Wāhanga 18
He whakakitenga mā roto i a Hōhepa Mete te Poropiti ki a Oriwa Kautere rāua tahi ko Rāwiri Witima, ki Wheiete, Niu Ioka, Hune 1829. E ai ki te Poropiti, i whakamōhiotia atu e tēnei whakakitenga “te karangatanga ake o ngā āpōtoro tekau mā rua i ēnei rā whakamutunga, me ngā tohutohu e hāngai ana ki te hanganga ake o te Hāhi.”
1–5, Ka whakamōhio ngā karaipiture me pēhea e hanga ake ai te Hāhi; 6–8, Kei te pakari haere te ao i runga i te hē; 9–16, He nui te utu o ngā wairua; 17–25, Me tango ake te tangata ki runga ki a rātou te ingoa o te Karaiti kia riro ai te whakaoranga i a rātou; 26–36, Ka huraina ake te karangatanga me te mīhana a te Tekau Mā Rua; 37–39, Me rapu a Oriwa Kautere rāua ko Rāwiri Witima i te Tekau Mā Rua; 40–47, me rīpenetā, me rumaki, ā, me pupuri i ngā whakahaunga kia riro ai te whakaoranga i te tangata.
1 Nana, māku ēnei kupu e hoatu ki a koe nā taua mea i hiahia ai koe, e taku pononga e Oriwa Kautere i ahau:
2 Nana, kua whakakitea atu e au ki a koe, mā tōku Wairua i ngā wā maha, nā, he pono ngā mea kua tuhia nei e koe, nā reira e mōhio ana koe he pono ērā mea.
3 Ā, mehemea e mōhio ana koe he pono ērā mea, nana, ka hoatu e au tētahi whakahaunga ki a koe, kia whakawhirinaki koe ki runga i ngā mea kua tuhituhia iho nei;
4 Nā te mea kua tuhia iho i roto rā ngā mea katoa e pā ana ki te tūāpapa o taku hāhi, taku rongopai, me taku kāmaka.
5 Nā reira, ki te waihanga ake koe i taku hāhi, ki runga i te tūāpapa o taku rongopai me taku kāmaka, kāore kōrua e taea e ngā kūaha o te ao rēwera.
6 Nana, kei te pakari haere te ao i runga i te kino; ā, e tika pū ana kia whakaohoohokia ake ngā tamariki a te tangata ki te rīpenetātanga, arā, ngā Tauiwi me te whare o Iharaira.
7 Nā reira, i te mea kua rumakina koe e ngā ringaringa o taku pononga a Hōhepa Mete, Tama., e rite ana ki ērā mea kua whakahau au ki a ia, kua tutuki i a ia tāku i whakahau atu nei ki a ia.
8 Ināianei ā, kaua e mīharo mōku i karanga i a ia ki tāku ake take, he take e mōhiotia ana i roto i ahau; nā reira, ki te ū ia ki te pupuri i aku whakahaunga ka manaakitia ia ki te oranga tonutanga; ā, ko Hōhepa tōna ingoa.
9 Ināianei ā, e Oriwa Kautere, kei te kōrero atu ahau ki a koe, ki a koe hoki e Rāwiri Witima, mā runga i te whakahaunga; nana rā, e whakahau ana au i ngā tāngata i ngā wāhi katoa kia rīpenetā, ā, kei te kōrero atu ahau ki a kōrua e rite pū ana ki tāku ki taku āpōtoro a Paora, nā te mea kua karangatia kōrua ki taua karangatanga anō i karangatia ai ia.
10 Kia mahara he nui te utu o ngā wairua i te tirohanga a te Atua;
11 Nana rā, i whakamamaetia te Ariki tō kōrua Kaihoko kia mate i roto i te kikokiko; nā reira i whakamamaetia ia ki te mamae o ngā tāngata katoa, kia rīpenetā ai ngā tāngata katoa, ā, kia haere mai ki a ia.
12 Ā, kua ara ake anō ia i te mate, kia kukume mai ia i ngā tāngata katoa ki a ia, i runga i ngā tikanga o te rīpenetātanga.
13 Ā, anō te nui o tōna hari mō te wairua e rīpenetā ana!
14 Nā reira, kua karangatia kōrua ki te karanga ake i te rīpenetātanga ki tēnei iwi.
15 Ā, ki te mea ka whakapau ā kōrua rā ki te karanga ake i te rīpenetātanga ki tēnei iwi, me te kukume, hāunga ko te wairua kotahi ki ahau, anō te nui o tō kōrua hari me ia i roto i te kīngitanga o tōku Matua!
16 Ināianei ā, mehemea ka nui tō hari mō te wairua kotahi e kūmea mai ai ki ahau ki roto i te kīngitanga o tōku Matua, anō te nui o tō kōrua hari mēnā ka kūmea mai e kōrua ngā wairua tokomaha ki ahau!
17 Nana, kei a kōrua taku rongopai i mua i a kōrua, me taku kāmaka, me taku whakaoranga.
18 Inoia te Matua i runga i tōku ingoa, e whakapono ana ka whiwhi kōrua, ā, ka riro i a kōrua te Wairua Tapu, e whakakitea atu ai ngā mea katoa e tika ana ki ngā tamariki a te tangata.
19 Ā, ki te kore ō kōrua whakapono, tūmanako, aroha noa, kāore e taea e kōrua te aha.
20 Kaua e tautohetohe atu ki tētahi hāhi, hāunga ko te hāhi o te rēwera ia.
21 Tangohia ake ki runga ki a kōrua te ingoa o te Karaiti, ā, kōrerohia ake te pono i runga i te whaiwhakaaro.
22 Ā, ko ngā tangata katoa e rīpenetā ai, ā, e rumakina ai i runga i tōku ingoa, koia nei ko Ihu Karaiti, me te ū ki te mutunga, koia anō te mea e whakaorangia ai.
23 Nana, ko Ihu Karaiti te ingoa i homai ai e te Matua, ā, kāore i homai he ingoa kē atu mā reira ora ai te tangata;
24 Nā reira, me tango ngā tangata katoa i te ingoa i homai ai e te Matua, nā te mea mā taua ingoa karangatia ai rātou hei te rā whakamutunga;
25 Nā reira, ki te kore rātou e mōhio ki te ingoa e karangatia ai rātou, e kore rawa rātou e whai wāhi atu i roto i te kīngitanga o tōku Matua.
26 Ināianei ā, nana, kua karangatia ake ētahi atu ki te whakapuaki i taku rongopai, ki te Tauiwi me te Hūrai;
27 Āe rā, ko te Tekau Mā Rua pū anō; ā, ka meinga te Tekau Mā Rua hei apataki māku, ā, ka tangohia ake ki runga ki a rātou tōku ingoa; ā, ko te Tekau Mā Rua te hunga e hiahia ai ki te tango ake ki runga ki a rātou tōku ingoa i runga i te kaha katoa o te ngākau.
28 Ā, ki te hiahia rātou ki te tango ake i tōku ingoa i runga i te kaha katoa o te ngākau, kua karangatia rātou kia haere atu ai ki te ao katoa ki te kauhau i taku rongopai ki ngā mea katoa.
29 Ā, ko rātou te hunga kua whakaūngia e au kia rumaki i runga i tōku ingoa, e rite ana ki ērā mea kua oti nei te tuhi;
30 Ā, kei a kōrua ērā mea kua oti nei te tuhi i ō kōrua aroaro; nā reira, me mahi kōrua kia rite ki ngā kupu kua oti nei te tuhi.
31 Ināianei ā, kei te kōrero atu au ki a koutou, e te Tekau Mā Rua—Nana, kua ranea tōku aroha mō koutou; me hīkoi tōtika i tōku aroaro, ā, me kaua e hara.
32 Ā, nana, ko koutou te hunga kua whakamanangia e ahau kia whakamana ai i ngā pirīhi me ngā kaiako; ki te whakapuaki atu i taku rongopai, e rite ana ki te mana o te Wairua Tapu kei roto nei i a kōrua, ā, e rite ana anō ki ngā karangatanga me ngā takohatanga a te Atua ki te tangata;
33 Ā, nāku, nā Ihu Karaiti, nā tō koutou Ariki me tō koutou Atua i kōrero ai.
34 Ehara ēnei kupu i te mea nā ngā tāngata, nā te tangata rānei, engari nāku; nā reira, ka whakaatu atu koutou nāku ēnei kōrero ehara i te tangata;
35 Nā, nōku te reo e kōrero atu nei i ēnei mea ki a koutou; nā te mea kua hoatu e tōku Wairua ki a koutou, ā, mā tōku mana e taea ana e koutou te pānui atu i ēnei mea tētahi ki tētahi; ā, me i kore tōku mana kua kore ēnei mea e riro i a koutou;
36 Nā reira, ka taea e koutou te whakaatu atu, nā, kua rongo koutou i tōku reo, ā, e mōhio ana anō ki aku kupu.
37 Ināianei ā, nana, kei te hoatu e au ki a kōrua e Oriwa Kautere me Rāwiri Witima, kia rapua te Tekau Mā Rua, nō rātou nei te hiahia ki aua mea kua kōrerotia ake nei e ahau;
38 Ā, mā ō rātou hiahia me ā rātou mahi e mōhio ai kōrua ki a rātou.
39 Ā, ina kitea rātou e kōrua me whakakite atu kōrua i ēnei mea ki a rātou.
40 Ā, me tāpapa iho kōrua, ā, ka koropiko ai ki te Matua i runga i tōku ingoa.
41 Ā, me kauhau atu e kōrua ki te ao, e mea ana: Me rīpenetā koutou, ā, me rumaki, i runga i te ingoa o Ihu Karaiti;
42 Nā te mea me rīpenetā, ā, me rumaki ngā tangata katoa, ehara i te mea ko ngā tāne anake, engari ko ngā wāhine, me ngā tamariki kua tae ake ki ngā tau e mōhio ai rātou ki te pai me te kino.
43 Ināianei ā, whai muri iho i tā kōrua whiwhinga i tēnei, me pupuri i ngā whakahaunga i roto i ngā mea katoa;
44 Ā, mā ō kōrua ringaringa ka mahia e au tētahi mahi whakamīharo ki waenganui i ngā tamariki a te tangata, tae atu ana ki te whakapakepaketanga i ngā mea tokomaha mō ō rātou hara, kia haere mai ai rātou ki te rīpenetātanga, ā, kia haere mai ai rātou ki te kīngitanga o tōku Matua.
45 Nā reira, kei runga i ngā mea katoa ngā manaakitanga e hoatu nei e au ki a kōrua.
46 Ā, whai muri iho i tā kōrua whiwhinga i tēnei, ki te kore kōrua e pupuri nei i aku whakahaunga, kāore kōrua e whakaorangia i roto i te kīngitanga o tōku Matua.
47 Nana, nāku, nā Ihu Karaiti, tō kōrua Ariki me tō kōrua Atua, me tō kōrua Kaihoko, i kōrero i runga i te mana o tōku Wairua. Āmine.