Wāhanga 50
He whakakitenga mā roto i a Hōhepa Mete te Poropiti, ki Katarana, Ohaio, Mei 9, 1831. Ko tā te hītori a Hōhepa Mete e kī ana kāore ētahi o ngā erata i mārama ki te whakakitenga o ngā momo wairua rerekē huri noa i te whenua, ā, i hoatu tēnei whakakitenga hei whakautu ki tēnei inoi motuhake mō tēnei kaupapa. Kāore i rerekē ngā mea ā-wairua i roto i ngā mema, e ai ki ētahi i te whiwhi rātou i ngā kitenga me ngā whakakitenga.
1–5, He maha ngā wairua teka huri noa i te ao; 6–9, Auē te mate mō te hunga arerorua me te hunga e hātepea atu ana i te Hāhi; 10–14, Me kauhau e ngā erata te rongopai i runga i te Wairua; 15–22, Me whakakaha te whakapono o ngā kaikauhau me ngā kaiwhakarongo e te Wairua; 23–25, Ehara ngā mea e kore nei e whakakaha ake i te whakapono i te Atua; 26–28, He kaipupuri ngā mea kaha ki te ū i ngā mea katoa; 29–36, Ka whakautua ngā inoi a te hunga kua whakamākia; 37–46, Ko te Karaiti te Hēpara Pai me te Kōhatu o Iharaira.
1 Whakarongo mai, E koutou ngā erata o taku hāhi, ā, kia whai taringa mai ki te reo o te Atua ora; ā, kia aro ki ngā kupu whai mātauranga e hoatu nei ki a koutou, e rite ana ki tā koutou i inoi ai me tā koutou i whakaae mai ai e pā ana ki te hāhi, me ngā wairua kua haere whānui atu i te whenua.
2 Nana, he pono tāku e mea atu nei ki a koutou, nā, he maha ngā wairua teka, kua haere atu nei i te whenua, e tinihangatia ana te ao.
3 Waihoki, kua whai a Hātana ki te tinihanga i a koutou, kia taea koutou e ia.
4 Nana, ko ahau, ko te Ariki, kua titiro ki runga i a koutou, ā, kua kitea ngā mōrikarika i roto i te hāhi e whakapuaki ana i tōku ingoa.
5 Engari kua manaakitia te hunga e kaha ana tā rātou ū, ahakoa i te ora, i te mate rānei, nā te mea ka whiwhi rātou ki te oranga tonutanga.
6 Engari auē te mate mō te hunga tinihanga me te hunga arerorua, nā te mea, pēnei tā te Ariki, māku rātou e kukume ki te whakawākanga.
7 Nana, he pono tāku e mea atu nei ki a koutou, he arerorua kei waenganui i a koutou, kua tinihangatia ētahi, nā konā whai mana ai te hoariri; engari nana ka whakahokia mai ngā mea pērā;
8 Engari ka kitea te hunga tinihanga, ā, ka hātepea atu rātou, ahakoa i te ora, i te mate rānei, he rite pū anō ki tāku e pai ai; ā, auē te mate mō te hunga kua hātepea atu i taku hāhi, nā te mea kua warea ngā mea pērā e te ao.
9 Nā reira, tukua ngā tangata katoa kia mataara kei meatia ērā mea kāore i te tika i tōku aroaro.
10 Ināianei ā, haere mai, e ai tā te Ariki, mā runga i te Wairua, ki ngā erata o tana hāhi, ā, tukua tātou kia whakawhitiwhiti kōrero ngātahi, kia mārama ai koutou;
11 Tukua tātou kia whakawhitiwhiti kōrero ngātahi tētahi ki tētahi, he mea kanohi ki te kanohi.
12 Nā, ina whakawhitiwhiti kōrero tētahi tangata, kua mārama tāna e te tangata, nā te mea i whakawhitiwhiti kōrero ia ki te ritenga o te tangata; koia anō ahau, te Ariki, e whakawhitiwhiti kōrero tahi ki a koutou kia mārama mai ai koutou.
13 Nā reira, kei te ui atu ahau, te Ariki, i tēnei pātai ki a koutou—kua whakamanaia koutou ki te aha?
14 Ki te kauhau atu i taku rongopai i runga i te Wairua, ko te Kaiwhakaāio pū anō kua tonoa atu ki te whakaako i te pono.
15 Kātahi ka whiwhi koutou i ngā wairua kāore e taea ana e koutou te mārama, ā, ka whakawhiwhia ēnā me te mea nei nā te Atua; ā, e tika ana koutou i tēnei?
16 Nana me whakautu e koutou tēnei pātai; hei aha koa, ka aroha au ki a koutou; ka meatia te mea ngoikore i waenganui i a koutou hei mea kaha nō muri mai.
17 He pono tāku e mea atu nei ki a koutou, ko te tangata e whakamanaia nei e ahau, ā, e tukua atu nei ki te kauhau atu i te kupu pono i runga i te Kaiwhakaāio, i roto i te Wairua pono, e kauhau atu ana rānei i tēnā mā runga i te Wairua pono, i tētahi atu huarahi rānei?
18 Ā, mehemea nā tētahi atu huarahi ehara nā te Atua tērā.
19 Hei āpiti anō, ko te tangata e whiwhi nei i te kupu pono, ka whiwhi rānei ia i tērā mā runga i te Wairua pono, mā runga rānei i tētahi atu huarahi?
20 Mehemea mā runga i tētahi atu huarahi ehara nā te Atua.
21 Nō reira, he aha te take tē mārama ai, ā, tē mōhio ai koutou, nā, ko te tangata e whiwhi nei i te kupu mā runga i te Wairua o te pono e rite ana tana whiwhinga ki te kauhautanga hei mea nā te Wairua o te pono?
