Ko te
Whakaakoranga me ngā Kawenata
Wāhanga 1
He whakakitenga mā roto i a Hōhepa Mete te Poropiti, i te 1 o Noema, 1831, i roto i tētahi hui motuhake o ngā erata o te Hāhi, i whakatūria ki Hairama, Ohaio. He maha ngā whakakitenga i whiwhi ai i te Ariki i mua i tēnei wā, ā, ko te kohikohinga o ēnei mea hei tānga ki tētahi pukapuka tētahi o ngā mea i kōkirihia ake i te huinga nei. Ko te wāhanga nei te kupu takamua ki ā te Ariki whakaakoranga, kawenata, me ngā whakahaunga kua homai nei i tēnei wā i tohua ai e te Ariki.
1–7, Kua tukuna atu te reo whakatūpato ki ngā tāngata katoa; 8–16, Ka puta te Whakaparahakotanga me te whakariharihatanga i mua i te Haerenga Tuaruatanga Mai; 17–23, Ka karangatia a Hōhepa Mete ki te whakahoki mai i ngā pono me ngā mana o te Ariki ki runga i te whenua; 24–33, Ka whakaputaina mai te Pukapuka a Moromona, ā, ka whakapūmauhia te Hāhi pono; 34–36, Ka tangohia atu te maungārongo i te whenua; 37–39, Rangahaua ēnei karaipiture.
1 Whakarongo, E koutou, e ngā tāngata o taku hāhi, e ai tā te reo o te mea e noho tiketike ana, ā, e tau iho nei tana titiro ki runga ki ngā tāngata katoa; āe rā, he pono tāku e mea atu nei: Whakarongo mai e koutou, e ngā tāngata nō tawhiti; me koutou anō kei ngā moutere o te moana, whakarongo ngātahi mai.
2 Nā, he pono, ki ngā tāngata katoa te reo o te Ariki, ā, kāore tētahi e mawhiti atu; ā, kāore tētahi karu e kore nei e kite, kāore rānei tētahi taringa e kore nei e rongo, kāore rānei tētahi ngākau e kore nei e ngotoa.
3 Ā, ka werohia te hunga haututū ki te pōuritanga nui; nā te mea ka kōrerohia ō rātou hē i ngā tuanui o ngā whare, ā, ka hurahia ā rātou meatanga huna.
4 Ā, ki ngā tāngata katoa te reo whakatūpato, he mea mā ngā māngai o aku apataki, kua kōwhiria mai nei e ahau i ēnei rā whakamutunga.
5 Ā, ka haere atu rātou, ā, e kore hoki rātou e whakawarea e tētahi, nā te mea nāku, nā te Ariki rātou i whakahau.
6 Nana, nōku tēnei mana, ā, nō aku pononga anō te mana, ā, ko taku kupu takamua ki te pukapuka o aku whakahaunga, kua hoatu nei e au ki a rātou kia whakaputaina atu ki a koutou, E te hunga e noho ana i runga i te whenua.
7 Nā reira, me wehi, ā, me wiri, E koutou e te iwi, nā te mea ka tutuki tāku, tā te Ariki i whakapuaki ai ki roto i aua mea.
8 Ā, he pono tāku e mea atu nei ki a koutou, nā, ko te hunga e haere atu ai, e whakaatu atu ana i ēnei rongo kōrero ki ngā iwi e nohoia nei te whenua, kua hoatu he mana ki a rātou kia hīria ake i runga i te whenua, ā, i roto anō i te rangi, te hunga whakapono kore me te hunga haututū;
9 Āe rā, he pono, kia hīria ake rātou mō te rā e maringihia mehua-koretia iho te riri o te Atua ki runga i te hunga whakarihariha—
10 Tae atu ana ki te rā e haere mai ai te Ariki kia hoatu utu ki ia tangata, ia tangata kia rite ki āna mahinga, ki te mehua atu ki ia tangata, ia tangata e rite ana ki tāna i mehua ai ki ana huānga.
11 Nā reira puta atu ai te reo o te Ariki ki ngā tōpito katoa o te ao, kia rongo ai te hunga katoa e whakarongo ai:
12 Whakatakatū koutou, whakatakatū koutou mō ērā mea e puta mai ai, nā te mea kua tata mai te Ariki;
13 Ā, kua mura te riri o te Ariki, ā, kua whakamākūria tana hoari i te rangi, ā, ka taka iho ki runga ki ngā tāngata e nohoia ana te whenua.
14 Ā, ka huraina te ringa o te Atua; ā, ka tae mai te rā e hātepea atu ai i waenganui i tōku iwi te hunga e kore nei e whakarongo ki te reo o te Ariki, e kore rānei e whakarongo ki te reo o ana pononga, e kore rānei e aro noa atu ki ngā kupu a ngā poropiti me ngā āpōtoro.
15 Nā te mea kua kōtiti atu rātou i aku tikanga tapu, ā, kua whatia iho taku kawenata mau tonu;
16 Kāore rātou e whaiwhai atu i te Ariki kia whakapūmauhia tōna tika, engari ka hīkoi tēnā tangata me tēnā tangata i runga i tōna ake huarahi, i runga i te āhuatanga ake anō o tōna ake Atua, ko tōna āhuatanga e rite ana ki tō te āhua o te ao, ā, ko tōna whakapūmautanga he whakapūmautanga whakapakoko, e waikura haere, ā, ka ngaro atu i Papurona, ko Papurona nui pū anō, e hinga iho ai.
