Wāhanga 33
He whakakitenga mā roto i a Hōhepa Mete te Poropiti ki a Etara Teia rāua ko Notarapa Tuiti, ki Wheiete, Niu Ioka, Oketopa 1830. I te whakamōhiotanga atu e pā ana ki tēnei whakakitenga, ka tautoko te hītori o Hōhepa Mete i te kōrero “e rite ana te Ariki … ki te tohutohu i te hunga pērā e kaha ana ki te rapu i runga i te whakapono.”
1–4, kua karangatia ngā kaimahi ki te whakapuaki atu i te rongopai i roto i te hāora tekau mā tahi; 5–6, Ka whakapūmauhia te Hāhi, ā, ka whakakaohia te hunga kōwhiria; 7–10, E rīpenetā, i te mea kua tata mai te kīngitanga o te rangi; 11–15, Kua hangaia ake te Hāhi i runga i te kamaka o te rongopai; 16–18, Whakaritea mō te haerenga mai a te Tāne Taumau.
1 Nana, ko taku kupu tēnei ki a kōrua e aku pononga, e Etara kōrua ko Notarapa, whakapuaretia ō kōrua taringa kia rongo ai i te reo o te Ariki tō kōrua Atua, ko tana kupu he mea hohoro, ā, he kaha, he koi ake i tētahi hoari matarua, ā, wehea noatia ngā ponapona me te hinu wheua; te ngākau me te wairua; ā, e āhei ana ia te kite atu i ngā whakaaro me ngā hiahia o te ngākau.
2 He pono, he pono tāku e mea atu nei ki a kōrua, nā, kua karangatia kōrua kia hīkina ake ō kōrua reo kia rite ki te reo o tētahi tētere, ki te whakapuaki i taku rongopai ki tētahi whakatipuranga parori kē, upoko mārō.
3 Nana rā, kua mā te māra, kua rite mō te kotinga; ā, kua eke ki te hāora tekau mā tahi, ā, ko te wā whakamutunga e karanga ai au i ngā kaimahi ki roto i taku māra wāina.
4 Ā, kua meinga kia pokea taku māra waina katoa; ā, kāore he mea kotahi e mahi pai ana hāunga ētahi mea ruarua; ā, ka hē rātou i ngā āhuatanga maha nā ā rātou mahi tohunga rapu taonga, he hinengaro poke ō rātou katoa.
5 Ā, he pono, he pono, tāku e mea atu nei ki a kōrua, nā, nāku tēnei hāhi i whakapūmau, ā, i kūmea mai e au ki waho i te koraha.
6 Waihoki ka kohikohi au i aku mea kōwhiria mai i ngā tōpito e whā o te ao, te hunga katoa e whakapono ai i ahau, me te whakarongo ki aku kupu.
7 Āe rā, he pono, he pono, tāku e mea atu nei ki a kōrua, nā, kua mā kē te māra, kua rite mō te kotinga; nā reira, ākina iho ō kōrua toronaihi, kokoti ai i runga i te whakapaunga o ō kōrua kaha, ō kōrua hinengaro, me ō kōrua mārohirohi.
8 Whakatūwheratia ō kōrua māngai, ā, ka whakakīa, ā, ka rite kōrua ki a Nīwhai onamata, i haere mai i Hiruharama ki roto i te koraha.
9 Āe rā, whakatūwheratia ō kōrua māngai, ā, kaua e ārai kupu, kātahi ka utaina ngā paihere ki runga i ō kōrua tuarā, nā te mea nana, kei tō kōrua taha au.
10 Āe rā, whakatūwheratia ō kōrua māngai, ā, ka whakakīa ake, e mea ana: E rīpenetā, rīpenetā, whakaritea e koutou te huarahi o te Ariki, ā, meatia kia tōtika ana ara; nā te mea kua tata mai te kīngitanga o te rangi;
11 Āe rā, e rīpenetā kia rumakina, tēnā me tēnā o koutou, mō tētahi murunga i ō koutou hara; āe rā, kia rumakina ki te wai pū anō, kātahi ka tau mai te rumakitanga o te ahi me te Wairua Tapu.
12 Nana, he pono, he pono tāku e mea atu nei ki a kōrua, koinei taku rongopai; ā, kia mahara me whaiwhakapono rātou ki ahau, ki te kore e kore rātou e taea te whakaora;
13 Ā, ka hanga au i taku hāhi i runga i tēnei kāmaka; āe rā, kua hangaia kōrua i runga i tēnei kāmaka, ā, ki te ū tonu kōrua, e kore ngā kūaha o te ao rēwera e whaikaha ki runga i a kōrua.
14 Ā, ka maumahara hoki kōrua ki te pupuri i ngā tikanga me ngā kawenata o te hāhi.
15 Ā, ka whakaū kōrua i te hunga whaiwhakapono ki roto i taku hāhi, mā runga i te whakapānga o ngā ringaringa, ā, ka whakatau iho te takohatanga o te Wairua Tapu ki runga i a rātou.
16 Ā, kua hoatu e au te Pukapuka a Moromona me ngā karaipiture tapu ki a koutou hei whakaako i a kōrua; ā, ka tere ake ngā mea katoa i te mana o taku Wairua.
17 Nā reira, kia ū ki te pono, kia inoi tonu, kia pai hoki ā kōrua rama, kia kā ana, ā, kia whaihinu anō kōrua, kia rite ai kōrua hei te haerenga mai o te Tāne Taumau—
18 Nana rā, he pono, he pono tāku e mea atu nei ki a kōrua, nā, ka hohoro taku haerenga mai. Koia anō tēnei. Āmine.