Wāhanga 21
He whakakitenga mā roto i a Hōhepa Mete te Poropiti, ki Wheiete, Niu Ioka, Aperira 6, 1830. I hoatu tēnei whakakitenga i te whakatūnga ake o te Hāhi, i runga i te rā i kōrerotia ake nei, i te kāinga o Pita Witima Matua. I uru atu ngā tāne tokoono kātahi anō ka rumakina. Nō runga i te pōti whānui ka whakapuakina mai e ēnei tāngata te hiahia me te ū o te whakaaro ki te whakarite, e rite ana ki te whakahau a te Atua (tirohia wāhanga 20). I pōti anō rātou kia whakaae, ā, kia tautoko i a Hōhepa Mete Tama. rāua tahi ko Oriwa Kautere hei kaiwhakariterite mō te Hāhi. Kātahi ka whakamana a Hōhepa i a Oriwa hei erata nā te Hāhi, nā Oriwa anō a Hōhepa i whakamana. Whai muri i te whakatapunga o te hakarameta, ka whakapā a Hōhepa rāua ko Oriwa i ō rāua ringaringa ki runga i aua tāngata takitahi mō te hoatutanga o te Wairua Tapu me te whakaū i ia tangata hei mema o te Hāhi.
1–3, Ka karangatia a Hōhepa Mete hei matakite, hei kaiwhakapākehā, hei poropiti, hei āpōtoro, hei erata hoki; 4–8, Mā tana kupu te kaupapa Hīona e ārahi; 9–12, Ka whakapono te hunga tapu i ana kupu i a ia e kōrero ana mā runga i te Kaiwhakaāio.
1 Nana, me mea tētahi tuhituhinga i waenganui i a koutou; ā, ka karangatia koe i roto rā he matakite, he kaiwhakapākehā, he poropiti, he āpōtoro hoki nā Ihu Karaiti, he erata nā te hāhi mā roto i te hiahia a te Atua te Matua, me te aroha o te Ariki a Ihu Karaiti,
2 I runga i te mea kua whakaaweawehia koe e te Wairua Tapu kia whakatakotohia iho tō reira tūāpapa, me te hanga ake ki te whakapono tino tapu rawa.
3 Kua whakaritea, ā, kua whakapūmauhia taua hāhi i te tau o te Ariki kotahi mano e waru rau e toru tekau, i te marama tuawhā, i runga i te rā tuaono o te marama e kīa nei ko Aperira.
4 Nā reira, ko te hāhi tāku e mea nei, me aro katoa ki āna kupu me āna whakahaunga e hoatu ai e ia ki a koutou i te wā e whiwhi ai ia i aua mea, e hīkoi ana i runga i te tapu katoa i tōku aroaro;
5 Nā te mea ka whiwhi koutou i tana kupu, me te mea nei nō tōku ake māngai, i runga i te manawanui katoa me te whakapono.
6 Nā te mea mā te meatanga i ēnei mea kua kore koutou e taea e ngā kūaha o te ao rēwera; āe rā, mā te Ariki te Atua e whakamarara atu ngā mana o te pōuritanga i mua i a koutou, ā, ka whakangāueuetia e ia ngā rangi hei painga mō koutou, ā, i runga i te korōria o tōna ingoa.
7 Nā te mea e ai tā te Ariki te Atua: Kua whakaweawehia ia e ahau kia kōkiri ai i te kaupapa Hīona i runga i te kaha nui mō te pai, ā, e mōhio ana au ki tōna ū, ā, kua rongo au i ana inoi.
8 Āe rā, kua kitea e au tana tangihanga mō Hīona, ā, māku e mea kia kaua ia e tangi tonu mōna; nā te mea kua tae mai ōna rā harikoa tae noa atu ki te murunga i ōna hara, me te whakakitenga o aku manaakitanga ki runga i ana mahinga.
9 Nā te mea, nana, māku e manaaki te hunga katoa e mahi nei i roto i taku māra waina ki tētahi manaakitanga nui, ā, ka whakapono rātou ki ana kupu, he mea hoatu ki a ia e au mā roto i te Kaiwhakaāio, e whakakitea atu, nā, kua rīpekahia a Ihu e ngā tāngata hara mō ngā hara katoa o te ao, āe rā, mō te murunga hara o te ngākau marū.
10 Nā reira e tika ana tēnei ki ahau kia whakamanaia ia e koe, e Oriwa Kautere e taku āpōtoro;
11 Koinei hei tikanga tapu ki a koe, nā, he erata koe i raro i tōna ringa, koia te mea tuatahi ki a koe, kia tū ai koe hei erata mō tēnei hāhi o te Karaiti, e mau nei tōku ingoa—
12 Ā, ko te kaikauhau tuatahi o tēnei hāhi mō tēnei hāhi, ā, i mua i te ao, āe rā, i mua i ngā Tauiwi; āe rā, pēnei tā te Ariki te Atua, nana, nana! ki ngā Hūrai hoki. Āmine.