17 Nā reira, ko au te Ariki, e mōhio ana ki ngā aituā e tau mai nei ki runga i te hunga e nohoia nei te whenua, kua karangatia nei taku pononga a Hōhepa Mete, Tama., ā, ka kōrero atu ki a ia mai i te rangi, ā, ka hoatu ki a ia he whakahaunga;
18 Ā, i hoatu anō hoki he whakahaunga ki ētahi atu, kia whakapuakina atu e rātou ēnei mea ki te ao; ā, ēnei mea katoa kia whakatutukihia tērā, kua tuhia e ngā poropiti—
19 Ka puta mai ngā mea ngoikore o te ao hei turaki iho i ngā mea mārohirohi me ngā mea kaha, kia kore ai te tangata e tohutohu i ana huānga, e whakawhirinaki rānei ki te ringaringa kikokiko—
20 Engari ka kōrero ia tangata, ia tangata i runga i te ingoa o te Ariki, te Kaiwhakaora pū anō o te ao;
21 Kia whakarahi ake te whakapono i runga i te whenua;
22 Kia whakapūmauhia taku kawenata mau tonu;
23 Kia whakapuakina atu te raneatanga o tōku rongopai e te hunga ngoikore me te hunga māhaki ki ngā tōpito katoa o te ao, i mua i ngā kīngi me ngā kaiwhakahaere.
24 Nana, ko au te Atua, ā, nāku nei i kōrero; nāku ēnei whakahaunga, ā, kua hoatu nei ki aku pononga i roto i tō rātou ngoikoretanga, i runga i te ritenga o tō rātou reo, e puta mai ai te māramatanga ki a rātou.
25 Ā, ki te mea ka kōtiti rātou ka whakamōhiotia atu;
26 Ā, ki te mea ka rapu mātauranga rātou ka whakaakona rātou;
27 Ā, ki te mea ka hara rātou ka kohetehia, kia taea ai e rātou te rīpenetā;
28 Ā, ki te mea ka whakaiti rātou ka whakakahangia rātou, ā, ka manaakitia nō runga, ā, ka whiwhi mātauranga mai i tēnei wā ki tēnei wā.
29 Ā, whai muri iho i te whiwhinga i te tuhinga a ngā Nīwhai, āe rā, ka kaha i taku pononga pū anō a Hōhepa Mete, Tama., kia whakapākehātia mā roto i te aroha o te Atua me te mana o te Atua, te Pukapuka a Moromona.
30 Ā, ki te hunga anō hoki i hoatu ai ēnei whakahaunga, kia whaimana anō rātou ki te whakatakoto iho i te tūāpapa o tēnei hāhi, me te whakaputa i te kākarauritanga me te pōuritanga, te hāhi pono anake, te hāhi ora i runga i te mata katoa o te whenua, nā konā au, te Ariki, i āhuareka ai—
31 Nā te mea tē taea e au te Ariki te titiro iho ki runga i te hara ahakoa he iti rawa me te whakaae anō.
32 Hei aha koa, ka murua ngā hara o te tangata e rīpenetā ana me te mahi i ngā whakahaunga a te Ariki;
33 Ā, ka tangohia atu i te tangata e kore nei e rīpenetā te māramatanga i whiwhi nei ia; nā te mea e kore tonu taku wairua e tohe tonu ki te tangata, e ai tā te Ariki o ngā Mano.
34 Hei āpiti anō, he pono tāku e mea atu nei ki a koutou, E ngā tāngata e nohoia nei te whenua: E hiahia ana ahau te Ariki kia whakamōhiotia atu ēnei mea ki ngā kikokiko katoa;
35 Nā te mea ehara au i te mea whakapai kanohi, ā, e hiahia ana kia mōhio ngā tāngata katoa e wawe ana te putanga mai o te rā; kāore anō kia tae mai te haora, engari e tata mai ana, ina tangohia atu te maungāronga i te whenua, ā, ka whaikaha te rēwera i runga i tōna ake kīngitanga.
36 Hei āpiti anō, ka whakakaha te Ariki i runga i ōna hunga tapu, ā, ka kīngi ia i tō rātou aroaro, ā, ka heke iho mai i runga i te whakawākanga ki runga i a Itumea, te ao rānei.
37 Rangahaua ēnei whakahaunga, nā te mea he tika, he pono, ā, ka whakatutukihia katoatia ngā poropititanga me ngā kupu whakaari i roto rā.
38 Ko tāku, tā te Ariki i kōrero ai, nāku i kōrero, ā, kāore aku whakapāha mōku ake anō; ahakoa ka pahemo atu ngā rangi me te whenua, e kore nei taku kupu e pahemo atu, engari ka whakatutukihia katoatia, ahakoa mā tōku ake reo, mā te reo rānei o aku pononga, he rite tonu.
39 Nana rā, titiro, ko te Ariki ko ia te Atua, ā, e whakaaturia mai nei e te Wairua, ā, he pono te whakaaturanga, ā, ka tūturu tonu te pono mō āke tonu atu. Āmine.