1 დიდი და საოცარი საქმე იწყება ადამიანთა შვილებისთვის.

2 აჰა, მე ვარ ღმერთი, ყური დაუგდეთ ჩემს სიტყვას, რომელიც არის ცოცხალი და ძლიერი, ორპირ ხმალზე ბასრი, ნაკუწებად აქცევს სახსრებსა და ძვლის ტვინს, ამიტომ ყური დაუგდეთ ჩემს სიტყვებს.

3 აჰა, უკვე თეთრია ყანა, მკისთვის მომწიფებული; ამიტომ, ვისაც სურს მოსავლის აღება, დაე, ნამგალი მოიქნიოს ძალ-ღონით, სანამ დღეა, რათა საკუთარი სულისთვის დაიუნჯოს მარადიული ხსნა ღვთის სასუფეველში.

4 დიახ, რომელიც მოიქნევს თავის ნამგალს და მოსავალს მოიმკის, ის იქნება ღვთისგან მოწოდებული.

5 ამიტომ, თუ მთხოვთ – მიიღებთ; თუ დააკაკუნებთ – გაგეღებათ.

6 ახლა, რადგან მკითხეთ, აჰა, გეუბნებით: დაიცავით ჩემი მცნებები და ეცადეთ წინ წაიყვანოთ და განახორციელოთ სიონის საქმე;

7 ეძიეთ არა სიმდიდრე, არამედ სიბრძნე; და აჰა, ღმერთის საიდუმლოებები გაგეხსნებათ და მაშინ გახდებით მდიდარნი. აჰა, ის არის მდიდარი, ვისაც აქვს მარადიული სიცოცხლე.

8 ჭეშმარიტად, ჭეშმარიტად გეუბნები: რასაც ისურვებ ჩემგან, ის მოგეცემა; და თუ ისურვებ, ამ თაობაში შენი მეშვეობით შესაძლებელი იქნება მრავალი სიკეთის კეთება.

9 არ უთხრა ამ თაობას არაფერი, გარდა მონანიებისა; დაიცავი ჩემი მცნებები და დაეხმარე, განხორციელდეს ჩემი საქმე ჩემი მცნებების შესაბამისად და კურთხეული იქნები.

10 აჰა, შენ გაქვს ძღვენი და კურთხეული ხარ შენი ძღვენის გამო. გახსოვდეს: ეს არის წმინდა და მოდის ზემოდან –

11 და თუ მკითხავ, მაშინ გაიგებ საიდუმლოებებს, რომლებიც დიდი და საოცარია, ამიტომ, გამოავლინე შენი ძღვენი, რათა ჩასწვდე საიდუმლოებებს, რომ შეძლო მრავალთა მოყვანა ჭეშმარიტების ცოდნისაკენ, დიახ, მათი დარწმუნება საკუთარი გზების სიმცდარეში.

12 არავის გაანდო შენი ძღვენი, მათ გარდა, რომლებიც არიან შენი რწმენის. ნუ მოექცევი დაუდევრად იმას, რაც არის წმინდა.

13 თუ სიკეთეს გააკეთებ, დიახ, დარჩები ბოლომდე ერთგული, გადარჩები ღვთის სასუფეველში და ეს არის ღვთის უდიდესი ძღვენი; ვინაიდან არ არსებობს ხსნის ძღვენზე უფრო დიდი ძღვენი.

14 ჭეშმარიტად, ჭეშმარიტად გეუბნები, კურთხეული ხარ იმისთვის, რაც გააკეთე; ვინაიდან მკითხე და აჰა, რამდენჯერაც მკითხე, იმდენჯერ მიიღე ჩემი სულისგან დარიგებები. ასე რომ არ ყოფილიყო, ვერ მოხვიდოდი იქ, სადაც ახლა იმყოფები.

15 აჰა, შენ იცი, რომ მკითხე და მე გონება გაგინათე; და ახლა გეუბნები ამას, რათა იცოდე, რომ შენ ჭეშმარიტების სულით განათლდი;

16 დიახ, გეუბნები, რათა იცოდე: ღმერთის გარდა არავინ იცის შენი ფიქრები და გულის ზრახვები.

17 გეუბნები ამას შენთვის დასამოწმებლად, რომ სიტყვები ანუ ნაშრომი, რომელსაც შენ იწერდი, არის ჭეშმარიტი.

18 ამიტომ, იყავი ბეჯითი, გვერდში ერთგულად დაუდექი ჩემს მსახურს, ჯოზეფს, რაოდენ მძიმე პირობებშიც არ უნდა აღმოჩნდეს იგი სიტყვის გამო.

19 გააფრთხილე იგი შეცდომების შესახებ და ასევე მიიღე მისგან გაფრთხილება. იყავი მომთმენი; იყავი ფხიზლად; იყავი თავშეკავებული; იქონიე მოთმინება; იქონიე რწმენა, იმედი და გულმოწყალება.

20 აჰა, შენ, ოლივერ, გელაპარაკებოდი შენი სურვილისამებრ; ამიტომ, გულში შეინახე ეს სიტყვები. იყავი ერთგული და ბეჯითი ღმერთის მცნებების დაცვაში და მე შემოგეხვევი ჩემი სიყვარულით სავსე ხელებით.

21 აჰა, მე ვარ იესო ქრისტე – ძე ღვთისა. ვარ იგივე, რომელიც მოვედი ჩემებთან და ჩემებმა არ მიმიღეს. ვარ სინათლე ბნელში მანათობელი და ბნელმა იგი ვერ მოიცვა.

22 ჭეშმარიტად, ჭეშმარიტად გეუბნები: თუ გსურს, მიიღო დამატებითი დამოწმება, გაიხსენე ღამე, როდესაც გულში შემომტიროდი, რათა გაგეგო ჭეშმარიტება ყოველივე ამის შესახებ.

23 ნუთუ არ დაგიმშვიდე გონება ამ საკითხის შესახებ? ღმერთისგან მიღებულ დამოწმებაზე უფრო დიდი დამოწმება რა უნდა მიიღო?

24 და ახლა, აჰა, შენ მიიღე დამოწმება; ვინაიდან, თუ მე გითხარი ის, რაც არავინ იცის, ნუთუ არ მიიღე დამოწმება?

25 და აჰა, გაძლევ ძღვენს, თუ ეს ჩემგან გსურს, რათა თარგმნო, როგორც ჩემმა მსახურმა, ჯოზეფმა.

26 ჭეშმარიტად, ჭეშმარიტად გეუბნები: არის ჩანაწერები, რომლებიც შეიცავს ჩემი სახარების დიდ ნაწილს, რომელიც დაფარული იყო ხალხის სიბოროტის გამო;

27 და ახლა, გიბრძანებ: თუ გაქვს კეთილი სურვილები – სურვილი, რომ ზეცაში დაიუნჯო საუნჯე, მაშინ შენი ძღვენით დაეხმარები, სინათლეზე გამოიტანო ჩემი წმინდა წერილების ის ნაწილები, რომლებიც ურჯულოების გამო იყო დაფარული.

28 და ახლა, აჰა, მე გაძლევ შენ და ჩემს მსახურს, ჯოზეფ სმითს, ამ ძღვენის გასაღებებს, რაც სინათლეზე გამოიტანს ამ მსახურებას; და ორი ან სამი მოწმის პირით დამტკიცდება ყოველი სიტყვა.

29 ჭეშმარიტად, ჭეშმარიტად გეუბნები, თუ ისინი უარყოფენ ჩემს სიტყვებს, ჩემი სახარების და სამსახურის ამ ნაწილს, კურთხეულნი ხართ, ვინაიდან ვერ გიზამენ იმაზე მეტს, რაც მე დამმართეს.

30 და კურთხეულნი ხართ, თუ დაგმართებენ იმას, რაც მე დამმართეს, ვინაიდან იცხოვრებთ დიდებაში ჩემთან ერთად.

31 მაგრამ, თუ არ უარყოფენ ჩემს სიტყვებს, რომლებიც დამტკიცდება დამოწმებებით, რომლებიც იქნება მოცემული, კურთხეულნი იქნებიან და მაშინ გექნებათ თქვენი შრომის ნაყოფში სიხარული.

32 ჭეშმარიტად, ჭეშმარიტად გეუბნებით, როგორც ვუთხარი ჩემს მოწაფეებს: სადაც ორი ან სამი შეიკრიბება ჩემი სახელით, ერთი საქმისთვის, აჰა – მეც იქვე ვიქნები მათ შორის, ისევე, როგორც ვარ თქვენ შორის.

33 ნუ გეშინიათ სიკეთის კეთების, ჩემო შვილებო, ვინაიდან რასაც დათესავთ, იმას მოიმკით, ამიტომ, თუ სიკეთეს დათესავთ, თქვენთვის ჯილდოდ სიკეთეს მოიმკით.

34 ამიტომ, ნუ გეშინია, პატარა სამწყსოვ; აკეთე სიკეთე; თუნდაც დედამიწა და ჯოჯოხეთი გაერთიანდეს თქვენ წინააღმდეგ, ვინაიდან თუ აგებულნი ხართ ჩემს კლდეზე, ისინი ვერ დაგამარცხებენ.

35 აჰა, არ განგსჯით, წადით თქვენი გზით და მეტი აღარ შესცოდოთ; კეთილგონიერად შეასრულეთ საქმე, რომელიც გიბრძანეთ.

36 მე დამეყრდენით ყოველ ფიქრში, ნუ ეჭვობთ, ნუ გეშინიათ.

37 შეხედეთ ჩემს გვერდში მოყენებულ ჭრილობებს, ასევე ლურსმნების კვალს ჩემს ხელებსა და ტერფებზე; იყავით ერთგულნი, დაიცავით ჩემი მცნებები და მემკვიდრეობით მიიღებთ ცათა სასუფეველს. ამინ.