Wāhanga 35
He whakakitenga ki a Hōhepa Mete te Poropiti rāua ko Hirini Rikitana, e tata ana ki Wheiete, Niu Ioka, Tīhema 7, 1830. I taua wā, i te mahi te poropiti i te nuinga o ngā rā i ngā mahi whakapākehā o te Paipera. I tīmata noa te whakapākehātanga i te Hune 1830, he kaituhi a Oriwa Kautere rāua tahi ko Hoani Witima. I te mea kua karangatia rāua ki ētahi atu mahi, ka karangatia a Hirini Rikitana i runga i te reo o te Atua kia tū ai hei kaituhi nō te Poropiti i roto i tēnei mahi (tirohia whiti 20). Ka kī a te hītori a Hōhepa Mete tēnei hei kupu whakataki mō te tuhinga o tēnei whakakitenga: “I haere mai a Hirini Rikitana [i Ohaio] ki te ui atu ki te Ariki, ā, i haere tahi mai a Eruera Patiri. … whai muri tata iho i te taenga mai o ēnei tangata tokorua, ka pēnei te kōrero a te Ariki.”
1–2, Me pēhea te tangata e meinga hei tama nā te Atua; 3–7, Kua karangatia a Hirini Rikitana ki te rumaki me te whakatau i te Wairua Tapu; 8–12, Ka meatia ngā tohu me ngā merekara e te whakapono; 13–16, Ka patua ngā iwi e ngā pononga a te Ariki ki te mana o te Wairua; 17–19, Kei a Hōhepa Mete ngā kī mō ngā mea ngaro; 20–21, Ka noho mai te hunga kōwhiria tae noa ki te haerenga mai a te Ariki; 22–27, Ka whakaorangia a Iharaira.
1 Whakarongo ki te reo o te Ariki tō kōrua Atua, te Arepa me te Omeka pū anō, te tīmatanga me te whakamutunga, ko tōna huarahi tētahi porowhita mutunga kore, e rite tonu ana inānahi, ināianei, ā, āke tonu atu.
2 Ko Ihu Karaiti ahau, te Tama a te Atua, te mea i rīpekatia mō ngā hara o te ao, mō te hunga katoa e whakapono ai ki runga i tōku ingoa, kia meinga rātou hei tama nā te Atua, kia kotahi mai i roto i ahau pērā i taku kotahi me te Matua, pērā i tā te Matua kotahi mai i roto i ahau, kia kotahi ai tātou.
3 Nana, he pono, he pono tāku e mea atu nei ki taku pononga a Hirini, kua titiro iho au ki a koe me āu mahinga. Kua rongo au i āu inoi, ā, kua whakaritea koe mō tētahi mahi nui ake.
4 Kua manaakitia koe, nā te mea ka mahi koe i ngā mea nunui. Nana kua tukuna atu koe, pērā i a Hoani, ki te whakarite i te huarahi i mua i ahau, ā, i mua i a Irāia, koia tērā e haere mai ai, me te aha, kīhai koe i mōhio.
5 Nāu i rumaki ki te wai hei rīpenetātanga, engari kāore rātou i whiwhi i te Wairua Tapu;
6 Engari ināianei ka hoatu e au ki a koe tētahi whakahaunga, nā, māu e rumaki ki te wai, ā, ka whiwhi rātou i te Wairua Tapu mā runga i te whakapākanga o ngā ringaringa, pērā i ngā āpōtoro onamata.
7 Ā, ka pahawa ake, nā, ka ai tētahi mahi nunui i te whenua, i roto pū anō i ngā Tauiwi, nā te mea ka whakakitea atu ō rātou hē me ō rātou mōrikarika i mua i ngā karu o ngā iwi katoa.
8 Nā te mea ko au te Atua, ā, kāore i whakapotongia tōku ringa; ā, ka whakakite atu au i ngā merekara, ngā tohu, me ngā mea whakamāharo ki te hunga katoa e whakapono nei ki runga i tōku ingoa.
9 Ā, ko te tangata e uia mai i runga i tōku ingoa i runga hoki i te whakapono, ka pei atu rātou i ngā rēwera; ka mahu rātou i te hunga tūroro; ka meatia te hunga matapō kia kite, te hunga turi kia rongo, te hunga wahangū kia kōrero, me te hunga kopa kia hīkoi.
