Wāhanga 55
He whakakitenga mā roto i a Hōhepa Mete te Poropiti ki a Wiremu W. Wherapa, ki Katarana, Ohaio, Hune 14, 1831. Kātahi anō a Wiremu W, Wherapa, tētahi kaitā, rātou ko tana whānau ka tae atu ki Katarana, ā, ka inoi ake te Poropiti ki te Ariki e pā ana ki a ia.
1–3, Kua karangatia, ā, kua kōwhiria a Wiremu W. Wherapa kia rumakina, kia whakamanaia hei erata, ā, kia kauhau atu i te rongopai; 4, Me tuhi e ia he pukapuka mō ngā tamariki i ngā kura Hāhi; 5–6, Me haere ia ki Mītori, koia rā te wāhi e mahi ai ia.
1 Nana, pēnei tā te Ariki ki a koe, e taku pononga e Wiremu, āe rā, ko te Ariki pū anō o te ao katoa, kua karangatia koe, ā, kua kōwhiria koe; ā, whai muri iho i tō rumakanga ki te wai, mehemea ka meatia tēnā i runga i te karu hāngai ki taku korōria, ka riro i a koe tētahi murunga i ō hara me tētahi whiwhinga ki te Wairua Tapu mā runga i te whakapākanga o ngā ringaringa;
2 Kātahi ka whakamanaia koe e te ringa o taku pononga a Hōhepa Mete, Tama., kia tū ai hei erata mō tēnei hāhi, ki te kauhau atu i te rīpenetātanga me te murunga hara mā runga i te rumakitanga i runga i te ingoa o Ihu Karaiti, te Tama a te Atua ora.
3 Ā, ko te hunga katoa e whakapākia iho ai e koe ō ringaringa, mehemea he whakaiti rātou i tōku aroaro, ka whai mana koe ki te hoatu i te Wairua Tapu.
4 Hei āpiti anō, ka whakamanaia koe ki te āwhina i taku pononga a Oriwa Kautere i roto i ngā mahi tā, me te kōwhiri, me te tuhituhi i ngā pukapuka mō ngā kura i tēnei hāhi, kia whai tohutohu anō ngā tamariki nonohi i tōku aroaro e rite tonu ana ki tāku e āhuareka ai.
5 Hei āpiti anō, he pono tāku e mea atu nei ki a koe, mō tēnei take haere ai koutou ko aku pononga a Hōhepa Mete, Tama., ko Hirini Rikitana kia whakatōkia iho koutou i tō koutou whenua tuku iho kia mahia tēnei mahi.
6 Hei āpiti anō, tukua taku pononga a Hōhepa Kou kia haere ngātahi me rātou. Ka whakamōhiotia atu te toenga whai muri iho, pērā pū anō i tāku e pai ai. Āmine.