1 იესო ქრისტეს გამოცხადება მისი მსახურის ჯოზეფ სმით უმცროსისა და ექვსი უხუცესისადმი, როდესაც ერთიანი გულით ზეცისკენ აღიმაღლეს ხმები.

2 დიახ, სიტყვა უფლისა თავისი ეკლესიის შესახებ, უკანასკნელ დღეებში დაფუძნებული თავისი ხალხის აღსადგენად, როგორც ილაპარაკა თავის წინასწარმეტყველთა პირით და წმინდანთა შესაკრებად, რომ დადგნენ სიონის მთაზე, რომელიც იქნება ახალი იერუსალიმის ქალაქი.

3 ქალაქი, რომელიც აშენდება ტაძრის მიწის ნაკვეთიდან დაწყებული, უფლის თითით მითითებულ, მისურის შტატის დასავლეთ საზღვრებში, ჯოზეფ სმით უმცროსისა და სხვების ხელით მიძღვნილი, რომლებითაც უფალი ძალზედ კმაყოფილია.

4 ჭეშმარიტად, ეს არის უფლის სიტყვა, რომ ქალაქი ახალი იერუსალიმი აშენდება წმინდანთა შეკრებით, დაწყებული ამ ადგილიდან ანუ ტაძრის ადგილიდან, ტაძრის, რომელიც აშენდება ამ თაობაში.

5 ვინაიდან ჭეშმარიტად, ეს თაობა მთლიანად არ გადაივლის, სანამ არ აშენდება სახლი უფლისთვის და სანამ მას ღრუბელი არ მოეფინება და ეს ღრუბელი იქნება თვით უფლის ბრწყინვალება, რომელიც აავსებს სახლს.

6 და მოსეს ძენი, შესაბამისად წმინდა მღვდლობისა, რომელიც მან მიიღო თავისი სიმამრის, ითროს ხელით;

7 და ითორმა მიიღო ეს ქალიბის ხელით;

8 და ქალიბმა მიიღო ეს ელიჰუს ხელით;

9 და ელიჰუმმა იერემიას ხელით;

10 და იერემიამ გადის ხელით;

11 და გადმა ესიას ხელით;

12 ესიასმა მიიღო ეს ღმერთის ხელით.

13 ესიასი ასევე ცხოვრობდა აბაამის დღეებისას და კურთხეული იყო მისგან –

14 აბრაამი, რომელმაც მიიღო მღვდლობა მელქიცედეკისგან, რომელმაც ეს მიიღო თავისი მამებისაგან გვარტომობით თავად ნოემდე;

15 და ნოედან ენოქამდე, მათი მამების გვარტომობით;

16 და ენოქისგან აბელს, რომელიც თავის ძმის შეთქმულებით მოკლულ იქნა, რომელმაც მიიღო მღვდლობა ღმერთის ბრძანებით, თავისი მამის, ადამის ხელით, რომელიც იყო პირველი ადამიანი –

17 მღვდლობა, რომელიც ღმერთის ეკლესიაში გრძელდება ყოველ თაობაში და არ აქვს დასაწყისი, არც წლების დასასრული.

18 და უფალმა მღვდლობა დაამტკიცა აარონზე და მის შთამომავლობაზე, მთლიანად მის თაობებზე, მღვდლობა, რომელიც გრძელდება და იმყოფება სამუდამოდ მღვდლობასთან, რომელიც არის ღმერთის წმინდა წესის მიხედვით.

19 და ეს უმაღლესი მღვდლობა განაგებს სახარებას და ფლობს სამეფოს საიდუმლოებათა გასაღებს, თვით ღმერთის ცოდნის გასაღებებსაც.

20 ამიტომ, მის წეს-ჩვეულებებში გამოვლინდება ღვთისმოსაობის ძალა.

21 მისი წეს-ჩვეულებებისა და მღვდლობის უფლებამოსილების გარეშე ღვთისმოსაობის ძალა არ გამოვლინდება ხორცში მყოფი ადამიანისთვის.

22 ვინაიდან, ამის გარეშე ვერცერთი ადამიანი ვერ იხილავს ღვთის სახეს, თვით მამას და ვერ იცოცხლებს.

23 მოსე ნათლად ასწავლიდა ამას ისრაელის შვილებს უდაბნოში და ბეჯითად ცდილობდა თავისი ხალხის განწმენდას, რათა მათ შეძლებოდათ ღვთის სახის ნახვა;

24 მაგრამ მათ გაიქვავეს გულები და ვეღარ აიტანეს მისი გარემოცვა; ამიტომ, უფალმა თავის მრისხანებაში დაიფიცა, ვინაიდან მისი რისხვა დაენთო მათ წინააღმდეგ, დაიფიცა, რომ ისინი ვერ შევიდოდნენ მის სავანეში უდაბნოში ყოფნისას, იმ სავანეში, რომელიც არის მისი ბრწყინვალების სისავსე.

25 ამიტომ, მოაცილა მათ გარემოცვას მოსე და ასევე წმინდა მღვდლობაც;

26 და გაგრძელდა მცირე მღვდლობა, რომელიც ფლობს ანგელოზთა მსახურებისა და მოსამზადებელი სახარების გასაღებს;

27 სახარების, რომელიც არის მონანიების, ნათლობისა და ცოდვების მიტევების სახარება და კანონი ხორციელი მცნებებისა, რომელიც უფალმა თავის მრისხანებაში ბრძანა, აარონის სახლს გაეგრძელებინა ისრაელის შვილებს შორის, იოანემდე, რომელიც აამაღლა ღმერთმა, იყო რა იგი დედის მუცლიდანვე სულიწმინდით აღვსილი.

28 ვინაიდან, იგი მოინათლა ჯერ კიდევ ბავშვობისას და როდესაც ის რვა დღის იყო, ღმერთის ანგელოზის მიერ იქნა ხელდასხმული ამ ძალით, რათა დაემხო იუდეველთა სამეფო და გაესწორებინა გზა უფლისთვის, მისი ხალხის წინაშე, რათა მოემზადებინა ისინი უფლის მოსვლისთვის, რომლის ხელშია ნაბოძები მთელი ძალაუფლება.

29 და კვლავ, უხუცესისა და ეპისკოპოსის თანამდებობები არის აუცილებელი დანართი, მიეკუთვნებიან რა უმაღლეს მღვდლობას.

30 და კვლავ, მასწავლებლისა და დიაკვნის თანამდებობები არის აუცილებელი დანართი, მიეკუთვნებიან რა მცირე მღვდლობას, იმ მღვდლობას, რომელიც იყო ხელდასხმული აარონზე და მის შვილებზე.

31 ამიტომ, როგორც ვთქვი მოსეს შვილების შესახებ – ვინაიდან მოსეს შვილებმა და ასევე აარონის შვილებმა უნდა შესწირონ მისაღები შესაწირავი უფლის სახლში, იმ სახლში, რომელიც აშენდება უფლისთვის ამ თაობაში, დანიშნულ ადგილზე, როგორც მე მივუთითე –

32 და მოსეს შვილები და აარონის შვილები უფლის ბრწყინვალებით აღივსებიან სიონის მთაზე, უფლის სახლში, ვისი შვილებიც ხართ თქვენ; ასევე მრავალნი, რომლებსაც მოვუწოდე და გავაგზავნე, რათა ააშენონ ჩემი ეკლესია.

33 ვინაიდან, რომელნიც ერთგულნი რჩებიან ამ ორი მღვდლობის მისაღებად, რომლებზეც ვილაპარაკე და ადიდებენ თავიანთ მოწოდებას – იწმინდებიან სულით, თავიანთი სხეულების განახლებისთვის.

34 ისინი იქცევიან მოსესა და აარონის შვილებად და აბრაამის შთამომავლებად; ღმერთის ეკლესიად და სამეფოდ და რჩეულებად.

35 და ასევე ყველა, ვინც იღებს ამ მღვდლობას, მიღებს მე, – ამბობს უფალი;

36 ვინაიდან, ვინც იღებს ჩემს მსახურებს, მე მიღებს;

37 და ვინც მიღებს მე, იღებს ჩემს მამას;

38 და ვინც იღებს ჩემს მამას, იღებს ჩემი მამის სასუფეველს; ამიტომ, ყველაფერი, რაც აქვს ჩემს მამას, მიეცემა მას.