10 Ā, e hohoro mai ana te wā e whakakitea atu ai ngā mea nunui ki ngā tamariki a te tangata;
11 Engari ki te kore he whakapono e kore tētahi mea e whakakitea atu ai hāunga ko ngā whakangaromanga ki runga ki Papurona, ko taua mea anō nāna nei ngā iwi katoa i mea kia inu i te waina o te riri o tōna pūrermutanga.
12 Ā, kāore tētahi e mea ana i te pai hāunga ko te hunga e rite ana ki te whiwhi i tōku rongopai, kua tukuna atu e au ki tēnei whakatipuranga.
13 Nā reira, ka karanga au ki ngā mea ngoikore o te ao, te hunga kuare me te hunga whakahāweatia, kia patua ngā iwi ki te mana o tōku Wairua;
14 Ā, ko tō rātou ringa ko tōku ringa, ā, ko ahau hoki tō rātou puapua me tō rātou ārai; ā, māku e whītiki ō rātou hope, ā, ka whawhai māia rātou mōku; ā, kei raro ō rātou hoariri i ō rātou waewae; ā, ka tuku au kia taka iho te hoari mō rātou, ā, ka tiakina rātou e te kāpura o tōku riri.
15 Ā, ka kauhautia te rongopai ki te hunga rawakore me te hunga māhaki, ā, ka titiro whakamua rātou ki te wā o taku haerenga mai, nā te mea kua tata mai—
16 Ā, ka ako rātou e pā ana ki te pūrākau o te rākau piki, nā te mea kua tata kē mai te raumati.
17 Ā, kua tukuna atu e au te raneatanga o taku rongopai ki te ringa o taku pononga a Hōhepa; ā, kua manaakitia ia i roto i te ngoikoretanga;
18 Ā, kua riro atu ki a ia ngā kī mō ngā mea ngaro o aua mea kua hīria ake, ko ngā mea pū anō mai i te tūāpapa o te ao, me ngā mea e puta mai i tēnei wā tae noa atu ki taku haerenga mai, ki te noho mai ia i roto i ahau, ki te kore, māku tētahi atu e whakatō iho hei whakakapi mōna.
19 Nā reira, tiakina ia kei taka tōna whakapono, kātahi ka tukuna atu mā runga i te Kaiwhakaāio, te Wairua Tapu, e mōhio ana ki ngā mea katoa.
20 Ā, ka hoatu e au tētahi whakahaunga ki a koe—kia tuhituhi koe mōna; ā, ka hoatu ngā karaipiture, kia rite anō ki ngā mea i roto i tōku uma, hei whakaora i aku mea kōwhiria;
21 Nā te mea ka rongo rātou i tōku reo, ā, ka kite i ahau, ā, e kore e moe ana, ā, ka noho mai i te rā o taku haerenga mai; nā te mea ka meinga rātou kia mā, pērā i ahau e mā ana.
22 Ināianei ā ko taku kupu tēnei ki a koe, kia piri ki a ia, ā, ka haere tahi ia me koe; kaua e whakarērea ia, kātahi ka tino tutuki ēnei mea.
23 Ā, ki te kore koe e tuhituhi, nana, ka hoatu ki a ia kia poropititia; ā, māu taku rongopai e kauhau atu me te karanga ake ki ngā poropiti tapu kia whakamātauria ana kupu, i ngā wā e hoatu ai ki a ia.
24 Puritia ngā whakahaunga katoa me ngā kawenata kua herea nei koe; kātahi au ka mea i ngā rangi kia tūoioi hei painga mōu, ā, ka wiriwiri a Hātana, ā, ka hari a Hīona ki runga i ngā pukepuke, ā, ka whaiora;
25 Ā, ka whakaorangia a Iharaira i tōku wā e pai ai; ā, ka ārahina rātou e ngā kī kua hoatu nei e au, ā, kua kore tonu e whakapōauautia atu.
26 Hīkina ake ō kōrua ngākau kia hari, e tata mai ana tō kōrua whakaoranga.
27 Kaua e wehi, e te kāhui iti, nō koutou te kīngitanga tae noa ki taku haerenga mai. Nana, e haere wawe mai ana au. Koia anō. Āmine.