1 ჭეშმარიტად, ამას ამბობს უფალი ომების შესახებ, რომლებიც მალე იქნება, დაიწყება რა სამხრეთ კაროლინის ჯანყით, რომელიც საბოლოოდ დასრულდება მრავალთა სულის სიკვდილითა და უბედურებით.

2 და მოვა დრო, როდესაც ომი გადმოიღვრება ყოველ ერზე, დაიწყება რა ამ ადგილიდან.

3 ვინაიდან, აჰა, სამხრეთის შტატები გამოეყოფა ჩრდილოეთ შტატებს და სამხრეთის შტატები მოუხმობენ სხვა ერებს, თვით ეგრედ წოდებულ დიდ ბრიტანეთს, ისინიც ასევე სხვა ერებს მოუხმობენ თავის დასაცავად სხვა ერებისგან; და შემდეგ ომი გადმოიღვრება ყოველ ერზე.

4 და იქნება ასე: მრავალი დღის შემდეგ მონები აჯანყდებიან თავიანთი ბატონების წინააღმდეგ, რომლებიც ომისთვის დაირაზმებიან და მოემზადებიან.

5 და იქნება ასე, რომ მიწის დარჩენილი მცხოვრებნი დაირაზმებიან და ძალზედ განრისხდებიან და გააუბედურებენ წარმართებს მწარე უბედურებით.

6 და ასე, მახვილისა და სისხლისღვრისგან იგლოვებენ მიწის მცხოვრებნი; და შიმშილით, ჭირით, მიწისძვრითა და ზეცის ჭექა-ქუხილით, ასევე მძვინვარე და კაშკაშა ელვით, დედამიწის მცხოვრებნი იგრძნობენ რისხვასა და გულისწყრომას და დამსჯელ ხელს ყოვლადძლიერი ღმერთისა, იქამდე, სანამ დანიშნული განადგურება ყოველ ერს მთლიანად არ მოუღებს ბოლოს.

7 რათა წმინდანთა ღაღადი და წმინდანთა სისხლის ღაღადი მტრებზე შურის საძიებლად აღარ მივიდეს დედამიწიდან ცაბაოთ უფლის ყურამდე.

8 ამიტომ, დადექით წმინდა ადგილებში და იყავით ურყევნი, სანამ უფლის დღე არ მოვა; ვინაიდან, აჰა, ის მოვა მალე, – ამბობს უფალი. ამინ.