39 და ეს ფიცისა და აღთქმის შესაბამისად, რომელიც მღვდლობას ეკუთვნის.

40 ამიტომ, ყოველი, ვინც მღვდლობას იღებს, იღებს ჩემი მამის ამ ფიცსა და აღთქმას, რომელსაც იგი ვერ დაარღვევს, რომლის მოცილებაც შეუძლებელია.

41 მაგრამ, ვინც არღვევს ამ აღთქმას მისი მიღების შემდეგ და მთლიანად ზურგს აქცევს მას, არ ექნება ცოდვების შენდობა, არც ამ ქვეყნად, არც იმ ქვეყნად.

42 და ვარამი ყველა მათ, რომლებიც არ მოდიან ამ მღვდლობისთვის, რომელიც თქვენ მიიღეთ, რომელსაც ახლა ვამტკიცებ თქვენზე, ვინც დღეს აქ იმყოფებით, ზეციდან ჩემი ხმით, თავად ვავალდებულებ ზეციურ ცაბაოთ და ჩემს ანგელოზებს თქვენს ზედამხედველობას.

43 და მე ახლა გაძლევთ ბრძანებას, რათა თავს გაუფრთხილდეთ და ბეჯითად ყური დაუგდოთ მარადიული სიცოცხლის სიტყვებს.

44 ვინაიდან, უნდა იცხოვროთ ყოველი სიტყვის შესაბამისად, რომელიც მოდის ღმერთის პირიდან.

45 ვინაიდან, უფლის სიტყვა არის ჭეშმარიტება და რაც ჭეშმარიტებაა ის არის სინათლე და რაც სინათლეა არის სული, სული იესო ქრისტესი.

46 და სული უბოძებს სინათლეს ყოველ ადამიანს, რომელიც მოდის ამქვეყნად და სული ანათლებს მთელ ქვეყანაზე ყოველ ადამიანს, რომელიც ყურს უგდებს სულის ხმას.

47 და ყოველი, ვინც ყურს უგდებს სულის ხმას, მოდის ღმერთთან, მამასთან.

48 და მამა ასწავლის მას აღთქმას, რომელიც მან განაახლა და დაამტკიცა თქვენზე, რაც თქვენზეა დამტკიცებული თქვენთვის და არა მარტო თქვენთვის, არამედ მთელი ქვეყნისთვის.

49 და მთელი ქვეყანა ცოდვაშია ჩავარდნილი და კვნესის სიბნელისა და ცოდვის ტყვეობის ქვეშ.

50 და ამით შეძლებთ გაიგოთ, რომ არიან ცოდვისტყვეობის ქვეშ, ვინაიდან ჩემთან არ მოდიან.

51 ვინაიდან, რომელიც ჩემთან არ მოდის, არის ცოდვის ტყვეობის ქვეშ.

52 და ვინც არ ისმენს ჩემს ხმას, არ ცნობს ჩემს ხმას და არ არის ჩემგან.

53 და ამით შეძლებთ, გაარჩიოთ სამართლიანი ბოროტისგან და რომ ახლაც კი, მთელი ქვეყანა კვნესის ცოდვისა და სიბნელის ქვეშ.

54 და წარსულში თქვენი გონება ურწმუნოებისგან დაბნელებული იყო და იმის გამო, რომ დაუდევრად ეპყრობოდით იმას, რაც მიიღეთ –

55 რომლის ამაოებამ და ურწმუნოებამ მოიყვანა მთელი ეკლესია განსასჯელის ქვეშ.

56 და ეს განსასჯელი აწევს სიონის შვილებს, დიახ, ყველას.

57 და ისინი დარჩებიან ამ განსასჯელის ქვეშ, სანამ არ მოინანიებენ და არ გაიხსენებენ ახალ აღთქმას, მორმონის წიგნსა და უწინდელ ბრძანებებს, რომლებიც მივეცი მათ არა მარტო სალაპარაკოდ, არამედ სამოქმედოდ, იმის შესაბამისად, რაც მე დავწერე –

58 რათა შეძლონ ნაყოფის მოტანა, ღირსი თავიანთი მამის სასუფევლისა; სხვაგვარად რჩება მათრახი და განაჩენი, რათა გადმოიქცეს სიონის შვილებზე.

