2 Nephi 11–16

Pasiuna

Si propeta Isaias nabuhi mga 100 ka tuig sa wala pa ang panahon ni Nephi. (Si Isaias misugod sa pagpanagna sa wala pa ang 740 B.C. ug mipadayon sa pagpanagna sobra sa 40 ka tuig, hangtud 701 B.C.; tan-awa sa Giya ngadto sa mga Kasulatan, “Isaias.”) Sa daghang mga paagi, si Nephi tingali adunay susama nga mga pagbati sa pagdayeg ug gugma alang kang Isaias nga aduna kita karon alang ni Propeta Joseph Smith. Atong nasayran gikan sa mga sinulat ni Nephi nga siya “nahimuot” sa mga pulong ni Isaias (tan-awa sa 2 Nephi 11:2). Sumala sa narekord sa 2 Nephi 12–16, si Nephi mikutlo gikan sa mga sinulat ni Isaias, nga nakaplagan sa mga palid nga tumbaga. Kini nga mga sinulat naghulagway sa garbo ug pagkadautan sa karaang Israel ug sa mga paghukom nga naghulat kanila. Si Isaias misaysay usab sa iyang panan-awon sa Ginoo, diin siya nahinloan sa iyang mga sala.

2 Nephi 11:1–8

Si Nephi nahimuot sa pagpamatuod ni Isaias kabahin ni Jesukristo

Paghunahuna og higayon nga nakadayeg ka sa pagpamatuod sa usa ka tawo kabahin sa Manluluwas. Basaha ang 2 Nephi 11:2–3, ug hibaloi kon unsa nga kasinatian ang anaa ni Nephi, Jacob, ug ni Isaias uban ni Jesukristo.

Ang Ginoo nagtawag og mga propeta aron sa pagsaksi Kaniya. Pinaagi sa pagtuon sa mga pagpamatuod sa mga saksi ni Jesukristo, kita makapalig-on sa atong pagtuo kang Jesukristo ug malipay diha Kaniya.

Sa imong scripture study journal, isulat ang imong mga hunahuna kon nganong importante nga adunay saksi ni Jesukristo gikan sa lain-laing mga propeta.

Pangitaa ang upat ka mga higayon nga si Nephi miingon diha sa 2 Nephi 11:4–6 nga “ang akong kalag nahimuot”. Mahimo nimo kining markahan diha sa imong mga kasulatan.

Ang “mahimuot” sa usa ka butang nagsugyot nga ang tawo nalipay niini ug nga ang butang nagdala og dakong kalipay.

Isulat sa imong scripture study journal ang tulo o daghan pang pamahayag nga “ang akong kalag nahimuot” nga nagrepresentar sa mga elemento sa ebanghelyo nga imong gikahimut-an. Ipasabut nganong ang matag usa niini naghatag kanimo og kalipay.

Basaha ang 2 Nephi 11:8, ug isulat kon unsa ang gilauman ni Nephi nga moresulta gikan sa imong pagtuon sa mga sinulat ni Isaias.

2 Nephi 12:1–5

Si Isaias nanagna nga usa ka templo pagatukuron sa katapusang mga adlaw

Paghunahuna og usa ka dako nga bukid. Duna ka bay mahunahunaan nga pagkasusama nga mahimo tali sa usa ka bukid ug usa ka templo?

Basaha ang 2 Nephi 12:2–3, 5, nga mangita kon unsay gisaad nga i-establisar sa Dios sa katapusang mga adlaw. Ang mga pulong nga “bungtod diin ang balay sa Ginoo” nagpasabut sa usa ka templo sa Ginoo. Sumala niini nga mga bersikulo, unsa nga mga panalangin ang moabut gikan sa balay sa Ginoo sa katapusang mga adlaw?

Mahimo kang mosulat sa imong mga kasulatan og sama niini: Ang Dios miestablisar og mga templo aron sa pagtudlo kanato sa Iyang mga pamaagi ug sa pagtabang kanato nga maglakaw sa Iyang mga dalan (tan-awa sa 2 Nephi 12:3).

Tubaga ang mosunod nga mga pangutana diha sa imong scripture study journal:
1. Sa unsang paagi ang mga templo nagtabang kanato sa paglakaw sa mga dalan sa Ginoo?
2. Unsaon nimo pag-andam ang imong kaugalingon sa pagsulod sa templo?

2 Nephi 12–15

Kini nga leksyon dili mohatag og detalyadong mga tabang alang sa pagsabut sa 2 Nephi 12–15. Hinoon, samtang magbasa ug mamalandong ka niini nga mga kapitulo sa imong personal nga pagbasa sa Basahon ni Mormon, pangitaa ang mga sangputanan sa garbo ug sala. Ang mosunod nga komentaryo, o pagpasabut, makatabang usab kanimo sa imong pagbasa:

2 Nephi 12:6–18. Hatagi og espesyal nga pagtagad ang tanang mga paghisgut sa pagsimba og mga dios-dios, ingon man ang mga pulong ug mga imahe nga nagpasabut og garbo—sama pananglit, mapahitas-on, pagkahambog, mapagarbuhon, ug tigpataas sa kaugalingon. Makatabang kini kanimo nga makasabut nganong ang ingon ka grabe nga paghukom naghulat niini nga mga tawo.

