Unit 2, Day 1

1 Nephi 1

Pasiuna

Ang Basahon ni Mormon nagsugod sa istorya ni Nephi sa iyang amahan, si Lehi, nga matinud-anong mibuhat sa iyang mga tahas isip usa ka propeta ug isip ang priesthood lider sa iyang pamilya. Ang pagsabut sa pangalagad ni Lehi makatabang kanimo nga mas makasabut sa tahas sa mga propeta sa atong kapanahonan. Siya usa sa “mga propeta, nga nanagna ngadto sa [mga Judeo] nga sila kinahanglan maghinulsol” (1 Nephi 1:4). Tungod kay si Lehi masulundon ngadto sa Dios ug nanagna sa kalaglagan sa Jerusalem, ang mga katawhan mibiay-biay kaniya ug buot nga patyon siya. Bisan pa niana, si Lehi nagmaya sa kalooy ug gahum sa kaluwasan sa Ginoo. Sa imong pagtuon sa 1 Nephi 1, paghunahuna kon sa unsang paagi ang kalooy ug personal nga kalabutan sa Dios napakita diha sa imong kaugalingong kinabuhi.

1 Nephi 1:1–3

Nagsugod si Nephi sa iyang talaan

Basaha ang 1 Nephi 1:1, ug ilha ang mga pulong nga nagpahibalo unsa ang kinabuhi ni Nephi.

1. Gikan sa imong nabasa sa bersikulo 1, isulat sa imong scripture study journal kabahin sa bisag usa ka hitabo nga imong nabati ang imong kinabuhi susama sa kinabuhi ni Nephi.

2. Tubaga ang mosunod nga pangutana sa imong scripture study journal: Sa unsang paagi kaha nga si Nephi “nakasinati og daghan nga mga kasakit” bisan pa “gipangga sa Ginoo sa tanan [niyang] panahon”?

Mga Panalangin sa Pagtuon sa Kasulatan

Usa sa imong mga oportunidad niini nga tuig isip usa ka estudyante sa seminary mao ang pagbasa sa Basahon ni Mormon. Ang pagbasa sa mga kasulatan maglig-on sa imong relasyon ngadto sa Ginoo. Si Presidente Spencer W. Kimball mitudlo: “Akong nakita nga kon dili nako kaayo hatagan og bili ang akong pakigrelasyon uban sa Dios ug sa dihang mora og walay diosnong dalunggan nga naminaw ug walay diosnong tingog nga namulong, nga ako layo ra gayud kaayo. Kon akong isubsob ang akong kaugalingon sa mga kasulatan ang gilay-on magkaduol ug ang pagka-espirituhanon mobalik.”(Mga Pagtulun-an sa mga Presidente sa Simbahan: Spencer W. Kimball [2006], 84).

1 Nephi 1:4–20

Si Lehi nakadawat og panan-awon ug mipahimangno sa mga katawhan sa pagkalaglag sa Jerusalem

Hunahunaa ang usa ka higayon sa dihang ang imong mga ginikanan o mga lider sa Simbahan mipahimangno kanimo bahin sa usa ka makuyaw nga butang. Unsa man ang ilang motibo sa pagpahimangno kanimo?

Ang atong Langitnong Amahan nahigugma kanato ug buot nga kita luwas gikan sa sala, nga makadaut kanato. Usa sa mga paagi nga ang Dios mopahimangno sa Iyang mga anak mao ang pinaagi sa mga propeta. Ang mga propeta mopahimangno batok sa sala ug motudlo og kaluwasan pinaagi kang Jesukristo. Samtang magtuon ka sa 1 Nephi 1, pangita og ebidensya niini nga baruganan. Misugod si Nephi sa iyang talaan pinaagi sa pagsulti kanato nga daghang mga propeta misangyaw ug mipahimangno sa katawhan kabahin sa unsay mahitabo ko dili sila mohinulsol (tan-awa sa 1 Nephi 1:4). Basaha ang 1 Nephi 1:5–7, ug markahi sa imong mga kasulatan giunsa ni Lehi sa pag-ampo ug unsa ang iyang giampo. Ang pag-ampo ni Lehi ngadto sa Ginoo nagpakita nga siya mituo sa unsay gipangsulti sa mga propeta.

Basaha ang 1 Nephi 1:8–10, ug lingini sa ubos ang tanang nakita ni Lehi sa panan-awon.

• Dios

• Jesukristo

• Mga anghel

• Napulog duha pa

Lehi

Basaha ang 1 Nephi 1:11–12, ug tan-awa unsay nahitabo kang Lehi samtang mibasa siya sa basahon nga gihatag kaniya. Pinaagi niini nga panan-awon ang Ginoo miandam pa kang Lehi sa pagpangalagad sa katawhan sa Jerusalem. Basaha ang 1 Nephi 1:13, ug tan-awa unsa ang gitudlo kang Lehi kabahin sa Jerusalem. Samtang magbasa ka, ibutang ang imong kaugalingon sa lugar ni Lehi ug hunahunaa kon unsa ang imong bation kon ang Ginoo mosulti kanimo nga kining mga butanga mahitabo sa imong panimalay ug syudad.

Kay napahimangnuan kabahin sa kalaglagan sa iyang mga katawhan ug syudad dayag kaayo nga lisud alang kang Lehi. Bisan pa niana, basaha ang 1 Nephi 1:14–15, ug hibaloi nganong si Lehi nagmaya bisan og iyang nakita nga ang Jerusalem malaglag.

