1 აჰა, ასე ამბობს უფალი – ალფა და ომეგა, დასაწყისი და დასასრული, იგი, რომელიც ჯვარს აცვეს ამაქვეყნის ცოდვებისთვის –

2 აჰა, ჭეშმარიტად, ჭეშმარიტად გეუბნები, ჩემო მსახურო, ნუელ ნაით, მტკიცედ უნდა დადგე თანამდებობაზე, რომელზეც დაგნიშნე.

3 და შენს ძმებს თუ სურთ მტრისგან თავის დაღწევა, დაე, მოინანიონ ყოველი ცოდვა და ჭეშმარიტად დამდაბლდნენ ჩემ წინაშე მონანიებით.

4 და ვინაიდან, მათ დაარღვიეს ჩემთან დადებული აღთქმა, ის გაბათილდა და აღარ აქვს ძალა.

5 და ვარამი მას, ვისგანაც მოდის ეს დანაშაული, ვინაიდან მისთვის უკეთესი იქნებოდა, ზღვის სიღრმეში ჩაძირულიყო.

6 ხოლო კურთხეულნი არიან ისინი, რომლებმაც შეინარჩუნეს აღთქმა და დაიცვეს მცნება, რადგან მოწყალებას მიიღებენ.

7 ამიტომ, წადით, გაიქეცით ამ მიწიდან, რათა მტერი თავს არ დაგესხათ: გაემგზავრეთ და ვინც გსურთ, ის დაინიშნეთ წინამძღვრად, რათა იხადოს ფული თქვენთვის.

8 ამგვარად, უნდა გაემგზავროთ დასავლეთ მხარეებში, მისურის მიწაზე, ლამანიელთა საზღვრებთან.

9 და მას შემდეგ, რაც დაასრულებთ თქვენს მოგზაურობას, აჰა, გეუბნებით: მოიძიეთ არსებობის საშუალებები სხვა ადამიანებივით, სანამ ადგილს მოვამზადებ თქვენთვის.

10 და კიდევ: გაჭირვებისას იყავით მომთმენნი, ჩემს მოსვლამდე და აჰა, მე სწრაფად მოვალ და ჯილდო ჩემი არის ჩემთან და რომლებიც მეძებდნენ, იპოვიან თავიანთი სულების განსასვენებელს. სწორედ ასე. ამინ.