59 ვინაიდან, ნუთუ წაბილწავენ სამეფოს შვილები ჩემს წმინდა მიწას? ჭეშმარიტად გეუბნებით: არა.

60 ჭეშმარიტად, ჭეშმარიტად გეუბნებით, რომლებსაც ახლა გესმით ჩემი სიტყვები, რომელიც არის ჩემი ხმა, კურთხეულნი ხართ იმდენად, რამდენადაც იღებთ ყოველივე ამას.

61 ვინაიდან, შეგინდობთ ცოდვებს, ასევე ამ მცნებას გაძლევთ – რათა მტკიცედ იდგეთ თქვენს მოსაზრებაზე, სიდინჯითა და ლოცვის სულით, მთელი ქვეყნის წინაშე დამოწმების გაზიარებისას ყოველივე იმის შესახებ, რაც თქვენ გეცნობათ.

62 ამიტომ, წადით მთელ ქვეყანაზე და იქ, სადაც ვერ მიდიხართ, უნდა გააგზავნოთ დამოწმება, რომ თქვენგან გავრცელდეს იგი მთელ ქვეყანაზე, ყოველი არსებისთვის.

63 და როგორც ვუთხარი ჩემს მოციქულებს, ასევე გეუბნებით თქვენ, ვინაიდან ხართ ჩემი მოციქულები, თვით ღმერთის მღვდელმთავრები, ხართ ისინი, რომლებიც მამამ მიბოძა; თქვენ ხართ ჩემი მეგობრები;

64 ამიტომ, როგორც ვუთხარი ჩემს მოციქულებს, კვლავ გეუბნებით, რომ ყოველი სული, რომელიც იწამებს თქვენს სიტყვებს და წყლით მოინათლება ცოდვების მისატევებლად, მიიღებს სულიწმინდას.

65 და ვინც იწამებს, მათი თანმდევი იქნება ეს ნიშნები –

66 ჩემი სახელით მოახდენენ მრავალ სასწაულს;

67 ჩემი სახელით განდევნიან ეშმაკებს;

68 ჩემი სახელით განკურნავენ ავადმყოფებს;

69 ჩემი სახელით თვალს აუხელენ ბრმას და სმენას უბოძებენ ყრუს;

70 და მუნჯის ენა ამეტყველდება;

71 და თუ რომელიმე ადამიანი შხამს მისცემს მათ, ეს მათ არ ავნებს;

72 და გველის შხამს არ ექნება ძალა, რომ მათ ავნოს.

73 მაგრამ მათ ვაძლევ ბრძანებას, რომ არ იტრაბახონ ყოველივე ამით, არც ილაპარაკონ ამაზე ქვეყნის წინაშე, ვინაიდან ეს ნაბოძები გაქვთ თქვენს სასარგებლოდ და ხსნისთვის.

74 ჭეშმარიტად, ჭეშმარიტად გეუბნებით: ვისაც არ სწამს თქვენი სიტყვების და ჩემი სახელით არ ინათლებიან წყალში ცოდვების მისატევებლად და სულიწმინდის მისაღებად, წყეულნი იქნებიან და ვერ შემოვლენ ჩემი მამის სასუფეველში, სადაც ჩემი მამა და მე ვიმყოფებით.

75 და ეს თქვენთვის მოცემული გამოცხადება და ბრძანება ძალაშია ამ საათიდან მთელ ქვეყანაზე და ყველას ეძლევა სახარება, ვინც ის ვერ მიიღო.

76 ხოლო ყველას, ვისაც ებოძა სამეფო, ჭეშმარიტად ვეუბნები: მათ უნდა თქვენგან ექადაგოთ, რათა მოინანიონ თავიანთი წარსული ბოროტი საქმენი; ვინაიდან, უნდა განიკიცხონ თავიანთი ურწმუნო ბოროტი გულის გამო და თქვენი ძმები – თავიანთი ჯანყის გამო სიონში თქვენ წინააღმდეგ, როდესაც იქ გაგაგზავნეთ.

77 და კვლავ გეუბნებით, ჩემო მეგობრებო: ვინაიდან ამიერიდან თქვენ გიწოდებთ მეგობრებს საჭიროა, ეს ბრძანება მოგცეთ, რათა გახდეთ როგორც ჩემი მეგობრები იმ დღეებისა, როდესაც მათთან ერთად ვმოგზაურობდი ჩემი ძალით სახარების საქადაგებლად;

78 ვინაიდან არ დავუშვი, რომ ჰქონოდათ ქისა, თამასუქი ან ორი ქურთუკი.

79 აჰა, გაგზავნით, რათა გამოსცადოთ ამასოფელი და მშრომელი ღირსეულია თავისი ჯამაგირის.

80 და ნებისმიერ ადამიანს, რომელიც წავა და სასუფევლის სახარებას იქადაგებს და ბოლომდე ერთგული დარჩება ყოველივეში, არ დაექანცება მას გონება, არც დაებინდება, არც სხეული დაუსუსტდება, არც კიდური ან სახსარი; და თმა არ ჩამოუვარდება შეუმჩნევლად თავიდან მიწაზე. და ისინი არ იქნებიან მშიერნი, არც მწყურვალნი.

81 ამიტომ, ნუ იზრუნებთ ხვალინდელ დღეზე, იმაზე რას შეჭამთ ან დალევთ, ან რით შეიმოსებით.

82 ვინაიდან, შეხედეთ, როგორ იზრდებიან ველის შროშანნი, არც შრომობენ, არც ართავენ; და ამაქვეყნის სამეფონი მთელი თავისი ბრწყინვალებით არ არიან შემოსილნი, როგორც ერთ-ერთი მათგანი.

83 ვინაიდან, თქვენმა მამამ, რომელიც ზეცაშია იცის, რომ ყოველივე ეს გჭირდებათ.

84 ამიტომ, დაე, ხვალინდელმა დღემ თვითონ იზრუნოს თავის თავზე.

85 წინასწარ ნუ იდარდებთ, რას იტყვით; არამედ დაიუნჯეთ მუდამ სიცოცხლის სიტყვები გონებაში და გებოძებათ ზუსტად იმ საათს ის, რაც ყოველი ადამიანისთვის იქნება მისი ხვედრი.

86 ამიტომ, დაე, თქვენ შორის არც ერთმა ადამიანმა – ვინაიდან ეს არის ბრძანება ყოველი ერთგულისთვის, რომელიც ღვთის მიერ მოწოდებულია, იმსახუროს ეკლესიაში – ამ საათიდან არ აიღოს ქისა ან გუდა, წავა რა ამ სასუფევლის სახარების საქადაგებლად.

87 აჰა, გაგზავნით, რათა განკიცხოთ ქვეყანა ყველა უსამართლო საქმეებისთვის და ასწავლოთ მას მომავალი სამსჯავროს შესახებ.

88 და ვინც მიგიღებთ, იქ ვიქნები მეც, ვინაიდან მე ვივლი თქვენ წინ, მე ვიქნები თქვენ მარჯვნივ და მარცხნივ, ჩემი სული იქნება თქვენს გულებში და ჩემი ანგელოზები – თქვენ გარშემო, რათა მხარში ამოგიდგნენ.

89 ვინც მიგიღებთ, მიმიღებს მე და იგი გამოგკვებავთ, ჩაგაცმევთ და ფულს მოგცემთ.

90 და ვინც გამოგკვებავთ ან ჩაგაცმევთ, ან მოგცემთ ფულს, არავითარ შემთხვევაში არ დაკარგავს თავის ჯილდოს.

91 და ვინც ყოველივე ამას არ აკეთებს, არ არის ჩემი მოწაფე; ამით შეძლებთ, იცნოთ ჩემი მოწაფეები.

92 და ვინც არ მიგიღებთ, განშორდით მას მარტო და განიბანეტ ფეხები წყლით, წმინდა წყლით, თუნდაც სიცხეში ან სიცივეში; და მამას, რომელიც ზეცაშია, დაუმოწმეთ ამაზე და აღარ დაბრუნდეთ იმ ადამიანთან.

93 და რომელ სოფელსა თუ ქალაქში არ უნდა შეხვიდეთ, იგივე გააკეთეთ.

94 მიუხედავად ამისა, ბეჯითად ეძიეთ და არ დაიშუროთ; და ვარამი იმ სახლს და იმ სოფელს ან ქალაქს, სადაც თქვენ უარგყოფენ, ან უარყოფენ თქვენს სიტყვებს, ან თქვენს დამოწმებას ჩემზე.

95 ვარამი, კვლავ ვამბობ, იმ სახლს, სოფელს ან ქალაქს, სადაც უარგყოფენ, ან უარყოფენ თქვენს სიტყვებს, ან თქვენს დამოწმებას ჩემზე.

96 ვინაიდან მე, ყოვლადძლიერმა, ხელი დავადე ერებს, რათა გავამათრახო ისინი მათი სიბოროტისთვის.

97 და ჭირი გავრცელდება და არ მოსცილდება დედამიწას, სანამ არ დავასრულებ ჩემს საქმეს, რომელიც სამართლიანობაში მალე დასრულდება –

98 სანამ ყოველი გადარჩენილი არ შემიცნობს, უმდაბლესიდან უდიდესამდე და არ აღივსებიან უფალზე ცოდნით და საკუთარი თვალით არ იხილავენ და არ აღიმაღლებენ ხმას და ერთიანი ხმით არ იმღერებენ ამ ახალ სიმღერას სიტყვებით:

99 უფალმა კვლავ აღადგინა სიონი;უფალმა გამოისყიდა თავისი ხალხი, ისრაელი,მადლის არჩევანით,რაც აღსრულდა რწმენითადა აღთქმით მათი მამებისა.

100 უფალმა გამოისყიდა თავისი ხალხი;სატანა დატყვევებულია და აღარ არსებობს დრო.უფალმა შეკრიბა ყოველივე ერთად.უფალმა მაღლიდან მოავლინა სიონი.უფალმა ქვემოდან მოავლინა სიონი.

101 მიწამ იტანჯა და მოიტანა ძალა თავისი;და ჭეშმარიტება დაარსდა მის წიაღში;და ზეცამ მას გაუღიმა;და იგი შემოსილია თავისი ღმერთის დიდებით;ვინაიდან იგი დგას თავის ხალხს შორის.

102 დიდება, პატივი, ძალაუფლება და სიძლიერემიეგოს ჩვენს ღმერთს, ვინაიდან იგი სავსეა მოწყალებით,სამართლიანობით, მადლით, ჭეშმარიტებითა და მშვიდობით,უკუნითი უკუნისამდე, ამინ.

103 და კვლავ, ჭეშმარიტად, ჭეშმარიტად გეუბნებით: საჭიროა, რომ ყოველმა ადამიანმა, რომელიც ჩემი მარადიული სახარების საუწყებლად მიდის და ჰყავს ოჯახი და მიიღებს ფულს საჩუქრად, გაუგზავნონ ის ოჯახს ან მის სასარგებლოდ გამოიყენონ, როგორც უფალი მათ მიუთითებთ, ვინაიდან ამას ვთვლი სასარგებლოდ.

104 დაე, ყველამ, ვისაც არ ჰყავს ოჯახი, რომლებიც მიიღებენ ფულს, გაუგზავნონ ის ეპისკოპოსს სიონში ან ეპისკოპოსს ოჰაიოში, რათა ეს თანხები მიძღვნილ იქნეს გამოცხადებების გამოცემისთვის და ბეჭდვისთვის და სიონის დასაფუძნებლად.

105 და რომელიმე ადამიანმა თუ მოგცათ რომელიმე თქვენგანს ქურთუკი ან ტანისამოსი, აიღეთ და თქვენი ძველი უბოძეთ ღარიბს და გააგრძელეთ გზა სიხარულით.

106 თუ რომელიმე ადამიანი თქვენ შორის ძლიერია სულით, დაე, თან წაიყვანოს ის, რომელიც სუსტია, რათა მან მიიღოს ცოდნა თვინიერებით და ასევე შეძლოს გაძლიერება.

