tama nā te Atua.
1 Meake puta mai tētahi mahi nui whakamīharo ki waenganui i ngā tamariki a te tangata.
2 Nana, ko au te Atua; kia aro mai ki taku kupu, he mea hohoro, ā, he mea kaha, he koi ake i te hoari matarua, e weheruatia ki waenganui ngā ponapona me te hinu wheua; nō reira me whakarongo mai ki taku kupu.
3 Nana, kua mā kē te māra, kua rite mō te kotinga; nō reira, tukua te tangata e hiahia ana ki te kokoti kia āki iho i tana toronaihi i runga i tōna kaha, ā, kia kokoti ai, i te roanga atu o te rā, kia purangatia ake mō tōna wairua te whakaoranga mau tonu i roto i te kīngitanga o te Atua.
4 Āe rā, ko te tangata e āki iho i tana toronaihi kokoti ai, kua karangatia ngā pērā e te Atua.
5 Nō reira, ki te inoi mai ki ahau ka whiwhi koe; ki te pātōtō koe ka tūwhera atu ki a koe.
6 Nā, i te mea kua inoi mai koe, nana, ko taku kupu tēnei ki a koe, puritia aku whakahaunga, ā, whāia atu kia whakaputaina mai me te whakapūmau i te kaupapa o Hīona.
7 Kaua e whai atu i ngā taonga engari mō te mātauranga; ā, nana, ka hura mai ngā mea ngaro a te Atua ki a koe, kātahi ka meatia koe hei mea whairawa. Nana, e whairawa ana te tangata kei a ia te oranga tonutanga.
8 He pono, he pono tāku e mea atu nei ki a koe, ka rite ki tāu e hiahia mai nei i ahau, ā, ki te hiahia koe, ka riro koe hei mea e puta mai ai ngā mahi pai i tēnei whakatipuranga.
9 Kaua e kī ake i tētahi mea atu i te rīpenetātanga ki tēnei whakatipuranga. Puritia aku whakahaunga, ā, āwhina mai kia whakaputaina mai taku mahi, e rite ana ki aku whakahaunga, kātahi ka manaakitia koe.
10 Nana, he takoha tāu, ka riro rānei he takoha ki a koe ki te hiahia tētahi i ahau i runga i te whakapono, i runga i te ngākau pono, e whakapono ana ki te mana o Ihu Karaiti, ki tōku mana rānei e kōrero ana ki a koe;
11 Nana, ko au e kōrero ana; nana, ko au te māramatanga e tiaho ana i roto i te pōuritanga, ā, mā tōku mana ka hoatu e ahau ēnei kupu ki a koe.
12 Ināianei ā, he pono, he pono tāku e mea atu nei ki a koe, me whakawhirinaki koe ki runga i te Wairua e ārahina ana ki te mahi pai—āe rā, ki te mahi tika, ki te hīkoi māhaki, ki te whakawā tika; ā, koinei tōku Wairua.
13 He pono, he pono tāku e mea atu nei ki a koe, māku taku Wairua e tuku atu ki a koe, māna tō hinengaro e whakamārama, mā konā kikī ai tō wairua i te hari;
14 Kātahi koe ka mōhio, mā konei rānei koe e mōhio, ko ngā mea katoa e hiahia nei koe i ahau, e hāngai ana ki ngā mea o te tika, i runga i te whakapono, e whakapono ana i ahau ka whiwhi koe.
15 Nana, kei te whakahau au i a koe me kaua koe e whakaaro kua karangatia koe ki te kauhau kia karangatia rā anō koe.
16 Tatari poto ake, kia riro i a koe taku kupu, taku kāmaka, taku hāhi, me taku rongopai, kia tino mōhio koe he pono taku whakaakoranga.
17 Kātahi, nana, e rite ana ki ōu hiahia, āe rā, e rite pū ana anō ki tō whakapono e meatia ai ki a koe.
18 Puritia aku whakahaunga; kia nohopuku koe; tono mai ki tōku Wairua;
19 Āe rā, me piri mai ki ahau i runga i tō ngākau katoa, kia āwhina mai i te kukumetanga mai i aua mea kua kōrerotia ake nei ki te māramatanga—āe rā, te whakapākehātanga o aku mahi; kia manawanui kia oti i a koe.
20 Nana, koinei tō mahi, kia puritia aku whakahaunga, āe rā, i runga i te katoa o tō uaua, tō hinengaro, tō kaha hoki.
21 Kaua e whai ki te whakapuaki atu i taku kupu, engari me whai tuatahi atu ki te hopu i taku kupu, kātahi ka wetekina tō arero; kātahi rā koe, me he hiahia ōu, ka riro i a koe te Wairua o taku kupu, āe rā, te mana o te Atua ki te whakapakepaketanga i ngā tāngata.
22 Engari me nohopuku koe ināianei; me ako koe i taku kupu kua tukuna atu ki waenganui i ngā tamariki a te tangata, ā, me ako anō koe i taku kupu e puta ai ki waenganui i ngā tamariki a te tangata, ērā mea rānei e whakapākehātia ana ināianei, āe rā, tae noa ki te wā kua hopukia e koe ērā mea katoa e tuku atu ai au ki ngā tamariki a te tangata i tēnei whakatipuranga, kātahi ka tāpirihia atu ngā mea katoa ki reira.
23 Nana ko Hairama koe, taku tama; whāia atu te kīngitanga o te Atua, kātahi ka tāpirihia atu ngā mea katoa e rite ana ki ērā mea e tika ana.
24 Me hanga ki runga ki taku kāmaka, koia taku rongopai;
25 Kaua e whakakore atu i te wairua whakakitenga, i te wairua poropititanga rānei, nā te mea auē te mate mō te tangata e whakakore atu i ēnei mea;
26 Nō reira, tiakina ki roto i tōu ngākau tae noa atu ki te wā e pai ana ki ahau kia puta atu koe.
27 Nana, kei te kōrero atu au ki te katoa he hiahia pai ō rātou, ā, kua āki iho nei i ā rātou toronaihi hei kokoti.
28 Nana, ko Ihu Karaiti au, te Tama a te Atua. Ko au te oranga me te māramatanga o te ao.
29 Ko au anō tērā i haere mai ai ki ōku ake, ā, kīhai ōku ake i manako mai ki ahau;
30 Engari, he pono, he pono tāku e mea atu nei ki a koutou, nā, ko te hunga katoa e manako mai ki ahau, māku e hoatu mana ki a rātou kia meinga ai hei tama nā te Atua, ki te hunga pū anō e whakapono ai ki runga ki tōku ingoa. Āmine.