Wāhanga 12
He whakakitenga mā roto i te Hōhepa Mete te Poropiti ki a Hōhepa Naiti Matua., ki Hāmoni Penihiwheinia, Mei 1829. I whakapono a Hōhepa Naiti ki ngā whakapuakitanga a Hōhepa Mete e pā ana ki tana pupuritanga i ngā papa Pukapuka a Moromona me te mahi whakapākehā e mahia ana i taua wā, ā, he nui anō tana tuku rauemi ki a Hōhepa Mete rāua ko tana kaituhi, i āwhina ai i a rāua kia mahi tonu i ngā whakapākehātanga. Ka inoi ake te Poropiti ki te Ariki i runga i te tono a Hōhepa Naiti, nā, ka whiwhi i tēnei whakakitenga.
1–6, Ka whakaorangia ngā kaimahi i roto i te māra waina; 7–9, Ka āwhina te hunga e hiahia ana, e māraurau ana ki te mahi i ngā mahi a te Ariki.
1 Meake puta mai tētahi mahi nui whakamīharo ki waenganui i ngā tamariki a te tangata.
2 Nana, ko au te Atua; kia aro mai ki taku kupu, he mea hohoro, ā, he mea kaha, he koi ake i te hoari matarua, e weheruatia ana ki waenganui ngā ponapona me te hinu wheua; nō reira me aro mai ki taku kupu.
3 Nana, kua mā kē te māra, kua rite mō te kotinga; nō reira, tukua te tangata e hiahia ana ki te kokoti kia āki iho i tana toronaihi i runga i tōna kaha, ā, kia kokoti ai, i te roanga atu o te rā, kia purangatia ake mō tōna wairua te whakaoranga mau tonu i roto i te kīngitanga o te Atua.
4 Āe rā, ko te tangata e āki iho i tana toronaihi kokoti ai, kua karangatia ngā pērā e te Atua.
5 Nō reira, ki te inoi mai ki ahau ka whiwhi koe; ki te pātōtō koe ka tūwhera atu ki a koe.
6 Nā, i te mea kua inoi mai koe, nana, ko taku kupu tēnei ki a koe, puritia aku whakahaunga, ā, whāia atu kia whakaputaina mai me te whakapūmau i te kaupapa o Hīona.
7 Nana, kei te kōrero atu au ki a koe, ki te hunga katoa anō hoki e hiahia ana kia whakaputaina mai, ā, ki te whakapūmau i tēnei mahi;
8 Ā, kāore e āhei ana i tētahi te āwhina i tēnei mahi ki te kore ia e ngākau pāpaku, ā, e kikī ana i te aroha, e whai whakapono ana, e whai tūmanako ana, me te aroha noa, e manawanui ana i roto i ngā mea katoa, ahakoa he aha te mea e tukua hei tiakanga māna.
9 Nana, ko au te māramatanga me te oranga o te ao, e kōrero ake nei i ēnei kupu, nō reira kia aro mai i runga i tō kaha katoa, kātahi koe ka karangatia. Āmine.