107 ამიტომ, თან წაიყვანეთ ისინი, რომლებიც ხელდასხმულნი არიან მცირე მღვდლობით და თქვენ წინ გაუშვით შეხვედრების დასანიშნად, რათა მოამზადონ გზა და ჩაატარონ შეხვედრები, რომლებზეც თქვენ ვერ შეძლებთ დასწრებას.

108 აჰა, ეს არის მოქმედების წესი, რომლითაც ჩემმა მოწაფეებმა ძველ დროს ააშენეს ჩემი ეკლესია ჩემთვის.

109 ამიტომ, დაე, ყოველი ადამიანი დადგეს თავის თანამდებობაზე და იშრომოს საკუთარი მოწოდებისამებრ; და ნუ ეტყვის თავი ფეხებს, რომ თავს არ სჭირდება ფეხები, ვინაიდან ფეხების გარეშე, როგორ შეძლებს ტანი დგომას?

110 ასევე სხეულს სჭირდება ყოველი მისი კიდური, რათა ერთადგამტკიცდნენ, რათა ორგანიზმი იყოს სრულყოფილი.

111 და აჰა, მღვდელმთავრებმა უნდა იმოგზაურონ, ასევე უხუცესებმა და მცირე სამღვდელოების მღვდლებმა, ხოლო დიაკვანები და მასწავლებლები უნდა დაინიშნონ ეკლესიის ზედამხედველებად, რათა იყვნენ ადგილზე ეკლესიის მსახურები.

112 და ეპისკოპოსმა, ნუელ კ. უიტნიმ, ასევე უნდა იმოგზაუროს გარშემო ყოველ ეკლესიაში და ეძებოს ღარიბნი, რათა გაუწიოს დახმარება მათი მოთხოვნებისამებრ, მდიდართა და ამაყთა დამდაბლებით.

113 მან ასევე უნდა დაიქირაოს მოხელე, რათა დაავალოს მართვა და საერო საქმეების წარმოება, როგორც თავად მიუთითებს.

114 ამისდა მიუხედავად, დაე, ეპისკოპოსი ეწვიოს ქალაქ ნიუ-იორკს, ასევე ქალაქ ალბანისა და ასევე ქალაქ ბოსტონს და ხმამაღლა გააფრთხილოს ამ ქალაქების მცხოვრებნი, სახარების ხმით, აოხრებასა და სრულ განადგურებაზე, რაც მათ მოელით, თუ ყოველივე ამას უარყოფენ.

115 ვინაიდან, თუ მათ ყოველივე ეს უარყვეს, მათი განკითხვის საათი მოახლოვდა და მათი სახლები დარჩება აოხრებული.

116 დაე, მას ჰქონდეს ჩემში ნდობა და არ შეიმუსრება; და თმა არ ჩამოუვარდება თავიდან მიწაზე, შეუმჩნევლად.

117 და ჭეშმარიტად გეუბნებით დანარჩენ ჩემს მსახურებს: იარეთ, როგორც პირობები მოგცემთ ამის საშუალებას, თქვენს სხვადასხვა მოწოდებებში, დიდ და ცნობილ ქალაქებსა და სოფლებში, სამართლიანად განიკიცხეთ ამასოფელი ყოველ მათ უსამართლო და უღმერთო ქმედებებზე, განუმარტეთ ნათლად და გასაგებად, უკანასკნელ დღეებში აოხრებასა და სიბილწეზე.

118 ვინაიდან, თქვენი მეშვეობით, – ამბობს უფალი ყოვლადძლიერი, მათ სამეფოებს დავაქცევ, შევაზანზარებ არა მარტო დედამიწას, არამედ ვარსკვლავებიანი ზეცაც იზანზარებს.

119 ვინაიდან მე, უფალმა, ხელი გავიწოდე, რათა მოვავლინო ზეციური ძალები; თქვენ ახლა ამას ვერ ხედავთ, მაგრამ ცოტა ხანში იხილავთ და გაიგებთ, რომ მე ვარ და რომ მოვალ და ვიმეფებ ჩემს ხალხთან ერთად.

120 მე ვარ ალფა და ომეგა, დასაწყისი და დასასრული. ამინ.