Wāhanga 72
He whakakitenga mā roto i a Hōhepa Mete te Poropiti, ki Katarana, Ohaio, Tīhema 4, 1831. I whakahuihui tahi ētahi erata me ētahi mema ki te ako i tā rātou mahi kia whakamāramahia atu anō i ngā akoranga o te Hāhi. He kohikohinga tēnei wāhanga mō ngā whakakitenga e toru i whiwhi nei i taua rā anō. E whakamāramahia ana ngā whiti 1 tae noa atu ki te 8 te karangatanga o Nuera K. Witini hei pīhopa. Kātahi ka karangatia ia, ā, ka whakamanaia ia, whai muri iho ka whiwhia ngā whiti 9 tae noa ki te 23, e tāpiri atu ana i ētahi atu kōrero mō ngā mahi a te pīhopa. Kātahi ka hoatu ngā whiti 24 tae noa ki te 26, e tuku tohutohu ana e pā ana ki te whakahuihuinga ki Hīona.
1–8, Me tuku e ngā erata tētahi kōrero mō tō rātou mahi tiaki ki te pīhopa; 9–15, Mā te pīhopa te pātaka e tiaki, ā, māna hoki te hunga rawakore me te hunga hapa e atawhai; 16–26, Mā ngā pīhopa te tika o ngā erata e whakamana.
1 Whakarongo mai, kia rongo i te reo o te Ariki, E koutou kua huihui tahi mai i a koutou anō, ko koutou te hunga pirihi teitei o taku hāhi, arā, ko koutou kua hoatu nei te kīngitanga me te mana.
2 Nā, he pono tā te Ariki, e tika pū ana anō i roto i ahau kia whakatūria tētahi pīhopa ki waenganui i a koutou, ki te hāhi i tēnei wāhi o tō te Ariki māra waina.
3 Ā, he pono i roto i tēnei mea kua meatia e koutou i runga i te whakaaro nui, nā te mea e hiahiatia ana e te Ariki, i te ringa o ngā kaitiaki katoa, kia tukuna ai tētahi kōrero mō tana mahi kaitiaki, i tēnei wā me te ao mau tonu.
4 Nā te mea ka whakataua te tangata e pono ana, ā, e whakaaro nui ana i tēnei wā hei mea tika kia whiwhi ki ngā whare nunui kua whakaritea mōna e tōku Matua.
5 He pono tāku e mea atu nei ki a koutou, me tuku kōrero e ngā erata o te hāhi i tēnei wāhi o taku māra waina mō tā rātou mahi kaitiaki ki te pīhopa e whakatūria ai e ahau i tēnei wāhi o taku māra waina.
6 Ka tuhia ēnei mea, kia hoatu ai ki te pīhopa i Hīona.
7 Ā, ka whakamōhiotia atu he aha tā te pīhopa mahi e ngā whakahaunga kua hoatu nei, me te reo o te huihuinga whānui o te hāhi.
8 Ināianei ā, he pono tāku e mea atu nei ki a koutou, ko taku pononga a Nuera K. Witini te tangata e whakatūria ake ai, ā, e whakamanaia ai ki tēnei mana. Koinei te hiahia o te Ariki tō koutou Atua, tō koutou Kaihoko. Koia anō. Āmine.
9 Ko te kupu a te Ariki, hei āpiti atu ki te ture kua hoatu nei, e whakamōhiotia atu ana tā te pīhopa mahi, koia hoki te mea kua whakamanaia ake nei ki te hāhi i tēnei wāhi o te māra waina, koia pono ko tēnei—
10 Kia tiakina tā te Ariki pātaka; kia whiwhi i ngā moni o te hāhi i tēnei wāhi o te māra waina;
11 Kia hopu anō i tētahi kōrero mai i ngā erata pērā i te mea kua whakahaua atu nei i mua; me te minita atu ki ā rātou hiahia, māna hoki e utu mō ērā mea e whiwhi ai rātou, mehemea e whai mea ana rātou hei utu;
12 Kia taea anōtia tēnei hei mea whakatapu mō te painga o te hāhi, ki te hunga rawakore me te hunga hapa.
13 Ā, ko te tangata kāore e whai mea ana hei utu, ka hopukina tētahi kōrero mōna kātahi ka hoatu ki te pīhopa o Hīona, māna hoki e utu te nama i ērā mea kua whakaraua e te Ariki ki roto ki ana ringaringa.
14 Ā, mā ngā mahi a te hunga pono e mahi nei i ngā mea wairua, i roto i te minitatanga o te rongopai me ngā mea o te kīngitanga ki te hāhi, ki te ao hoki, e whakautu i te nama ki te pīhopa i Hīona;
15 Pēnei ka tangohia atu i te hāhi, nā te mea e ai ki te ture me tāpae e ngā tāngata katoa e haere ake nei ki Hīona ngā mea katoa i te aroaro o te pīhopa.
16 Ināianei ā, he pono tāku e mea atu nei ki a koutou, nā, i te mea me tuku e ngā erata katoa i tēnei wāhi o te māra waina tētahi kōrero mō tana mahi kaitiaki ki te pīhopa i tēnei wāhi o te māra waina—
17 Mā tētahi tiwhikete mai i te kaiwhakawā, te pīhopa rānei i tēnei wāhi o te māra waina, ki te pīhopa i Hīona, e whakaaetia ai ngā tāngata katoa hei mea tika, ā, e whakautua ana ngā mea katoa, mō tētahi taonga tuku iho, ā, kia whakawhiwhia hei kaitiaki whakaaro nui, ā, hei kaimahi pono;
18 Ki te kore kua kore ia e whakaaetia e te pīhopa o Hīona.
19 Ināianei ā, he pono tāku e mea atu nei ki a koutou, tukua ngā erata katoa e tuku kōrero ai ki te pīhopa o te hāhi i tēnei wāhi o te māra waina kia tautokona e te hāhi, e ngā hāhi rānei, arā, ngā wāhi e mahi nei ia, kia tukuna ia e ia anō me ana kōrero hei mea whakaaetia i roto i ngā mea katoa.
20 Hei āpiti anō, tukua aku pononga kua whakaritea hei kaitiaki i runga i te taha pukapuka o taku hāhi kia whai kerēme āwhina ki runga ki te pīhopa, ki ngā pīhopa rānei i roto i ngā mea katoa—
21 Kia taea ai te whakaputa i ngā whakakitenga, ā, kia haere puta noa atu ki ngā tōpito katoa o te whenua; kia taea anōtia e rātou te rapu moni hei painga mō te hāhi i roto i ngā mea katoa;
22 Kia taea anōtia e rātou te tuku whakaaetanga mō rātou anō i roto i ngā mea katoa, ā, kia whakaaetia hei kaitiaki whakaaro nui.
23 Ināianei ā, nana, ka riro tēnei hei tauira mō ngā peka maha o taku hāhi, ahakoa ki tēhea whenua e whakapūmauhia ai ēnā. Ināianei ā, ka whakakopanihia aku kīanga. Āmine.
24 He kupu ruarua hei tāpiri atu ki ngā ture o te kīngitanga, e whai whakaaro atu ana ki ngā mema o te hāhi—ko te hunga e whakatūria ake ai e te Wairua Tapu kia haere ake ki Hīona me te hunga nō rātou te whiwhi kia haere ake ki Hīona—
25 Tukua rātou kia kawea atu ki te pīhopa tētahi tiwhikete mai i ngā erata tokotoru o te hāhi, he tiwhikete rānei mai i te pīhopa;
26 Ki te kore kua kore rawa ia e haere ake nei ki te whenua o Hīona, kua kore e whakaaetia hei kaitiaki whakaaro nui. He tauira āno hoki tēnei. Āmine.