Wāhanga 3
He whakakitenga ki a Hōhepa Mete te Poropiti, ki Hāmoni, Penihiwheinia, Hūrae 1828, e pā ana ki te ngaronga o ngā whārangi 116 o te tuhinga i whakapākehātia mai i te wāhanga tuatahi o te Pukapuka a Moromona, kua huaina ko te pukapuka a Rīhai. I tukuna atu ēnei whārangi e te Poropiti, i runga i te ngākau ruarua, atu i ōna ringaringa ki a Matini Harihi, i mahi ia mō tētahi wā hei kaituhi i roto i ngā mahi whakapākehā o te Pukapuka a Moromona. I tukuna atu te whakakitenga mā roto i te Urama Tamama. (Tirohia wāhanga 10.)
1–4, He porowhita kotahi tā te Ariki huarahi; 5–15, Me rīpenetā a Hōhepa Mete kei ngaro i a ia te takohatanga ki te whakapākehā; 16–20, ka puta mai Te Pukapuka a Moromona kia whakaorangia ngā uri o Rīhai.
1 Tē whakapōauautia ngā mahi, ngā whakaritenga, me ngā kaupapa o te Atua, e kore rānei e whakakorea atu.
2 Nā te mea e kore te Atua e hīkoi i ngā huarahi kōpikopiko, kāore rānei ia e tahuri atu ki te ringa matau, ki te mauī rānei, kāore rānei ia e kōtiti atu i tāna i kī ai, nō reira he tōtika ōna huarahi, ā, he porowhita kotahi tōna huarahi.
3 Kia mahara, kia mahara ehara te mahi a te Atua e whakapōrearea ana, engari ko tā te tangata mahi;
4 Nā te mea ahakoa whiwhi ai tētahi tangata i ngā whakakitenga maha, ā. ka riro he mana anō hoki kia meatia ngā mahi nunui maha, heoi, mēnā ka whakamanamana ia i tōna ake kaha, me te whakakore atu i ngā tohutohu a te Atua, me te whai atu i ngā ākinga o tōna ake hiahia me ōna ake pīrangi ā-tīnana, e tika ana kia hinga iho ia, ā, ka tau iho te rapunga utu o te Atua tika ki runga ki a ia.
5 Nana, kua tukuna ēnei mea ki a koe, engari i pēhea te uaua o ōu whakahaunga; ā, kia mahara anō ki ngā whakaari i whakaaria mai nei ki a koe, ki te kore e takahia e koe.
6 Ā nana, anō te maha o āu takahitanga iho i ngā whakahaunga me ngā ture a te Atua, ā, kua aro atu ki ngā whakapakepaketanga o te tangata.
7 Nā te mea, nana, kāore e tika ana kia nui ake tō wehi ki te tangata i tō wehi ki te Atua. Ahakoa e whakakorea atu ana e te tangata ngā tohutohu a te Atua, ā, e whakahāwea ana hoki i ana kupu—
8 Heoi, me i mau tonu koe ki te pono; ā, kua torona mai e ia tōna ringa, ā, kua tiakina koe i ngā pere muramura katoa o te hoariri; ā, kua piritahi ia ki a koe i ngā wā katoa e raruraru ana.
9 Nana, ko Hōhepa koe, ā, kua kōwhiria mai koe hei mahi i ngā mahi a te Ariki, engari nā tō mahi hē, ki te kore koe e ohiti ka hinga iho koe.
10 Engari kia mahara, he whakaaroha te Atua; nō reira, e rīpenetā i tērā kua meatia nei e koe e tauaro ana ki te whakahau i hoatu nei e au ki a koe, ā, kua kōwhiria tonutia koe, ā, kua karangatia anōtia ki te mahi;
11 Ki te kore koe e pēnei, ka tukua ake koe, ā, ka rite koe ki ērā atu tangata, kāore ōu takohatanga.
12 Ā, i te wā i tukuna ake e koe tērā mea i hoatu ai e te Atua ki a koe, arā, he māramatanga, ā, he mana hei whakapākehā, nāu i tuku atu tērā mea e tapu ana ki roto ki ngā ringaringa o tētahi tangata kino,
13 Kua whakakorea atu e ia ngā tohutohu a te Atua, ā, kua whatia iho e ia ngā kupu whakaari tapu rawa i meatia nei i te aroaro o te Atua, ā, kua whakawhirinaki nei ki tōna ake mātauranga, ā, kua whakamanamana mō tōna ake mōhioranga.
14 Ā, koinei te take kua ngaro atu i a koe ōu manaakitanga mō tētahi wā—
15 Nā te mea kua tukuna e koe kia takahia ngā tohutohu a tōu kaihautū mai i te tīmatanga.
16 Hei aha koa, ka puta atu taku mahi, nā, e rite ana ki te putanga mai o te mātauranga o tētahi Kaiwhakaora ki roto ki te ao, mā roto i te whakaaturanga o ngā Hūrai, e pērā anō ana te putanga mai o te mātauranga o tētahi Kaiwhakaora ki taku iwi—
17 Ā, ki ngā Nīwhai, me ngā Hākopa, me ngā Hōhepa, me ngā Hōrama, mā roto i te whakaaturanga o ō rātou tūpuna—
18 Ā, ka mātauria tēnei whakaaturanga ki ngā Rāmana, me ngā Remuere, me ngā Ihimaera, ko rātou nei i memeha atu i runga i te whakapono kore nō ngā hē o ō rātou tūpuna, kua tukuna mai nei e te Ariki kia whakangaro atu i ā rātou teina ngā Nīwhai, he mea nā ō rātou hē me ō rātou mōrikarika.
19 Ā, mō tēnei tino take i tiakina ai ēnei papa, e mau nei ēnei tuhinga—e whakatutukihia ai ngā whakaari a te Ariki, e whakaaria mai nei ki tana iwi;
20 Ā, tērā pea ka tae atu ngā Rāmana ki te mātauranga o ō rātou tūpuna, ā, me kore pea e mōhio ki ngā whakaari a te Ariki, ā, kia whakapono ki te rongopai me te whakawhirinaki ki runga i ngā painga o Ihu Karaiti, ā, kia whakakorōriatia mā roto i tōna ingoa, ā, kia whakaorangia ai rātou mā roto i tā rātou rīpenetātanga. Āmine.