Wāhanga 96
He whakakitenga i hoatu ai ki a Hōhepa Mete te Poropiti, e whakaaturia atu ana te ritenga o te pā, o te pou ā-rohe rānei o Hīona ki Katarana, Ohaio, Hune 4, 1833, hei tauira ki teHunga Tapu i Katarana. He huinga mō ngā pirihi teitei te kaupapa, ā, ko te kaupapa tēnei nui i taua wā ko te tohatohatanga o ētahi whenua, e mōhiotia ana ko te Pāmu Wiwī, i hopukina ai e te Hāhi ki te wāhi e pātata ana ki Katarana. I te mea kīhai i tau te huinga ki te whakaaro kotahi e pā ana ki te tangata māna te pāmu e whakahaere, i whakaae te katoa kia inoi ake ki te Ariki e pā ana ki tēnei take.
1, Me mea te Pou ā-Rohe o Hīona hei mea kaha; 2–5, Mā te pīhopa ngā taonga tuku iho e wehewehe mō te Hunga Tapu; 6–9, Me uru a Hōani Teonetana hei mema nō te ritenga o te kotahitanga.
1 Nana, ko taku kupui tēnei ki a koutou, he whai mātauranga tēnei, mā konei mōhio ai koutou me pēhea tā koutou mahi e pā ana ki tēnei take, nā te mea e tika pū ana i roto i ahau kia meatia tēnei pou ā-rohe nāku noa nei i whakarite hei mea kaha mō Hīona, kia meinga kia kaha.
2 Nō reira, tukua taku pononga a Nuera K. Witini hei kaiwhakahaere mō taua wāhi kua whakaingoahia i waenganui i a koutou, arā, mō te wāhi e whakarite ana au kia hangaia ake taku whare tapu i reira.
3 Hei āpiti anō, tukua kia roherohengia, e rite ana ki te whai mātauranga, hei painga mō te hunga e rapu nei i te taonga tuku iho, e rite ana ki te whakatau e whakataungia ai i runga i te rūnanga i waenganui i a koutou.
4 Nō reira, kia tūpato e kite ai koutou i tēnei take, me taua wāhanga e tika ana hei painga mō taku ritenga, mō te tikanga o te whakaputanga mai i taku kupu ki ngā tamariki a te tangata.
5 Nana rā, he pono tāku e mea atu nei ki a koutou, koia te mea tino nui i roto i ahau, kia puta atu taku kupu ki ngā tamariki a te tangata, mō te mahi whakangohengohe i ngā ngākau o ngā tamariki a te tangata hei painga mō koutou. Koia anō. Āmine.
6 Hei āpiti anō, he pono tāku e mea atu nei ki a koutou, he whai mātauranga tēnei, ā, e tika pū ana i roto i ahau, kia riro atu ai tētahi kupu whakaari mō te oranga tonutanga ki taku pononga a Hōani Teonehana, kua pai nei au ki tana tāpaetanga mai, ā, kua rangona hoki ana inoi, e hoatu nei e au mehemea ka pupuri ia i aku whakahaunga haere ake nei–
7 Nā te mea he uri ia nō Hōhepa, ā, he kaitango i ngā manaakitanga o te kupu whakaari i meatia ai ki ōna tūpuna–
8 He pono tāku e mea atu nei ki a koutou, e tika pū ana i roto i ahau kia uru ai ia hei mema o te ritenga, kia āwhina ai ia i te whakaputanga mai o taku kupu ki ngā tamariki a te tangata.
9 Nō reira me whakamana koutou i a ia ki tēnei manaakitanga, ā, ka kaha whai ia ki te tango atu i ngā taumahatanga kua tau nei ki runga i te whare kua whakaingoahia ake nei i waenganui i a koutou, kia noho ai ia ki roto rā. Koia anō. Āmine.