22 Nā reira, ko te tangata e kauhau ana me te tangata e whiwhi ana, e mārama ana tētahi ki tētahi, ā, kua whakakahangia ngātahitia ō rāua whakapono, ā, ka hari ngātahi.
23 Ā, ehara ngā mea e kore nei e whakakaha i te whakapono i te mea nā te Atua, ā, he pōuritanga kē.
24 He māramatanga ngā mea nā te Atua; ā, ko te tangata e whiwhi māramatanga ana, me te ū tonu i roto i te Atua, ka nui ake tana māramatanga; ā, ka tupu haere te māramatanga kia nui ake tae noa ki te tino awateatanga.
25 Hei āpiti anō, he pono tāku e mea atu nei ki a koutou, ā, kei te kōrerohia tēnā e au kia mōhio ai koutou ki te pono, kia peia atu te pōuritanga i roto i a koutou;
26 Ko te tangata e whakamanaia ana e te Atua, ā, kua tonoa atu anō, kua whakataua anōtia taua mea anō ko ia te mea nui rawa, hei aha koa ko ia te mea iti rawa, ā, ko ia te pononga ki te katoa.
27 Nā reira, nāna ngā mea katoa; nā te mea nōna te tikanga mō ngā mea katoa, i te rangi me te whenua, te oranga me te māramatanga, te Wairua me te mana, kua tonoa atu i runga i te hiahia o te Matua mā roto i a Ihu Karaiti, tana Tama.
28 Engari kua kore rawa e riro i te tangata ngā mea katoa ki te kore ia e whakamākia, e horoia i ngā hara katoa.
29 Ā, mehemea kua whakamākia, kua horoia koutou i ngā hara katoa, me inoi e koutou i runga i te ingoa o Ihu tā koutou e pai ai, ā, ka meatia.
30 Engari kia mōhio ki tēnei, ka hoatu tā koutou e inoi ai; ā, i te mea kua whakataua koutou ki te upoko, ka ngohengohe ngā wairua ki a koutou.
31 Nā reira, ka pahawa ake, nā, ki te kite atu koutou i tētahi wairua kua whakakitea mai nei, nā, he mea tē taea e koutou te mārama, ā, ka kore koutou e whiwhi i taua wairua, me inoi ake e koutou te Matua i runga i te ingoa o Ihu; ā, ki te kore e hoatu e ia taua wairua ki a koutou, kātahi koutou ka mōhio ehara tēnā i te mea nā te Atua.
32 Ā, ka hoatu ki a koutou, he kaha i runga i taua wairua; ā, mā koutou e whakapuaki atu ki taua wairua i runga i tētahi reo kaha, nā, ehara tēnā i te mea nā te Atua—
33 Kaua i runga i te whakapae kaha, kia kore koutou e taea, kaua rānei i runga i te whakamanamana, i te hari rānei, kei whakamaua koe e ia.
34 Ko te tangata e whiwhi mea nei i te Atua, tukua ia kia whakaaro ai nā te Atua tērā; ā, tukua ia kia hari mōna i whiriwhiria hei mea tika nā te Atua kia whiwhi.
35 Ā, mā tā koutou aro ki ēnei mea me tā koutou meatanga i ēnei mea kua whiwhi nei koutou, ā, me ngā mea e whiwhi ai koutou a muri ake nei—ā, kua hoatu te kīngitanga ki a koutou e te Matua, me te mana kia taea ai ngā mea katoa e koutou kāore nei i whakamanaia e ia—
36 Ā nana, he pono tāku e mea atu nei ki a koutou, kua manaakitia koutou e whakarongo ana ināianei ki ēnei kupu āku mai i te māngai o taku pononga, nā te mea kua mura ō koutou hara.
37 Tukua taku pononga a Hōhepa Weikawhira, tāku e āhuareka nei, me taku pononga a Pāri P. Parata kia haere atu ki waenganui i ngā hāhi me te whakakaha ake i a rātou mā runga i te kupu akiaki;
38 Me taku pononga a Hoani Koriri, me aku pononga katoa rānei kua whakamanaia nei ki tēnei tūranga, ā, tukua rātou kia mahi i te māra waina; ā, kaua e tukua tētahi tangata kia whakararu i tā rātou meatanga i ērā mea kua whakataua atu e au ki a rātou—
39 Nā reira, kāore taku pononga a Eruera Patiri i te tika i roto i tēnei mea; hei aha koa tukua ia kia rīpenetā kātahi ka murua ōna hara.
40 Nana, he tamariki nohinohi koutou, ā, tē taea e koutou ngā mea katoa te pīkau ināianei; me tupu koutou i runga i te aroha me te mātauranga o te pono.
41 Kaua e wehi, e ngā tamariki nohinohi, nā te mea nāku koutou, ā, kua taea e au te ao, ā, nō te hunga koutou i homai ai e te Matua ki ahau;
42 Ā, kua kore tētahi o te hunga i homai ai e te Matua ki ahau e ngaro.
43 Ā, he mea kotahi māua ko te Matua. Kei roto au i te Matua, ā, kei roto te Matua i ahau; ā, i te mea kua whiwhi koutou i ahau, kei roto koutou i ahau, ā, kei roto au i a koutou.
44 Nā reira, kei waenganui au i a koutou, ā, ko au te hēpara pai, ā, te Kōhatu o Iharaira. E kore e hinga te tangata e hanga ake ai i runga i tēnei kōhatu.
45 Ā, e tata mai ana te rā e rongo koutou i tōku reo, ā, e kite ai anō i ahau, ā, ka mōhio ko ahau anō tēnei.
46 Nō reira, kia mataara, kia rite ai koutou. Koia anō. Āmine.