1. I ki ahau i roto i taku reta i mua o taku haerenga mai i toku kainga, ka tuhi tonu mai ahau ki a koutou i tena wa, i tena wa, me te tohutohu ano i a koutou mo etahi take maha, ka whakaatu nei ahau inaianei i te rumakanga mo te hunga mate, e mau ake nei tera take i roto i taku ngakau, e mau nei te kaha o te ahuatanga i ahau, mai ano te wa i timata ai te whai a oku hoa riri i a au.

2. I tuhi atu ahau i etahi kupu whakakitenga ki a koutou e pa ana mo te whakaatu. He maha ano nga huarahi i kitea e ahau e pa ana ki tenei take, ka whakaatu nei ahau inaianei. Penei, e whakaatu nei i roto i taku reta o mua kia noho hei whakaatu, hei te tangata i kite me ona kanohi, i rongo me ona taringa, kia whakaatu ai ia i te tika i te aroaro o te Ariki.

3. Na, e pa ana ki tenei take, he mea pakeke ia kia kotahi he kai whakaatu ki reira i nga wa katoa, a he mahi hoki i nga mahi katoa. He whakamama ake i tenei pakeketanga, me tohu he kai whakaatu mo tena peka, mo tena peka i roto i te pa nui, hei te mea mohio ki te whakahaere i nga miniti; mana e whakahaere kia tika, kia tere hoki tana tango i nga whakahaerenga, me tana e whakaatu ano e tika ana, a i kite tonu me ona kanohi, i rongo me ona taringa, me te whakaatu ano i te ra, me nga ingoa, me era atu mea ano hoki, me nga korero ano o taua mahi katoa; me te whakaatu ano hoki i nga ingoa, o te hunga kia tokotoru i reira, me he mea he tangata ano i reira, a e ahei ana kia karangatia, kia whakatika ki aua tuhituhinga, a ko nga kupu a te mangai o tena o tena o aua kai titiro, e whakatika i nga kupu katoa.

4. Tena tetahi hei tino kai whakaatu, hei kai pupuri i nga whakaaturanga, me te whakamau ano i etahi tiwhikete ki runga ake i o ratou ingoa, me te whakaatu ano i a ratou e whakaatu kei te pono. Ko reira te tino kai whakaatu o te Hahi, whakamau ai i aua whakaatu ki runga i te tino pukapuka a te Hahi, i nga tiwhikete me nga haina a nga kai titiro, me tana whakaatu ano kei te tino whakapono ia kei te tika aua whakaatu, me tona mohio ano ki te ahua me nga ahuatanga o aua tangata i tohungia ai e te Hahi. Ki te oti te tuhi ki te tino pukapuka a te Hahi, ka pera ano te tapu o aua whakaaturanga, ka penei ano te ahuatanga me te mea nei i kite tonu, i rongo tonu hoki ona taringa, a me maka ano ki roto i te tino pukapuka a te Hahi.

5. Tena koe e whakaaro i tenei mea kia tino tupatoria, heoi kia rongo mai koe, hei whakautu anake i ta te Atua, hei whakaritenga hoki i nga tikanga me nga whakatautau i whakaritea ai e te Ariki i mua atu o te hanganga o te ao, hei mea e taea ai te whakaora o te hunga i mate i roto i te kauretanga ki te Rongo-pai.

6. E hiahia ana ahau kia mohio atu ano koe ki tenei, ara ko Hoani Whakakitenga e whakamarama ana ia i tenei take tonu, ara i te wahi ki te hunga mate, i a ia i ki, ka kite nei koe i roto i nga Whakakitenga 20: 12—“A i kite ano ahau i te hunga mate, i te hunga ririki me te hunga nunui e tu ana i te aroaro o te Atua; na, kua whakatuwheratia nga pukapuka; kua whakatuwheratia ano hoki tetahi atu pukapuka, ara to te oranga; a kei nga mea i tuhituhia ki aua pukapuka he whakaritenga whakawa mo te hunga mate, he mea whakarite tonu ki a ratou mahi.”

