1 ეს არის ჩემი ნება, რომ ჩემი მსახური, უორენ ა. ქაუდერი, დაინიშნოს და ხელდასხმულ იქნეს ჩემი ეკლესიის თავმჯდომარე მღვდელმთავრად, თავისუფლების მიწაზე და მის მიდამოებში;

2 და იქადაგოს ჩემი მარადიული სახარება, ხმა აღიმაღლოს და გააფრთხილოს ხალხი არა მარტო თავის მხარეში, არამედ მიმდებარე ოლქებშიც;

3 და მიუძღვნას მთელი თავისი დრო ამ მაღალ და წმინდა მოწოდებას, რომელსაც ახლა ვუბოძებ, ეძიოს ბეჯითად ზეციური სასუფეველი და მისი სამართალი და ყოველივე აუცილებელი შეემატება, ვინაიდან მშრომელი ღირსია თავისი გასამრჯელოსი.

4 და კვლავ, ჭეშმარიტად გეუბნებით: უფლის მოსვლა ახლოვდება და ამა ქვეყანას თავს დაადგება, როგორც ქურდი ღამით –

5 ამიტომ, შემოისარტყლეთ წელი, რათა იყოთ სინათლის შვილები და ის დღე არ დაგადგებათ თავს, როგორც ქურდი.

6 და კვლავ, ჭეშმარიტად გეუბნებით: ზეცაში ხარობდნენ, როდესაც ჩემმა მსახურმა, უორენმა, მუხლი მოიყარა ჩემი კვერთხის წინაშე და ჩამოშორდა ადამიანთა მზაკვრობას;

7 ამიტომ, კურთხეულია ჩემი მსახური, უორენი, ვინაიდან მოწყალე ვიქნები მის მიმართ და მიუხედავად მისი გულის პატივმოყვარეობისა, მას ავამაღლებ იმდენად, რამდენადაც დაიმდაბლებს თავს ჩემ წინაშე.

8 და ვუბოძებ მას მადლსა და დაჯერებულობას, რომელთა მეშვეობითაც იგი მედგრად გაუძლებს; და თუ დარჩება ეკლესიის ერთგულ მოწმედ და სინათლედ, მისთვის მომზადებული მაქვს გვირგვინი ჩემი მამის სავანეებში. სწორედ ასე. ამინ