2 Nephi 12:9–11. Ang “dautan nga tawo” (bersikulo 9) nagpasabut sa ordinaryo o komon nga tawo. Ang “dautan nga tawo” ug ang “dungganan nga tawo,” kon sila mapagarbuhon, mapaubos sa Ikaduhang Pag-anhi ni Jesukristo (tan-awa sa bersikulo 11).

2 Nephi 12:12–13. “Ang adlaw sa Ginoo” mga pulong nga nagpasabut og usa ka panahon sa paghukom. Ang Ikaduhang Pag-anhi ni Kristo maoy usa ka “adlaw sa Ginoo” sa dihang ang mga dautan pagalaglagon.

2 Nephi 13–14. Diha sa 2 Nephi 13 mao ang sumpay sa paghisgot ni Isaias kon unsa ang mahitabo kon ang mga Israelite magpadayon sa ilang pagkadautan. Si Isaias mitawag sa mga babayeng Israelite nga “anak nga mga babaye sa Zion” (bersikulo 16), nagsugyot nga sila mga anak sa pakigsaad. Si Isaias mipahisama kanila ngadto sa usa ka mapasigarbuhon nga babaye nga gitunglo sa Ginoo, ug ang tanan niyang mga alahas ug ubang pisikal nga mga dayan-dayan gikuha (tan-awa sa 2 Nephi 13:16–26). Agig pagkumpara, ang 2 Nephi 14 naglakip sa paghulagway ni Isaias kon unsay mahitabo kon ang mga anak nga babaye sa Zion magpaubos sa ilang kaugalingon, maghinulsol, ug modangup sa Ginoo. Kon duna kay magamit nga LDS nga edisyon sa Biblia, gamita ang mga footnote sa Isaias 3 aron sa pagtabang kanimo nga makasabut sa 2 Nephi 13:16–26.

2 Nephi 15:8–22. Ang pulong nga alaot nagpasabut og usa ka kahimtang sa tumang kaguol. Si Isaias migamit niini sa unom ka higayon dinhi nga mga bersikulo samtang iyang giila ang mga sala sa mga Israelite. Si Isaias nasayud nga kon ang mga Israelita dili maghinulsol, ang mga sangputanan sa ilang mga sala magdala og tumang kaguol—ilabi na sa panahon sa paghukom. Kon si Isaias usa ka propeta karon dinhi sa kalibutan, iya ba nga makita ang samang matang sa mga sala nga iyang nakita taliwala sa mga Israelite?

Basaha ang 2 Nephi 15:20. Pagsulat sa imong scripture study journal og pipila ka mga paagi diin ang mga katawhan karon motawag sa maayong mga butang nga dautan, o sa dautan nga mga butang nga maayo.

2 Nephi 16:1–8

Si Isaias gitawag aron mangalagad isip propeta

Ang mga sinulat ni Isaias puno sa simbolo. Ang mga simbolo maoy usa ka paagi nga ang Ginoo nagtudlo kanato mahitungod sa mga baruganan sa ebanghelyo. Sumala sa narekord sa 2 Nephi 16, si Isaias mihulagway sa iyang kasinatian nga nakakita sa Ginoo. Samtang imong basahon ang 2 Nephi 16, ibutang sa hunahuna ang mosunod nga mga simbolo ug ang ilang posible nga mga kahulugan:

Serafines: Mga anghel nga nagpuyo sa presensya sa Dios. Si Propeta Joseph Smith mitudlo nga “ang anghel sa Dios wala gayuy mga pako” (History of the Church, 3:392). Ang pako sa mga anghel nagsimbolo sa ilang gahum sa paglihok ug sa pagbuhat.

Aso: Mahimong magpasabut sa presensya sa Ginoo (tan-awa sa Pinadayag 15:8).

Hugaw og mga ngabil: Pagkadili takus.

Nagsiga nga uling (kalayo): Makalimpyo nga butang, sama sa makalimpyo nga gahum sa Espiritu Santo.

Altar: Literal nga paagi, ang altar mao ang dapit diin ang mga sakripisyo gihimo. Mahimo kining nagpasabut dinhi sa sakripisyo nga gihimo ni Jesukristo alang kanato—ang Pag-ula.

Basaha ang 2 Nephi 16:1–7, ug irekord sa imong scripture study journal ang imong mga tubag sa mosunod nga mga pangutana:
1. Unsay gisulti sa usa sa mga serafines mahitungod sa Ginoo sa mga Panon?
2. Unsa kaha ang gipasabut ni Isaias dihang miingon siya, “Alaot ngari kanako! Kay ako nalaglag; tungod kay ako usa ka tawo nga hugaw og mga ngabil”? Unsay nakahimo niya nga kalit nga mobati niini nga paagi? (Ang 3 Nephi 27:19 mahimong naghatag og sugyot.)
3. Unsay nahitabo aron mausab ang pagbati ni Isaias sa pagkadili takus?
4. Sa unsang paagi kini nga kasinatian nag-andam ni Isaias aron moadto taliwala sa mga katawhan ug magtudlo og paghinulsol?

Ang usa sa talagsaong mga kamatuoran nga gitudlo diha sa pagkatawag ni Isaias mao nga mahimo kitang malimpyohan sa atong pagkadili takus pinaagi sa Pag-ula ni Jesukristo. Pamalandungi ang usa ka higayon nga imong nasinati ang makalimpyo nga gahum sa Pag-ula diha sa imong kinabuhi.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 2 Nephi 11–16 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: