Wāhanga 14
He whakakitenga mā roto i a Hōhepa Mete te Poropiti ki a Rāwiri Witima, ki Wheiete, Niu Ioka, Hune 1829. I tino whaiwhakaaro te whānau Witima ki te whakapākehātanga o te Pukapuka a Moromona. I noho te Poropiti i te kāinga o Pita Witima Matua., ka noho i reira tae noa atu ki te whakaotinga o ngā mahi whakapākehātanga, ā, ki te hopuranga anō o ngā tikanga manatā mō te pukapuka meake ka puta mai. I whiwhi whakaaturanga ia o ngā tama Witima tokotoru e pā ana ki te pono o ngā mahi, kātahi ka tino aro atu ngā whakaaro ki ā rātou ake haepapa. I hoatu nei tēnei whakakitenga me ngā mea e rua whai muri iho (ngā wāhanga 15 me 16) hei whakautu i tētahi inoi i meatia nei mā roto i te Urama me te Tāmama. Nāwai rā ka meinga a Rāwiri Witima hei kaiwhakaatu i roto i ngā Kaiwhakaatu Tokotoru mō te Pukapuka a Moromona.
1–6, Ka whakaorangia ngā kaimahi i roto i te māra waina; 7–8, Ko te oranga tonutanga te takoha nui o ngā takoha o te Atua; 9–11, I hangaia e te Atua ngā rangi me te whenua.
1 Meake puta mai tētahi mahi nui whakamīharo ki waenganui i ngā tamariki a te tangata.
2 Nana, ko au te Atua; kia aro mai ki taku kupu, he mea hohoro, ā, he mea kaha, he koi ake i te hoari matarua, e weheruatia ana ki waenganui ngā ponapona me te hinu wheua; nō reira me aro mai ki taku kupu.
3 Nana, kua mā kē te māra, kua rite mō te kotinga; nō reira, tukua te tangata e hiahia ana ki te kokoti kia āki iho i tana toronaihi i runga i tōna kaha, ā, kia kokoti ai, i te roanga atu o te rā, kia purangatia ake mō tōna wairua te whakaoranga mau tonu i roto i te kīngitanga o te Atua.
4 Āe rā, ko te tangata e āki iho ana i tana toronaihi kokoti ai, kua karangatia ngā pērā e te Atua.
5 Nō reira, ki te inoi mai ki ahau ka whiwhi koe; ki te pātōtō koe ka tūwhera atu ki a koe.
6 Me whai ki te whakaputa me te whakapūmau i tōku Hīona. Puritia aku whakahaunga i roto i ngā mea katoa.
7 Ā, ki te pupuri koe i aku whakahaunga me te tākare atu ki te mutunga ka whiwhi koe i te oranga tonutanga, koia te takoha nui o ngā takoha katoa o te Atua.
8 Ā, ka pahawa ake, nā, ki te inoi ake ki te Matua i runga i tōku ingoa, e whakapono ana, ka whiwhi koe i te Wairua Tapu, e whakapuaki ana, kia tū ai koe hei kaiwhakaatu o ngā mea e rongo ai, e kite ai, waihoki, kia whakapuaki atu koe i te rīpenetātanga ki tēnei whakatipuranga.
9 Nana, ko au a Ihu Karaiti, te Tama a te Atua ora, nāna ngā rangi me te whenua i hanga, he māramatanga e kore e taea te huna i roto i te pōuritanga;
10 Nā reira, me whakaputa e au te raneatanga o taku rongopai mai i ngā Tauiwi ki te whare o Iharaira.
11 Ā nana, ko Rāwiri koe, ā, kua karangatia koe hei āwhina; ki te pērātia e koe, ā, ki te ū, ka manaakitia koe ki te taha wairua me te taha tīnana, ā, ka nui tō utu. Āmine.