Wāhanga 56
He whakakitenga mā roto i a Hōhepa Mete te Poropiti, ki Katarana, Ohaio, Hune 15, 1831. He kohete tēnei whakakitenga i a Etera Taia mōna kīhai i whakarongo ki tētahi whakakitenga o mua (te “whakahaunga” i kōrerotia ake nei i whiti 8), te mea i whiwhi ai a Hōhepa Mete mōna, e tohutohu ana i a Taia e pā ana ki āna mahi ki tō Whererika T. Wiremu pāmu, te wāhi i noho ai ia. Ka whakakorea anō hoki e tēnei whakakitenga tō Taia karangatanga kia haere atu ai ki Mītori i te taha i a Tamati P. Maati (tirohia wāhanga 52:22).
1–2, Me hiki ake ngā Hunga Tapu i ō rātou rīpeka, ā, me whai atu i te Ariki kia whakaorangia ai rātou; 3–13, Ka whakahau te Ariki, ā, ka whakakorea e Ia, ā, ka makaia atu te hunga haututū; 14–17, Auē te mate mō te hunga whairawa e kore nei e hiahia ki te āwhina i te hunga rawakore, ā, auē te mate mō te hunga rawakore e kore nei e ngākau marū ana; 18–20, Kua manaakitia te hunga rawakore e ngākau urutapu ana, nā te mea ka whiwhi rātou i te whenua.
1 Whakarongo, E koutou e ngā tāngata e whakapuaki ana i tōku ingoa, e ai tā te Ariki tō koutou Atua; nana rā, kua muramura taku riri ki te hunga haututū, ā, ka mōhio rātou ki tōku ringa me tōku riri, i te rā e toro iho ai, i te rā hoki o taku riri ki runga i ngā iwi.
2 Ā, ko te tangata e kore nei e hiki ake i tana rīpeka me te whai mai i ahau, me te pupuri i aku whakahaunga, kāore taua mea e whakaorangia ai.
3 Nana, ko ahau, te Ariki, e whakahau ai; ka hātepea atu te tangata e kore nei e ngohengohe i tōku ake anō wā, whai muri iho i taku whakahau engari kua whatia te whakahaunga.
4 Nā reira au, te Ariki, e whakahau ai, ā, e whakakore ai, e rite ana ki tāku e pai ai; ā, ka whakautua iho ēnei katoa ki runga ki ngā māhunga o te hunga haututū, e ai tā te Ariki.
5 Nā reira, kei te whakakore au i te whakahaunga i tukuna atu ai ki aku pononga, ki a Tāmati P. Maati rāua ko Etera Taia, ā, e hoatu ana i tētahi whakahaunga hou ki taku pononga a Tāmati, kia haere wawe atu ia ki te whenua o Mītori, me haere anō hoki taku pononga a Herara T. Kiriwhini hei hoa mōna.
6 Nana rā, kei te whakakore au i te whakahaunga i hoatu ai ki aku pononga, ki a Herara T. Kiriwhini rāua ko Nuera Naiti, nā te kakī mārōtanga o taku iwi kei Tamihana, me ā rātou haututūtanga.
7 Nā reira, tukua taku pononga a Nuera Naiti kia noho tahi ana me rātou; ā, e pai ana kia haere te hunga katoa e hiahia ana, ko te hunga whakaiti i mua i ahau, kia ārahina e ia ki te whenua kua whakataua nei e au.
8 Hei āpiti anō, he pono tāku e mea atu nei ki a koutou, nā, me rīpenetā taku pononga a Etera Taia i tana whakapehapeha, me tana kaipuku, me te ngohengohe atu ki te whakahau o mua i hoatu nei ki a ia e pā ana ki te wāhi e noho nei ia.
9 Ā, ki te pēnei ia, i te mea kāore e meatia nei he wehewehenga i runga i te whenua, ka whakataua tonutia ia kia haere atu ki te whenua o Mītori;
10 Ki te kore me hoki atu anō te moni i utua ai ia, ā, me wehe atu i taua wāhi, ā, ka hātepea atu ia i taku hāhi, e ai tā te Ariki te Atua o ngā mano;
11 Ā, ahakoa ka pahemo atu te rangi me te whenua, e kore ēnei kupu e pahemo atu, engari ka whakatutukihia.
12 Ā, mehemea e tika ana kia utua e taku pononga, e Hōhepa Mete, Tama., te moni, nana, māku, mā te Ariki ia e utu anō i te whenua o Mītori, kia whakautua anōtia te hunga e whiwhi ai ia e rite ana ki ā rātou mahi;
13 Nā te mea ka rite ā rātou whiwhinga ki ā rātou mahi, kei roto pū anō i tō rātou whenua tuku iho.
14 Nana, pēnei tā te Ariki ki te iwi—he maha ngā mea hei mahi, hei rīpenetātanga mā koutou; nana rā, kua tae ake ō koutou hara ki ahau, ā, kāore anō kia murua, nā te mea kei te whai koutou ki te rūnanga i runga i ō koutou ake tikanga.
15 Ā, kāore anō kia ngata ō koutou ngākau. Ā, kāore koutou e whakarongo mai ana ki te pono, engari e manawareka ana ki te hē.
16 Auē te mate mō koutou e te hunga whairawa, e kore nei e pai kia tuku i ō rawa ki te hunga rawakore, nā te mea ka pirau ō koutou wairua i ō koutou taonga; ā, ka ai tēnei hei tangi mōteatea mō koutou hei te rā o te taenga mai, me te rā whakawā, me te rā o te riri: Kua hipa kē atu te kotinga, kua mutu te raumati, ā, kāore anō kia whakaorangia taku wairua!
17 Auē te mate mō koutou e te hunga rawakore, e ngākau marū ana, e wairua iro ana, kāore e ngata ana te puku, ā, kāore e puritia atu ana te ringa kia mau poka noa i ngā mea nō tētahi atu tangata, e kikīa ana ngā karu ki te kaiapo, he hunga e kore nei e mahi ki ō koutou ake ringaringa!
18 Engari kua manaakitia te hunga rawakore e ngākau urutapu ana, e ngākau marū ana, ā, e wairua iro ana, nā te mea ka kite rātou i te haerenga mai o te kīngitanga o te Atua i runga i te mana me te korōria nui hei whakaputanga mō rātou; nā te mea ka riro i a rātou te mōmonatanga o te whenua.
19 Nana rā, ka haere mai te Ariki, ā, i a ia hoki tana utu, ā, māna ngā tāngata katoa e utu, ā, ka harikoa te hunga rawakore;
20 Ā, ka riro i ō rātou whakatipuranga te whenua, mai i tētahi whakatipuranga ki tētahi atu whakatipuranga, mō āke tonu atu. Ināianei ā, ka whakakapi au i taku kōrerotanga atu ki a koutou. Koia anō. Āmine.