7. Ka kite koutou i roto i enei kupu, tera e tuwhera ana nga pukapuka; me tetahi pukapuka atu ano e tuwhera ano, ko te pukapuka o te ora, a ko te hunga mate e whakawakia ana ki aua mea o roto i aua pukapuka, kia rite ano ki a ratou mahi; no reira ko aua pukapuka kua kiia ake ra koia era ko te pukapuka kei reira nei nga whakaaturanga o a ratou mahi; e whakaatu nei i a ratou mahi i te ao nei, ara i runga i te mata o te whenua. A ko te pukapuka kua kiia ake ra ko te pukapuka o te ora, ko te pukapuka e tuhituhia mai ana i te rangi; e whakamarama ana i nga tohutohu me te mea atu ki a koutou i roto i nga whakakitenga i roto i te reta i tuhia atu ai e ahau i mua atu o toku haerenga atu i taku kainga—koia tera i roto i a koutou whakaaturanga e whakaaturia ano i te rangi.

8. Ko te ahuatanga o tenei tikanga e pa ana ki te mana o te Tohungatanga, i te whakakitenga mai o Ihu Karaiti, e penei nei hoki, ko tau e here ai i te whenua, e herea ano i te rangi, ko tau e wewete ai i te whenua e wetekina ano i te rangi. Me penei ranei, hei titirohanga i tetahi ahua o te whakamaoritanga, ko ta koutou e whakaatu ai i te whenua, e whakaaturia ano i te rangi; a ko ta koutou e kore ai e whakaatu i te whenua, e kore ano e whakaaturia i te rangi; e whakawakia ano hoki ou hunga mate ki aua tuhituhinga i roto i aua pukapuka, kei te ahua ano o ta ratou i mahi ai, pena ranei i ta ratou i mahi ai i roto i te takiwa taanga manawa o o ratou tinana i roto ranei i nga mahi a te tangata i tu ki te kawe i a ia, pera me nga tikanga a te Atua i whakarite ai mai ano o te orokohanganga o te ao hei mea e ora ai ratou, ara kei nga whakaatu te tikanga e whakaatu nei mo o ratou hunga mate.

9. Tena etahi e ki he tino whakahihi rawa nga akoranga e korero nei tatou—he mana hei whakaatu, hei here ranei i te whenua, hei here ranei i te rangi. Ahakoa ano i roto i nga ahuatanga katoa o te ao, kua hoatu e te Ariki he wahi mo te Tohungatanga ki te tangata i runga ano i te whakakitenga, etahi turanga tangata ranei, kei te hoatutia tonutia tenei mana. Na reira, ko nga tangata e mahi ana i enei mana, i runga i te ingoa o te Ariki, i runga ano i te tika o te mahi, me te tiaki ano i ona whakaaturanga, ka riro ana hei ture mo te whenua me te rangi kahore nei e taea te whakakahore, te aronga ia o Ihowa Nui. E tika ana tenei ki ! Ko wai e rongo ?

10. Heoi ko tetahi ano mo te ahuatanga ki te matamua, Matiu 16: 18, 19—“A ko taku kupn ano tenei, Ko koe a Pita, a ka hanga e ahau taku hahi ki runga ki tenei kamaka; e kore ano hoki e taea taua hahi e nga kuwaha o te reinga. A ka hoatu e ahau ki a koe nga kii o te rangatiratanga o te rangi: a ko au e here ai i te whenua e herea ano i te rangi; ko au hoki e wewete ai i te whenua, e wetekia ano i te rangi.”

11. Na, ko te mea tino nui me te mea tino pai o taua mahi, kei mua nei i a tatou, ko te rironga mai o te Tohungatanga Tapu. No te mea ki a ia ki te tangata i hoatu ai enei kii, kaore rawa he wahi hei arai i te matauranga ki te wahi hei whakaoranga mo nga tamariki a te tangata, mo te hunga ora tae atu ki te hunga mate.

12. Kei konei te kororia me te honore, me te orangatonutanga. Te tikanga o te rumaki ki te wai, me whakangaro kia ngaro ki roto i te wai kia pera me te hunga e mate ana, kia tika ai hoki tetahi o nga tikanga ara, tetahi ki tetahi. Ko te ngaronga ki te wai me te aranga ake ano penei me te hunga e ara ake ana i te mate, ara e ara ake ana i o ratou urupa; no reira ko tenei tikanga he mea hanga kia tika mo te rumakanga o te hunga mate, pera te ahua me te matenga.

13. No reira ko te wahi rumakanga i hanga kia rite ki te urupa, a whakaritea ana kia meatia ki raro i te wahi e hui ai te hunga ora, kia mohiotia ai te hunga ora me te hunga mate; kia rite ai tenei mea ki tona ahua, kia rite katoa ano hoki ratou; ara to te whenua kia pera me to te rangi, e ki nei hoki a Paora, i a Koriniti Tuatahi 15: 46, 47, 48.