3. Isulat ang imong mga hunahuna bahin sa mosunod nga pangutana sa imong scripture study journal: Sa unsang paagi ang kasinatian ni Lehi sa 1 Nephi 1:5–15 miimpluwensya sa iyang tinguha sa pagtudlo sa katawhan ug midapit kanila sa paghinulsol?

Human napahimangnoan kabahin sa kalaglagan sa Jerusalem, si Lehi mipakigbahin uban sa mga katawhan sa Jerusalem unsay iyang nakat-unan. Mipahimangno siya kanila nga pagalaglagon sila kon sila dili maghinulsol. Basaha ang 1 Nephi 1:18–20, ug ilha sa unsang paagi ang mga katawhan sa Jerusalem mitubag. Hunahunaa nga ikaw usa ka editor sa usa ka mantalaan ug kinahanglan kang mosulat og headline alang sa 1 Nephi 1:18–20. Unsa man ang imong headline?

Lehi Prophecying to the People of Jerusalem

Pamalandungi ang mosunod nga pamahayag:

“Sama sa mga propeta sa karaan, ang mga propeta karon mopamatuod kabahin ni Jesukristo ug motudlo sa Iyang ebanghelyo. Gibutyag nila ang kabubut-on ug tinuod nga kinaiya sa Dios. Nagsulti sila sa maisugon ug klaro nga paagi manghimaraut sa sala ug magpahimangno sa mga sangputanan niini. Usahay, mahimo nga gidasig sila sa pagpanagna sa umaabut nga mga panghitabo alang sa atong kaayohan” (Matinud-anon sa Tinuohan: Mga Hilisgutan sa Ebanghelyo [2004], 207).

4. Sa imong kaugalingon nga mga pulong, pagsulat og han-ay sa mga pulong sa imong scripture study journal nga naghulagway sa responsibilidad sa usa ka propeta bisan pa sa oposisyon nga iyang giatubang.

Samtang misulat si Nephi bahin sa mga kasinatian sa iyang amahan sa Jerusalem, midugang siya og mensahe ngadto sa mambabasa pinaagi sa 1 Nephi 1:20, sugod sa hugpong sa mga pulong “Apan tan-awa ako si Nephi, mopakita kaninyo …” Kini nga bersikulo nagsulti og tema nga gihatagan og gibug-aton ni Nephi sa tibuok niya nga sulat. Linyahi kini nga tema sa 1 Nephi 1:20, ug unya basaha ang Moroni 10:3 nga mangita og susama nga tema. (Si Moroni mao ang katapusan sa mga propeta sa Basahon ni Mormon. Ang gintang sa panahon gikan kang Nephi ug ngadto ni Moroni mga 1,000 ka tuig.)

Bantayi nga si Nephi mideklarar diha sa unang kapitulo sa Basahon Ni Mormon nga iyang ipakita kanato “ang malumo nga mga kalooy sa Ginoo” sa iyang mga sinulat (1 Nephi 1:20). Sa katapusang kapitulo sa Basahon ni Mormon, si Moroni misulti kanato sa paghinumdom “unsa kamaloloy-on ang Ginoo” (Moroni 10:3).

Elder David A. Bednar

Si Nephi buot nga kita makasabut sa sinugdanan pa lang sa iyang talaan nga ang malumo nga mga kalooy sa Ginoo gihatag ngadto sa nagpakita og hugot nga pagtuo Kaniya. Si Elder David A. Bednar sa Korum sa Napulog Duha ka mga Apostoles mipasabut unsa ang malumo nga mga kalooy sa Ginoo ngari sa atong kinabuhi. Lingini ang mga pulong nga gigamit ni Elder Bednar sa paghulagway unsa ang “malumo nga mga kalooy sa Ginoo” samtang imong basahon ang iyang gipasabut:

“Ang malumo nga mga kalooy sa Ginoo mao ang mismong personal ug sa tinagsa-tagsa nga mga panalangin, kalig-on, proteksyon, pagpasalig, paggiya, mahigugmaong kalooy, paghupay, pag-abag, ug espirituhanong mga gasa diin atong nadawat gikan ug tungod sa ug pinaagi ni Ginoong Jesukristo. …

“… Ang malumo nga mga kalooy sa Ginoo dili moabut nga sulagma lamang o dili ba nahiatol lang. Ang pagkamatinud-anon, pagkamasulundon, ug pagpaubos modapit sa malumo nga mga kalooy diha sa atong mga kinabuhi, ug kini kasagaran ang pagpahigayon sa Ginoo mao ang mopahimo kanato nga makaamgo ug mohatag og bili niining importanting mga panalangin” (“Ang Malumo nga mga Kalooy sa Ginoo,” Ensign o Liahona, Mayo 2005, 99–100).

5. Sa imong scripture study journal, tubaga ang mosunod nga pangutana: Unsa nga ehemplo ang imong nakita sa Ginoo sa paghatag sa Iyang malumo nga mga kalooy sa imong kinabuhi o sa kinabuhi sa laing tawo nga imong nahibaloan?

Pagsugod o padayon sa pagpangita ug i-rekord sa imong personal nga journal ang malumo nga mga kalooy nga gihatag sa Ginoo kanimo. Sa imong pagbuhat, mas andam ka nga makakita sa mga panalangin nga gihatag sa Dios kaninyo.

6. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang 1 Nephi 1 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: