1 ყური დამიგდეთ, – ამბობს უფალი, თქვენი ღმერთი, ჩემი მსახური ოლივერ ქაუდერის გამო. არ არის ბრძნული, რომ მას მიანდოთ აღთქმები და თანხები, რომლებსაც იგი წაიღებს სიონის მიწაზე, თუ ვინმე არ წავა მასთან ერთად, რომელიც იქნება მართალი და ერთგული.

2 ამიტომ, მე, უფალს, მსურს, რომ ჩემი მსახური, ჯონ ვიტმერი, გაემგზავროს ჩემს მსახურთან, ოლივერ ქაუდერისთან, ერთად.

3 და ასევე, რომ გააგრძელოს წერა და ისტორიის შედგენა ყოველი მნიშვნელოვანი მოვლენის თაობაზე, რომელსაც იგი იხილავს და გაიგებს ეკლესიის შესახებ.

4 და ასევე, რომ მიიღოს რჩევა და დახმარება ჩემი მსახურისგან, ოლივერ ქაუდერისგან და სხვებისგან.

5 და ასევე, რომ ჩემმა მსახურებმა, რომლებიც შორეულ მიწებზე იმყოფებიან, გამოაგზავნონ ანგარიში თავიანთი ხელმძღვანელობის შესახებ სიონის მიწაზე:

6 ვინაიდან, სიონის მიწა დაინიშნება და იქნება ყოველივე ამის მიღებისა და აღსრულების ადგილი.

7 მიუხედავად ამისა, დაე, ჩემი მსახური, ჯონ ვიტმერი, მრავალჯერ გაემგზავროს ერთი ადგილიდან მეორეზე, ეკლესიიდან ეკლესიაში, რათა უფრო ადვილად მიიღოს ცოდნა –

8 ქადაგებითა და განმარტებით, წერითა და ასლის შედგენით, ამორჩევით და შეძენით ყოველივე იმისა, რაც სასიკეთო იქნება ეკლესიისთვის და მომავალი თაობებისთვის, რომლებიც გაიზრდებიან სიონის მიწაზე, რათა გადასცენ ის თაობიდან თაობაზე, უკუნითი უკუნისამდე. ამინ.