14. “He ahakoa ra e hara te mea wairua i te tuatahi, engari te mea maori; no muri ko te mea wairua. Te tangata tuatahi no te whenua, he mea oneone: te tangata tuarua ko te Ariki no te rangi. Nga mea oneone rite tonu ki te mea oneone: nga mea o te rangi rite tonu ki te mea o te rangi.” No reira ko nga whakaaturanga o te whenua mo ou hunga mate, e tika nei kua peratia, pera ano hoki o te rangi whakaaturanga. Ko tenei ra hoki, hei hiiritanga, he mana here, a i tetahi aronga o te kupu, ko nga kii o te kingitanga, ara ko te kii o te matauranga.

15. Na, e oku teina aroha, me oku tuahine aroha, kia ki atu ahau ki a koutou koia nei te tikanga mo te hunga mate, me te hunga ora, kahore nei e tika kia kore e manakohia, hei mea e ora ai tatou. Hei mea e ora ai ratou me pera, a hei mea e ora ai hoki tatou me pera ano, a e ki ra hoki a Paora mo nga matua, “Kia kahore tatou e kore ratou e tika,” a kia kore ratou e kore ano hoki tatou e tika.

16. Heoi inaianei, mo te aronga ki te rumaki mo te hunga mate, me korero atu ano ahau i tetahi o nga kupu o Paora, Koriniti Tuatahi, 15: 29: “Penei ka aha te hunga e rumakina ana hei whakakapi mo te hunga mate, ki te kore rawa te hunga mate e ara; he aha hoki ratou ka rumakina ai he whakakapi mo te hunga mate?”

17. Tuarua, mo tena kupu, me ki atu ano ahau i tetahi kupu a te poropiti, kua matatau nei ona mata ki te whakahokinga o te Tohungatanga, tera nga kororia e whakahokia mai a nga ra whakamutunga, a i tona ahua ake ano, i to tenei mea tino whakakororia o nga mea katoa no te Rongo-pai mau tonu nei ia, ara te rumaki o te hunga mate; e ki nei a Maraki, kei te upoko whakamutunga, te 5 me te 6 o nga rarangi, “Na ka tukua atu e ahau a Iraia poropiti, i mua i te taenga mai o te ra whakangaromanga a te Ariki; mana e huri te ngakau o te matua ki nga tamariki me o nga tamariki ki nga matua, kei haere atu ahau a ka patua iho te whenua ki te kanga.”

18. Kia hoatu ano e ahau he whakamaramatanga mo tenei, engari e rite ana ra hoki mo tenei. E rite ana kia mohio ki tenei, ka pakia te whenua ki te kanga, ki te kore he mea hono i waenganui i nga matua me nga tamariki, i runga ano i tetahi ahuatanga, heoi, tena, he aha tera ahuatanga ? Ko te rumakanga mo te hunga mate. No te mea kia kore ratou kaore tatou e tika, a ki te kahore hoki tatou kaore ratou e tika. Kahore hoki ratou me tatou e tika, ki te kore ratou, ara nga mea i mate i roto i te Rongo-pai; e tika ana kia pera i te wa kua tae nei ki te whakaritenga o nga mea katoa; kua tae mai nei inaianei ki te timatanga o taua wa, ki te tino o te whakakotahitanga, me te hononga tahitanga o nga mahi, o nga kii, o nga kaha, a kia tau ano ko te kororia, a kia whakakitea mai ano i te wa i a Arama ki naianei; e hara i te mea ko tenei take anake, engari ko era kahore nei ano i whakakitea mai, mai ano o te orokohanganga o te ao, i tiakina, i huna kei kitea e te matauranga, ka whakakitea mai nei ki nga mea nonohi, ki nga mea ngote u i enei wa.

19. Na, he aha nga mea e rongo nei tatou i roto i te Rongo-pai kua riro mai nei i a tatou? “He reo hari ! he reo aroha no te rangi; he reo pono ano hoki no te whenua; he Rongo-pai mo te hunga mate; he reo hari mo te hunga ora me te hunga mate; ano ra hoki te ataahua ki runga ki nga maunga o nga waewae o nga kai kawe i te Rongo-pai o nga mea pai; hei ki ki Hiona, Nana ! ka kingi tou Atua. Ko te kopata o Kamera, ka pera ano te heke iho o te matauranga o te Atua ki a koutou.”

20. He aha ano tetahi e rongo nei tatou? He Rongopai no Komora! Ko Moronai he anahera no te rangi e whakaatu ana i nga whakaritenga o nga poropititanga—te pukapuka e whakakitea mai. He reo no te Ariki i te koraha o Wheieta, Takiwa o Henaka, e whakaatu ana i nga kai titiro e toru o te pukapuka. Te reo o Mikaera i nga parenga o Hakuahana, e hopu ana i te rewera i tona putanga mai ano he anahera no te maramatanga. Te reo o Pita, o Hemi me to Hoani i te koraha i waenganui o Hamoni, me te Takiwa o Hakuahana, me Korowira, Takiwa o Puruma, i te awa o Hakuahana, e whakaatu ana kei a ratou te kii o te kingitanga, me te raneatanga o nga wa.

21. Tenei ano, ko te reo o te Atua e karanga mai ana i roto i te ruma o Witima, kaumatua, i Wheieta, Takiwa o Henoka, a i nga wa maha, i te tini o te whenua, i nga haere katoa me nga whiunga o nga Hunga Tapu o tenei o te Hahi o Ihu Karaiti o te Hunga Tapu o nga Ra o Muri nei. Me te reo o Mikaera te anahera nui; te reo o Kaperiera, me to Rapaera, me o etahi atu o nga anahera, mai i a Mikaera i a Arama ranei, ki naianei e whakaatu ana i o ratou ahuatanga, i o ratou take, i o ratou kii, i o ratou honore, o ratou taiperu me te kororia, me te mana o to ratou Tohungatanga; me te hoatu i te raina i runga ake i te raina; te akoranga i runga ake i te akoranga; he iti nei tenei, he iti ano tera—e homai nei i te whakamarietanga ki a tatou e pupuru mai nei i te mea kei te haere mai, e whakatuturu nei i a tatou e tumanako atu nei.

22. E oku teina, me kaua tatou e uru ki tenei take nui? Haere tonu atu ki mua, kaua hei hoki whakamuri. Kia hari o koutou ngakau, a kia tino koa ano hoki. Kia hamama ano hoki te whenua ki te waiata. Kia korero ake ano hoki te hunga mate i te waiata whakamoemiti mutunga-kore ki a Kingi Manuera kua whakawahia noatia ake nei i mua atu o te ao, kia ahei ai tatou te whakaora i o ratou herehere; e haere here-kore ano hoki nga herehere.

23. Kia hari nga maunga i te koa. Me koutou ano hoki e nga raorao kia kaha te hamama, me koutou e e nga moana, me nga whenua maroke korerotia nga miharo o to koutou kingi ora tonu. E koutou e nga awa, me nga taheke e rere i te koa. E koutou e nga rakau katoa ano hoki o te parae, whakamoemititia to koutou Ariki; e nga kamaka e tangi ano hoki i te koa. Tukua te ra, te marama me nga whetu o te ata, me nga tamariki ano hoki a te Atua kia hamama me te koa. Tukua ano hoki te kai hanga ora tonu kia whakaatu ano i tona ingoa, a ake tonu atu. A ka penei ake ano ahau, kia pai ano hoki te reo e rongo nei tatou i te rangi, e whakaatu nei i roto i o tatou taringa, i te kororia, i te whakaoranga, me te honore, me te matenga kore, me te oranga-tonutanga; kingitanga, rangatiratanga me nga kaha.

24. Na, kua tae mai te ra nui a te Ariki, a ko wai e noho i te ra o tona taenga mai, ko wai e kaha ki te tu ina ia puta mai; i te mea pena ano ia i te ahi tahi para, me te horoi a te kai horoi; a ka noho me he kai tatari me te kai whakama hiriwa, a ka whakamakia ano e ia nga tamariki a Riwai, ka patua ano me te koura raua ko te hiriwa kia hoatu ai ratou ki te Ariki i te whakahere i runga i te tika. No reira, tena tatou, e te Hahi e nga iwi hoki, e te Hunga Tapu o enei o nga ra o muri nei, ka hoatu ki te Ariki i te whakahere i runga i te tika, tena ano hoki tatou ka hoatu i roto i tona temepara tapu, ina oti, tetahi pukapuka kei reira nei te whakaaturanga mo o tatou mea mate, e tika nei kia whakaaetia.

25. E oku teina, he maha aku korero ki a koutou mo tenei take; a ka whakamutua nei inaianei mo tenei wa, ka korero ano ahau mo tenei take a tetahi atu wa. Ko ahau tenei, ko ta koutou mokai humarie me to koutou hoa pono.