Wāhanga 59
He whakakitenga mā roto i a Hōhepa Mete te Poropiti, ki Hīona, Takiwā o Tiakimana, Mītori, Akuhata 7, 1831. I mua i tēnei whakakitenga, i whakatapua te whenua, he pērā i tā te Ariki i whakahau ai, ā, i whakatapua te wāhi e tū ai te temepara anamata. I te rā i whakawhiwhia tēnei whakakitenga, i mate te hoawahine a Hōhepa Naiti Matua., ko te mema tuatahi o te hāhi kia mate i Hīona. I whakaarohia e ngā mema tōmua he whakakitenga tēnei e “tohutohu ana i te Hunga Tapu me pēhea e pupuri i te Hāpati, ā, me pēhea hoki e nohopuku me te inoi.”
1–4, Ka manaakitia te hunga Tapu e ū ana; 5–8, Me aroha, me mahi rātou ki te Ariki me te pupuri i Āna whakahaunga; 9–19, Mā te pupuri i tō te Ariki rā kia tapu, ka manaakitia ā-wairua, ā-tīnana hoki te Hunga Tapu; 20–24, Ka whakaaria te Hunga Tapu he maungārongo i tēnei ao, ā, he oranga tonutanga i te ao e puta mai ai.
1 Nana, kua manaakitia, e ai tā te Ariki, ko rātou te hunga kua haere ake nei ki tēnei whenua i runga i te karu hāngai ki tōku korōria, e rite ana ki aku whakahaunga.
2 Nā te mea ka riro iho i te hunga ora te whenua, ā, ka okioki te hunga mate i ā rātou mahi katoa, ā, ka whai ā rātou mahi i a rātou; ā, ka whiwhi karauna rātou i roto i ngā whare nui o tōku Matua, kua whakaritea mai nei e au mō rātou.
3 Āe rā, kua manaakitia ngā waewae o te hunga e tū nei ki runga i te whenua o Hīona, kua ngohengohe mai nei ki taku rongopai; nā te mea ka whiwhi rātou i ngā mea pai o te whenua hei utu mō rātou, ā, ka whakaputaina mai i runga i tōna kaha.
4 Ā, ka karaunatia anōtia ki ngā manaakitanga nō runga, āe rā, me ngā whakahaunga ehara i te ruarua, me ngā whakakitenga i tō rātou nā wā—te hunga e ū ana, e tākare tonu ana i tōku aroaro.
5 Nā reira, Kei te tuku whakahau atu au ki a rātou, e mea pēnei ana: Me aroha koe te Ariki tōu Atua ki tōu ngākau katoa, ki tōu uaua katoa, hinengaro, me tōu kaha; ā, ka mahi koe i runga i te ingoa o Ihu Karaiti.
6 Me aroha koe ki tō kiritata anō nei ko koe. Kaua e tāhae; kaua rānei e pūremu, e whakamate tangata rānei, e mahi rānei i tētahi mea pērā.
7 Me whakawhetai atu koe ki te Ariki tōu Atua i roto i ngā mea katoa.
8 Me tuku whakahere atu koe ki te Ariki tōu Atua i runga i te tika, ko taua whakahere pū anō, arā, he ngākau marū, ā, he wairua iro.
9 Ā, me haere koe ki te whare karakia ki te tāpae atu i ō hākarameta i runga i taku rā tapu kia tino kohakore tonu koe i te ao;
10 Nā te mea he pono, kua whakataua tēnei rā mōu hei rā e okioki ai i ā koutou mahinga, hei tuku i āu koropikotanga ki te Runga Rawa;
11 Hei ahakoa ka tāpaea ake āu oati i runga i te tika i ngā rā katoa, ā, i ngā wā katoa;
12 Engari kia mahara ki tēnei, te rā o te Ariki, māu e tāpae ake ō tāpaetanga me ō hākarameta ki te Runga Rawa, e whāki ana i ō hara ki ō teina, i te aroaro o te Ariki.
13 Ā, kaua e mahia tētahi atu mea i runga i tēnei rā, kia waiho noa iho āu kai kia whakaritea ai i runga i te ngākau tapatahi e tika rawa atu ai tō nohopuku, kia kī pēnei kē, rānei, kia ranea tō hari.
14 He pono, ko te nohopuku me te inoi tēnei, kia kī kē ake rānei, ko te haringa me te inoi.
15 Ā, ki te mea ka meinga e koutou ēnei mea i runga i te whakawhetai, i runga i te ngākau hari me te āhua hari, kaua i runga i te haparangi o te kata, nā te mea he hara tēnei, engari i runga i te ngākau koa me te āhua hari—
16 He pono tāku e mea nei, nā, ki te mea ka pēnei, nōu te raneatanga o te ao, ngā kararehe o te whīra me ngā manu o te rangi, me ngā mea e piki ake ki runga i ngā rākau, e hīkoi ana i runga i te whenua;
17 Āe rā, ko te māhuri, me ngā mea pai anō e tupu ake ana i te whenua, ahakoa hei kai, ahakoa hei kākahu rānei, hei whare rānei, hei whare kararehe rānei, hei māra hua rākau, hei māra, hei māra wāina rānei;
18 Āe rā, ngā mea katoa e tupu ake ana i te whenua, i tōna anō wā, kua hangaia hei painga mō te tangata, hei āhuareka mō te karu, ā, hei whakakoa i te ngākau;
19 Āe rā, hei kai, hei kākahu rānei, hei tāwara, ā, hei hongi, hei whakakaha i te tīnana me te whakahihiko i te wairua.
20 Ā, e āhuareka ana ki te Atua kua hoatu e ia ēnei mea katoa ki te tangata; nā te mea mō tēnei take i hangaia ai hei whakamahinga, i runga i te whaiwhakaaro, kia kaua i runga i te moumou, i te hao rānei.
21 Ā, kāore he mea e whakapōuritia ai te Atua e te tangata, kāore rānei e mura ana tōna riri ki tētahi, hāunga ki te hunga e kore nei e whāki atu te meatanga o tōna ringa i ngā mea katoa, ā, e kore hoki e ngohengohe ki ana whakahaunga.
22 Nana, he rite tēnei ki te ture me ngā poropiti; nā reira, kaua e whakararu tonu i ahau e pā ana ki tēnei take.
23 Engari kia mōhio ka whiwhi te tangata e mea ai i ngā mahinga tika i tana utu, ko te maungārongo pū anō i tēnei ao, me te oranga tonutanga i te ao e puta mai ai.
24 Nāku, nā te Ariki i kōrero, ā, e whakaatu mai ana te Wairua. Āmine.