Helaman 10

Pasiuna

Pagkahuman sa husay sa pagpatay sa labaw nga maghuhukom (tan-awa sa Helaman 7–9), mipauli si Nephi sa iyang kaugalingong balay. Namalandong siya unsay gipakita sa Ginoo kaniya ug nabalaka usab sa pagkadautan sa mga tawo. Sa higayon nga si Nephi mawad-an sa paglaum, ang Ginoo nakigsulti kaniya ug mipanalangin kaniya sa kahangturan uban sa gahum sa pagbugkos. Ang Ginoo mimando ni Nephi sa pagpadayon sa pagsangyaw og paghinulsol ngadto sa mga tawo, mando nga gisunod dayon ni Nephi.

Helaman 10:1–11

Nadawat ni Nephi ang gahum sa pagbugkos

Paghunahuna og panahon sa dihang naningkamot ka pag-ayo sa paghimo og unsay matarung apan ang reaksyon nga imong nadawat gikan sa uban o mga resulta nga imong nakab-ot lahi kay sa imong gipaabut. Sa Helaman 10 mabasa nimo ang mahitungod kon giunsa sa Ginoo pagpanalangin si Nephi samtang siya nagpadayon nga matinud-anon sa malisud nga mga sirkumstansya.

Human maabswelto sa pagpatay sa labaw nga maghuhukom, nahibaloan ni Nephi nga ang mga tawo wala magpakita og hugot nga pagtuo ug wala maghinulsol human sila makasaksi sa kulba-hinam nga mga panghitabo diha sa Helaman 9. Mipauli si Nephi nga nawad-an og paglaum. Basaha ang Helaman 10:1–3, ug pangitaa unsay gipamalandong ni Nephi samtang naglakaw siya pauli. Mahimong markahan nimo sa matag higayon nga ang pulong pamalandong gihisgutan niini nga mga bersikulo. Ang pagpamalandong nagpasabut sa paghunahuna og maayo, sa kasagaran bahin sa mga kasulatan o sa ubang mga butang mahitungod sa Dios. Kon inubanan sa pag-ampo, ang pagpamalandong sa mga butang mahitungod sa Dios makapahatag og pagpadayag ug dugang pagsabut.

Hunahunaa ang mosunod nga mga pangutana:

Unsay gipamalandong ni Nephi?
Ngano nga siya mibati og “hilabihan kasubo,” o kaguol?
Unsay nahitabo samtang siya namalandong?

Usa ka baruganan nga gipakita sa Helaman 10:1–3 mao: Ang pagpamalandong sa mga butang mahitungod sa Ginoo makapaandam nato sa pagdawat og pagpadayag. Ubang mga ehemplo sa mga kasulatan naghulagway usab niini nga baruganan: Namalandong si Nephi sa mga butang nga gitudlo sa iyang amahan, nga si Lehi, ug nakakat-on sa kamatuoran (tan-awa sa 1 Nephi 10:17; 11:1); ang batan-ong si Joseph Smith “namalandong … pagbalik-balik” diha sa Santiago 1:5 ug ang kamatuoran gipadayag ngadto kaniya (tan-awa sa Joseph Smith—Kasaysayan 1:11–19); ug si Presidente Joseph F. Smith namalandong sa mga kasulatan nga naghisgot sa katubsanan sa mga patay ug ang kamatuoran gipadayag ngadto kaniya (tan-awa sa D&P 138:1–6, 11).

Kadaghanan sa pagpadayag nga madawat sa mga tawo kon mamalandong sa mga butang mahitungod sa Ginoo, hinoon, dili moabut pinaagi sa tingog nga madungog, pagkakita og mga panan-awon, o sa ubang kulbahinam nga mga paagi. Si Elder David A. Bednar sa Korum sa Napulog Duha ka mga Apostoles mipasabut:

“Ang mga pagpadayag gihatag sa nagkalain-laing paagi, lakip, sama pananglit, sa mga damgo, mga panan-awon, mga pakigsinultihanay uban sa langitnong mga mensahero, ug inspirasyon. Ang pipila ka mga pagpadayag madawat diha-diha dayon ug kusog kaayo; ang pipila mailhan sa inanay ug sa kalumo. …

“… Labing kasagaran, ang pagpadayag motubo nga hinay-hinay sa pagdagan sa panahon ug ihatag sumala sa atong tinguha, katakus, pagpangandam. Ang ingon nga komunikasyon gikan sa Langitnong Amahan sa hinay-hinay ug sa kalumo ‘motuhop diha sa [atong mga kalag] ingon sa mga yamog nga gikan sa langit’ (D&P 121:45). Kini nga sumbanan sa pagpadayag mahimong mas sagad kay sa panagsa ra ug tataw nga makita diha sa mga kasinatian ni Nephi samtang siya misulay og daghan nga nagkalain-laing mga paagi sa wala pa magmalampuson sa pagkuha sa mga palid nga tumbaga gikan ni Laban (tan-awa sa 1 Nephi 3–4). …

“… Ang sukaranan nga mga kamatuoran sa gipahiuli nga ebanghelyo wala gihatag ngadto ni Joseph Smith diha-diha dayon sa Sagradong Kakahoyan. Kining bililhon nga mga bahandi gipadayag sigon sa gikinahanglan sa mga kahigayunan ug sigon sa husto nga panahon.

“Si Presidente Joseph F. Smith mipasabut kon sa unsang paagi kini nga sundanan sa pagpadayag nahitabo sa iyang kinabuhi: ‘Isip gamay nga bata … ako sa kasagaran … mohangyo sa Ginoo nga ipakita kanako ang kahibulungang mga butang, aron makadawat ako og usa ka pagpamatuod. Apan gipugngan sa Ginoo ang mga kahibulongan ngari kanako, ug gipakita kanako ang kamatuoran, pagtulun-an human sa usa ka pagtulun-an…hangtud nga Siya mipahibalo kanako sa kamatuoran gikan sa alimpulo ngadto sa akong mga lapa-lapa, ug hangtud nga ang pagduda ug kahadlok sa hingpit makuha gikan kanako. …’ (sa Conference Report, Abr. 1900, 40–41).

“Kita isip mga miyembro sa Simbahan daw mohatag og gibug-aton sa kahibulongan ug mahinuklugong espirituhanon nga mga pagpakita nga tingali kita napakyas sa pagdayeg ug gani sa pag-alinggat sa naandan nga sundanan diin ang Espiritu Santo nagbuhat sa Iyang buluhaton” (“Ang Espiritu sa Pagpadayag,” Ensign o Liahona, Mayo 2011, 88).

Isulat diha sa imong scripture study journal kabahin sa usa ka higayon nga ikaw mibati nga nakadawat og personal nga pagpadayag. Unsa ang mga sirkumstansya nga miresulta sa pagpadayag? Sa unsa nga paagi nga ang pagpamalandong makatabang nimo sa pagdawat og pagpadayag? (Hinumdumi nga ang pagpadayag moabut sa daghang mga paagi. Mahimong maglakip kini og kalit o hinay-hinay nga higayon sa paglamdag ug pagsabut o mga pagbati sa kalinaw ug kasiguroan.)

Paggahin og panahon kanunay sa pagpamalandong sa imong kinabuhi, sama sa panahon sa mga miting sa simbahan, sa dili pa ug human sa personal nga mga pag-ampo ug pagtuon sa kasulatan, human motan-aw o maminaw sa kinatibuk-ang komperensya, samtang magpuasa, o samtang magbalaan sa Igpapahulay.

Hunahunaa nga ikaw dunay butang nga bililhon kaayo nganha nimo ug kinahanglang ibilin nimo kini ngadto sa uban. Kinsa ang imong saligan nga moatiman niini? Nganong gipili nimo kana nga indibidwal? Unsay nahimo nianang tawhana nga nakaangkon sa imong pagsalig?

Basaha ang Helaman 10:4–5, ug pangitaa nganong ang Ginoo misalig ni Nephi. Ang walay kaluya nagpasabut nga “dili gayud kapuyon.” Pamalandunga ang mga ehemplo sa mga tawo nga imong nailhan kinsa nagserbisyo sa Ginoo nga walay kaluya bisan unsa pay mga sirkumstansya.

Ang tubag sa Ginoo ni Nephi sa Helaman 10:4 nagtudlo sa baruganan: Ang Ginoo misalig kanato sa mga panalangin ug mga responsibilidad kon unahon nato ang Iyang kabubut-on kay sa atoa.

Tubaga ang usa o dugang pa sa mosunod nga mga pangutana diha sa imong scripture study journal:
1. Sa unsang mga paagi nga ikaw nasayud unsa ang kabubut-on sa Ginoo bahin sa imong kinabuhi?
2. Unsay imong nabuhat sa imong kinabuhi karong bag-o sa pagpakita sa Ginoo nga ang Iyang kabubut-on mas importante kay sa imong kaugalingong kabubut-on ug nga kini mao ang gusto nimong sundon sa tanang higayon?
3. Unsa ang bahin sa imong kinabuhi diin mas nagtinguha ug nagsunod ikaw sa kabubut-on sa Ginoo imbis sa imong kaugalingon?

Basaha ang Helaman 10:5–7, ug ilha ang mga panalangin ug mga saad nga gihatag sa Ginoo ngadto ni Nephi tungod sa pagkamasaligan. Isulat ang mga panalangin ug mga saad tupad sa tukma nga bersikulo:

Bersikulo 5:

Bersikulo 6:

Bersikulo 7:

Ang panalangin nga anaa sa Helaman 10:7 usa ka importante nga doktrina sa ebanghelyo ni Jesukristo: Ang gahum sa pagbugkos [sealing power] nagbugkos ug nagbadbad dinhi sa yuta ug didto sa langit. Nakaila ba ikaw og ubang mga tawo sa mga kasulatan nga gihatagan niining gahum sa pagbugkos? Mahimo nimong i-cross-reference ang Helaman 10:7 sa mosunod nga mga kasulatan: 1 Mga Hari 17 (Elijah); Mateo 16:15–19 (Pedro); Doktrina ug mga Pakigsaad 132:46 (Joseph Smith).

Basaha ang Doktrina ug mga Pakigsaad 128:9, ug ilha kon unsay gitudlo ni Propeta Joseph Smith mahitungod sa gahum sa pagbugkos.

Ang samang mga yawe sa gahum sa pagbugkos gihuptan karon sa Presidente sa Ang Simbahan ni Jesukristo sa mga Santos sa Ulahing mga Adlaw. Sama nga ang Ginoo misalig ni Nephi, ang Ginoo nasayud usab nga ang Presidente sa Simbahan dili mogamit niini nga gahum sa bisan unsa nga supak sa Iyang kabubut-on. Kining awtoridad sa pagbugkos gitugyan ngadto sa ubang mga naghupot sa priesthood sa tibuok kalibutan, aron ang mga ordinansa sa priesthood dunay epekto dinhi sa yuta ug didto sa langit.

Hunahunaa ang mosunod nga pamahayag ni Elder Bruce R. McConkie sa Korum sa Napulog Duha ka mga Apostoles kabahin sa kaimportante niining gahum sa pagbugkos:

“Ang tanang mga butang nga wala mabugkos niini nga gahum adunay katapusan kon ang mga tawo mamatay. Gawas kon ang bunyag duna niining malungtarung silyo, dili kini modawat og tawo ngadto sa celestial nga gingharian; gawas kon ang mahangturong pakigsaad sa kaminyoon gibugkos pinaagi niini nga awtoridad, dili kini modala sa duha ngadto sa kahimayaan sa kinatas-an nga langit diha sa celestial nga kalibutan.

“Ang tanang mga butang makaangkon og malungtarung gahum ug pagkabalido tungod sa gahum sa pagbugkos” (Mormon Doctrine, 2nd ed. [1966], 683).

Tubaga ang mosunod nga mga pangutana diha sa imong scripture study journal:
1. Sumala ni Elder McConkie, unsa ang mahitabo kon ang ordinansa dili mabugkos pinaagi sa husto nga awtoridad?
2. Sa unsa nga paagi nga ang gahum sa pagbugkos nakaapekto sa imong kinabuhi, ug sa unsa nga paagi nga gusto nimo nga kini makaapekto sa imong kinabuhi sa umaabut?

Basaha ang mosunod nga pamahayag ni Elder Russell M. Nelson sa Korum sa Napulog Duha ka mga Apostoles nga ang gahum sa Dios kalabut sa pagbugkos gipahiuli: “Ang mga templo, mga ordinansa, mga pakigsaad, mga endowment, ug mga sealing gipahiuli na, sa tukma nga paagi sigun sa gipanagna. Ang mga ordinansa sa templo nagsangkap alang sa pakig-uli ngadto sa Ginoo ug nag-seal sa mga pamilya hangtud sa kahangturan. Ang pagkamasulundon sa sagrado nga mga pakigsaad nga gihimo diha sa mga templo naghimo kanato nga sarang alang sa kinabuhing dayon—ang labing mahinungdanon nga gasa sa Dios ngadto sa tawo” (“Pangandam alang sa mga Panalangin sa Templo,” Liahona, Okt. 2010, 42).

Sumala ni Elder Nelson, unsay nakapasarang nato aron makadawat sa gisaad nga mga panalangin sa gahum sa pagbugkos?

Helaman 10:12–19

Si Nephi misunod sa sugo sa Ginoo sa pagsangyaw og paghinulsol ngadto sa mga tawo

Gihangyo na ba ikaw sa pagbuhat og butang sa usa ka ginikanan, employer, o lider ug milangay sa pagbuhat niini o napakyas sa pagbuhat sa unsay gihangyo? Ikonsiderar unsa nga mensahe ang imong gipadala sa dihang imong gilangay ang pagbuhat sa unsay gihangyo kanimo.

Basaha ang Helaman 10:11–12, ug pangitaa kon giunsa pagtubag ni Nephi ang sugo sa Ginoo kaniya sa pagsangyaw og paghinsulsol ngadto sa mga tawo. Unsay atong gipakita sa Ginoo kon kita motubag dayon sa Iyang tambag ug mga sugo?

Basaha ang Helaman 10:13–18. Dayon, diha sa imong scripture study journal, pagsulat og pipila ka mga sentence kon unsay imong nakat-unan gikan sa ehemplo ni Nephi sa pagtubag sa sugo sa Ginoo. Pagsulat og usa ka paagi nga imo kining magamit sa imong kinabuhi.

Ang pagkamatinud-anon ni Nephi nagpakita nga ang Ginoo makasalig kaniya, ug siya napanalanginan og dakong gahum ug panalipod.

Ribyuha ang Scripture Mastery

Alang sa pagribyu sa scripture mastery, basaha ang 1 Nephi 3:7; 2 Nephi 2:27; 2 Nephi 31:19–20; ug Mosiah 2:17. Ikonsiderar sa unsa nga paagi kini nga mga bersikulo sa scripture mastery nagamit ni Nephi ug sa iyang pangalagad sa Helaman 10.

Pangita og mga paagi sa pag-una sa kabubut-on sa Ginoo sa dili pa ang imoha ug sa pagsunod dayon niini. Samtang matinud-anong ikaw nga moserbisyo sa Ginoo sama ni Nephi, Siya mosalig ug mopanalangin kanimo.

Isulat ang mosunod nga pahinumom diha sa ubos sa mga buluhaton karong adlawa sa imong scripture study journal:

Akong natun-an ang Helaman 10 ug nahuman kini nga leksyon niadtong (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: