Wāhanga 91
He whakakitenga mā roto i a Hōhepa Mete te Poropiti, ki Katarana, Ohaio, Maehe 9, 1833. I te mahi te Poropiti i ngā mahi whakapākehā o te Kawenata Tawhito i tēnei wā. Kua tae atu ki te wāhanga o ngā tuhituhinga e kīa nei ko te Apokariwha, ka inoi ake ia ki te Ariki kātahi ka whiwhi tēnei tohutohu.
1–3, He tika te nuinga o ngā whakapākehātanga o te Apokariwha engari he maha ngā kupu tāpiri i whakaurua iho e ngā ringaringa o te tangata kāore nei i te pono; 4–6, He painga tēnei mō te hunga kua whakamāramahia ake e te Wairua.
1 He pono, pēnei tā te Ariki e kī atu nei ki a koutou e pā ana ki te Apokariwha–He maha ngā mea e pono ana i roto rā, ā, he tika te nuinga o ngā whakapākehātanga;
2 He maha ngā mea kei roto rā kāore e pono ana, he kupu tāpiri kē ēnā nā ngā ringaringa o te tangata.
3 He pono tāku e mea atu nei ki a koutou, nā, ehara i te mea me whakapākehā te Apokariwha.
4 Nō reira, ko te tangata e pānuitia ai, tukua ia ki mārama, nā te mea kei te whakakitea atu te pono e te Wairua;
5 Ā, ka whiwhi te tangata e whakamāramahia ake ai e te Wairua ki te pai i aua mea;
6 Ā, e kore te tangata kāore anō kia whakamāramahia ake e te Wairua e whiwhi ai ki te pai.